Article : Pasaipha Laina Mararâh - Puhpa Laicho Nôtlia saduthliepa râh

PASAIHPHA LAINA MARARÂH (Puhpa Laicho Nôtlia saduthliepa râh (Ideal State)

Mara chi nata pho thapasana hla hluhpi hryta, a phopi dua ta pahâhkhei pi ta, palôh pahnie ta, maluhpi ta chhaota sa a hlao kawpa, *Pasaihpha Laina Mararâh* tahpa hla heta, *Mara chi nata pho thapasana, kyhpachâna* sapapua via rili ta, a hlabie pha kawpa cheihchalo awpa ta palôh chhikao a kawh viapa ta pahysa theituhpq aony a hneipa heta he hla he thatlôna a pie via heih tah leithei awpa châ vei.

He hlaphituhpa, Puhpa Laicho Nôtlia ta he hla liata *He hawhna heta Mararâh he châ sala, he hawhna heta a chhôh liata pahrâpa Marasawzy chhao y ei sihla* tahpa ta a saduthliepa *Mararâh* nata *Marasaw* châta a *Saduthliepa râh (Ideal State)* heta pachâna liata hlâno Greek chyhsa sopa, Plato ta râh avaona kyh liata saduthliena a kaw hneipa (Ideal state)-zy palôh liata a vaw lâ ta; cha nota, *Puhpa Laicho Nôtlia saduthliepa râh (Ideal State)* nata Plato ta _Ideal State_ a saduthliepa deikua kyh nano nanopa ta â nano thei aw. He hawhta a châ nota deikua, amâ chhuahna deikua *râh thapasana, kyhpachâna nata ama ti nata râh phana awpa ta saduthliena* a châ raihriepa vâta deikua, *O miakha tawhta saduthliena a pua khohpa* tah leithei thlyu ma pi. 

He hawhta a châ nona heta - Saduthliena nairu liata, Puhpa Laicho Nôtlia saduthliepa râh he cha, chi nata pho thapasana, râh kyhpachâna palôh hmeiseihpa, pachâna liahmaripa tawhta kaw lohpapuapa a châpa vâta nata, *hmo a y theipa, hmo pa-ysa theipa (realistic/achievable)* a châpa vâta, saduthliena nata pachâna liana ngâlâhta hlao patloh theipa, *Plato saduthliepa râh (Ideal State)* hlâta cha pasiatlâh châ via ta, a pata via, eima tah thei aw.

Puhpa Laicho Nôtlia Saduthliepa râh (Ideal State)

*Pasaihpha laina Mararâh* tahpa hla liata, a phituhpa ta *Mararâh nata Marasawzy hetana heta châ ei sala* tahpa ta saduthliena a kaw hneipa pahyna châta, Mararâh nata a chhôh liata a ypa, Mara chi nata pho cha Khazohpa ta a paduapa, â tlyhpa, he chi nata pho he khizaw tawhta leidia leipa ta khâ â duah papua lymâ theina awpa ta mahnô-mahpaw daihti no tawhta, chi nata pho châta hrona taihta a hlâ ngâhpazy ta ngâchhihna viasa pha chaipa riahphana palôh phaohpa ta ama vaw pabohsapa râh a chânazie a hla châh khana liata za palâsa ta. Cha hawhna tlai chata Mararâh he, chi nata pho châta riahphapa nata ngâchhihpa, Pasaihpha zy chareina râh châ lymâ sala tahpa ta saduthliena ta a za khaw heih.

A pina nata a laiseihna, Mararâh cha, râh zydua hryta â ngia patluapa, pawpi chito, â ngia kawpazy ta ama tobipa, râh chhithaipa nata khochhihpa a chânazie za palâsapa ta, châ â ngia patluana nata khochhih patluana zydua cha, tlâhpi tawhta za lohpa chavah ti lohpazy chata, a râh leilô ytuzie khochhihna cha baichha via rili ta, chavahti loh ngâpa pyury zy chata Mararâh khochhihna nata a ngianazy ta khâ ama phuahluah haipa hawhta a saduthliena mothlaw liata za hmô ta; cha hawhpa râh ngiapa nata phapa tlai chana, chyhsa riahphapa nata, râh, chi nata pho châta hrona taihta a hlâ ngâhpazy yna su tlai cha a châ, tahpa sadu a za thlie ha heih.

A hla châh khana nata châh nona liana heta, he hlaphituhpa kuzô thaizie he eima hmô chhei na ta pangiasa vana. Thai kawpa ta *Imagery* za hmâh ta; Mararâh, a leilô pawngiana nata khochhihna, mothlaw liata eima kaw hmô pâ theina awpa ta zy, hlâno daihti liata pasaihphapazy a pielyuzie nata ama hrozie nôchâ awpa, rohpadyna mothlaw liata miah pahmôsa thei thlâh ha cha maw! A hla châh 2-na liata, *Auditory Imagery* tah thei awpa, *Onomatopoeia* za hmâhpa ta, *Chavah ti zy cha pyury papuapa ta, paro khôlôpa* hawhta a za reipa heta, nahkao liata chavah ti loh ngâpa pyu  parosa ta -  He hleikhôta, *Personification* chhao za hmô pi ta, *Nâ ngia tlaina hy ei pina* tahpa ta Mararâh cha chyhsa hawhta pachâsapa ta, bie â chhopa ta, kho â chhihzie lyuhbie a hlâna eima hmô hra. He dei vei, he hlaphituhpa he leilô pawngiana nata khochhihna pasô thaipa nata, Taotuhpa kuzô cheihchalo ta, pasô thaipa *Naturalist* tah leithei awpa châ vei..

"Chô Khazoh kuhria Mararâh

Mahnô-mahpawzy laizaolaona;

Riahpha ngâchhih lôhpi phaohpa ta,

Chariah hmia lia chhao chá papha beih vei

Pasaihpha laina Mararâh

Hy nâ ngia tlaina ei pina,

Pawngiana tota a cha tobi;

Tlâhpi nata vâpiah tizy ta,

Paro khôlô ta cha palyupalih,

Pasaihpha laina Mararâh"

A hla châh 3-na liata, *Mararâh châta a saduthliepa (Ideal)* a kaw phuahluah hmeiseih ha bâ. Mara thyutlia, Marasaw zy cha, hrozie, nôchâ, hmotaopa nata palôhphaozie liata adona  khâchâ hneipa châ ei sala a khonazie tlâh-awhkheipa ta, Mararâh châta phana awpa kyh liata cha palôh hmaohkha phaohpa ta, pachâna alyuleipazy nata, khozie a lyuleipa zydua chhao, Mararâh ta hmahsiena nata hmialã keih a chakâ theina awpa a châ khiahta cha, thy ngâhpa ta, pachâna miakha phaoh ngâh awpa ta a saduthliepa Mararâh cha kaw rohpadypa ta, cha chata Mararâh nata, Mara chipho cha khizaw liata palâhâh hra aw ta, khizaw râh hropazy hmiakô liata chhao zakhei a chhih leipa ta eima chi nata pho, râh cha eima cheihchalo thei ha bâ aw, tahpa sadu a kaw thlie heih. Cha hawhpa râh tlai cha na *Pasaihphapazy laina Mararâh cha a châ awpa rai a châ* tahpa ta a saduthliepa râh cha a kaw pa-ipacha via ha heih.

A hla châh 4-na liata, a saduthliepa râh (Ideal state) liata Marasaw zy chata, ama thaina sona, thatlôna zydua cha Mararâh châta hmâh khai ha aw ei ta, tahpa ta a hlabie hmâpa ta pahaona kaw awhkhei heihpa ta; cha hawhpa zydua Mararâh châta ama hmâh khai tlai khiahta la, *a saduthliepa râh hmeiseihpa (Ideal State) châna liata a baipa - Râh thapasana nata kyhpachâna pa-ysatuhpa Khotalaina cha râh, chi nata pho ta hnei aw ta; cha khotalaina byhnâ chata alyna, palôhtlâhna vaw tlôkheipa ta..cha zydua cha Mara chipho châna, Mara chipho, Mararâh zawpi tovyuh a vaw châ khai ha bâ aw* tahpa ta a *Saduthliepa râh (Ideal State)* châna hmeiseihpa cha kaw phuahluah hmeiseihpa ta, *Cha tlai cha ei saduthliepa, Pasaihphazy yna, pahrâna Mararâh tlai cha a châ* a kaw tah hapa a châ.

"Marasaw thyutlia zydua he

Dona kyh ta palôh bie sala;

Pachâna miakha ta Mararâh,

Cheihchalo via ei sih he khizaw lia,

Pasaihpha laina Mararâh

"Na thatlôna sona zydua

Marapa râh châta sai hmâh la;

Khotalai, lyna, palôhtlâh,

Nâma châ sai a vaw châ khai bâ aw,

Pasaihpha laina Mararâh"

He hla he, *Hlaphôh* châ ha mawh sala cha, *Ode hlaphôh*-zy nahta châki miakha amâ hly cheingei na ta ei pangiasa. He hleikhôta, a hlabie pahnothai naopa, _Prosaic Verse_ ta ropa a châ raohpa ta, hlabie a zaokhina dâh pha kawpa, châh khana tawhta châh palihna taihta lâ hro rai tlei leipa ta, bâliah hawhta khâ azao khai hapa, phôhpa hawh sikhua ta siekheipa, *Narrative Structure* a châna heta a hla he palôh liata a pasia pachaih tah thei awpa a châ.

"Puhpa Laicho Nôtlia saduthliepa râh (Ideal state) cha eima tlô thei tlai ma?"

William Wordsworth khata *London, 1802* tahpa Hlaphôh liata, *England râh ta a daihti khô ha chiehpa liata rônahna nano nanopa a hneipazy a reithai kaw raohpa ta, chhâthiehpa daihti liata deikua cha reithaitlâh a châna nata, a mohphanazy a pahlei khai hanazie* a tlâh-awhkheipa hawhta, *Puhpa Laicho Nôtlia chhao heta, mahnô-mahpaw daihti nota, riahphana nata ngâchhihna palôhru dopa zydua kha a saduthliepa Mararâh liata y khai thei heih sala aw* a tah cheingei thlyu hra aw..

Greek chyhsa sopa, Plato saduthliepa râh, *Ideal State* cha pachâna khizaw liana deita padua theipa, hmeiseihna khizaw liata padua thai rimâ lei awpa, a phana deikua eimâ mopâ theipa tlai châ ta; he hawhta a châ nota, *Puhpa Laicho Nôtlia saduthliepa râh (Ideal State) - Pasaihpha laina Mararâh* deikua, pachâna khizaw liata dei châ leipa ta, hmeiseihna khizaw liata padua theipa tlai a châ...cha a saduthliepa râh padua awpa chata, keih chakâ lymâ suh vy..

"Marasaw thyutlia zydua he,

Dona kyh ta palôh bie sala;

Pachâna miakha ta Mararâh,

Cheihchalo via ei sih he khizaw lia,

Pasaihpha laina Mararâh"

Rohtuhpa ~✒️ Robert B.Syuhlô, Siaha