Khizaw ta a mokhâh haipa Morocco chapaw hawtipa pachhapapua thei mâh vei ei

Morocco liata chapaw hawtipa kô 5 ta uhtheipa, tikhaoh (well - leikhaoh reipa) liata tlapa, pua thei khao leipa pachhapapua awpa achhuahpa ta hmahlana chata a kih tlô daihmâ hapa ta, pachhapapuatuhpazy ta chapaw hawtipa yna su he ama tlô thei daihmâ ha bâ, tahpa BBC chata a palâsa.

Noh 4 a khô hapa lianata khata Morocco liata chapaw hawti pakha, Rayan ama tahpa cha, leikhaoh (Well) metre 32 (104ft) ta â pathuhpa liata tlapa ta pua thei khao leipa ta; noh 5 chhôh daihmâ he leikhaoh liana heta â tâh ha bâ. A thi ma a hroh ma, pachhapapuatuhpazy heta a daihti ta liata ama pachhapapua hmâ ma, tahpa cha khizaw ta a sai hai

He thâtih pachhuahpanoh hai no taihna heta cha pachhapapuatuhpazy heta hawtipa yna tlô awpa ta metre 1.8 deita â ngiah bâpa hawhta reipa a châ.

He hawhta hnabeiseihna a sâh kawpa hneina chô ta hawtipa yna leikhaoh ama chavie hai nona heta, alei cho thei awpa a ypa vâta pachhapapuana rai he amâ chalihsai ma, kheita ma ama chhichâna a châ aw, tahpa ta ama luh a pahiah ngaita. He thota, he chapaw hawtipa he a hroh ma, a thi ma tahpa chhao pahno thei vei ei.

Pachhapapuatuhpa hyutuhpa Abdelhadi Tamrani ta AFP hnohta a reinazie liata cha, Camera liata â lâna dâhta cha chapaw hawtipa he a kâ lâta â zia ta, “A hroh ma, a thi ma tahpa pahno thei ma pi. Khazohpa ta rie a hrohpa ta miah pachhapapuasa sala” tahpa ta a reih.

Pohbienohta chapaw hawtipa yna khaoh liata Camera ama za chahraohpa tawhta â lâna dâhta cha chapaw hawtipa cha hroh thlâh ha ta, â theihlô thlâh hapa lyu ta, a luh deikua bâhta â chhuhpâpa ta hmôpa a châ.

Pachhapapuatuhpazy heta chapaw hawtipa he Oxygen, nie awpa nata ti za chahraohpa ei ta, châhrasala chapaw hawtipa heta he ama hmo za pathlapazy he a vaw la ma, a vaw nie ma, a vaw doh ma, tahpa deikua pahno thei vei ei.

He chapaw hawtipa he, a paw ta tikhaoh (Well) a taopathi ngâ nota he tikhaoh (Well) liana heta tla tlamaw ta; a nô nata paw he ama vâ sâh ngaita. Ama sawchapaw duasu awpa pachâpa ta, a môzia leipa ta, vâsâhna chôta daihti ama hmâh hai