MARA NOVEL : PHURIE - BO 7-NA

Cha-ypi daihti châta achhuahnohna hmeiseihpa, râh â khie awpa ama châ ha tawhta tly cha, Dôthâ chata râh amâ khie n’awpa palôh liata khâchâ paveihna chôta a palôhrupa zydua ta a pachâ chaipa, Ngôki-nah O liata laiphô chô cheingei awpa a chhuahpa ta râh â khiena lâ ama sie hlâ zâ chata a viasapa Vâchai nahta a thao ei ta. O hro lazy nôpaw viapa  ahmô laihpa ta ama tleitlâ tawhta a môti â daih hlâta ta Ngôkinah O liata a kaw rie awpa ta khy ei ta. Zâ a rei hapa vâta ma a châ ma, cha leipa ta thohaw ama chhawna liata â piechhei hapa vâna khata ma a châ ha ma, he zâ he cha Biekhâ hmi hmô awpa rai y vei.

He dei châ heih leipa ta, he zâ heta Ngôkinah O liata laiphô chôpa rai vaw y leipa ei ta, Vâchai nahta amâ zâ ngiapa cha siphiah liata pala hlô vaw paryhpari ngâpa Ngôki chata âvaw hnabeiseih kaw ei, tahpa a mopadei liata vaw palâsapa ta, amâ vaw ngia patawnah chata, “E..A uh Dôthâ zy ama châ thlâh hih..Ei cha vaw mokhâhna ei ta pua ei mokhaohzy â pathuh khai daihmâ ha…avaw tyu tu..avaw tyu tu..” thlai vaw tahpâ lymâ ta. O chhôh amâ zâ ngia pathlahpa cha Ngôki nô chhao cha chakoh liata tihâh ma a pachao ma, vaolao ma a pachao ma, vaw chahria ngâkaw ta.

Dôthâ zy viasa pano cha thlai bie avaw chho hrapa ta, “Dôthâ nata Vâchai zawzi ta thoti tiah lei eima hnei ha hih. Vaw charei tua u. Khaw khaw Nunu kiah liana khata avaw tyuh u ly. Nâmo pano he mylâ râh a khiena lâ cha nama sie hraw my? Nâmo nama sie ha khiahta cha eima yru kaw dia my?” tahpa ta bieki hnei kawpa ta Ngôki cha kei mohpâ ta.

Dôthâ chata, “Uh, Nônô, eima sie hra aw eima tah tlai. Mylâ râh a khiena lâ eima sie awpa la eina pahla kaw bâ” tahpa ta bie hropa chhao reih khao hlei leipa ta Ngôki kiah liana chata thlai a zâ tyuh ta. 

Chakoh liata mei cha chasôpa ta, “Nunu, mei he vaw mohpâ muh vy..kha he a zâ zia tua sa y..Na paw rao a paro ngâkaw heih chu..a luh ma a paryh pasu vei ma…Dôthâ, Vâchai, khata avaw hra ula, namâ mô khoh ti a mô thlâh ha lahvâ ei chi..mylâ nama sie awpa bai lai, a hra parei tu leipa ula, Mâpha vaw sa muh vy” tahpa ta thyusai ha ei ta.

Ngôki nô â zia tawhta Vâchai chata, “Unawh, mylâ Zôrihtlâh lâ eimâ thao awpa cha, ei tha a pawh kaw nota, ngiarohnazy na ei hnei pâ” tahpa ta Dôthâ cha moh hlei leipa ta siphiah liata a zâ tyuhpâ ta.

Dôthâ chata, “Khazia heih my Unawh? Kei cha tlao eina pahla kaw tlai..Zôrihtlâh, eima manô-mapaw daihti no tawhta eima pasaihphazy laizaolaona nata, sato-sazaw laina râh, Masiah-chaoliah chareina tlâh liata râh a khie awpa tluta eina byuhpa y vei” kaw tah ta. 

Vâchai chata, “A châ kaw nota, Biekhâ zy ama sie heih hraw bao hnaihta..na chôta ama palôh phaozie pahno khai thlâh ha na ta, vâduana zy hmah a tyh tlamaw ha la, tahpa ei cha chi khei kaw” kaw tah heih ta. 

Dôthâ chata, “E…unawh, na pachâna cha â do kaw nota, Biekhâ he a rei hluh kaw hrasala, kuthyupa ta na thyuhnao awpa deikua a chhâpa nata a vâpa a y lei khiah ngâh hmeiseih vei ny…a bietô tlâ lai chakhyh ta..hmeiseihna râh tlô ngâh hlei vei ny..ei viasa pha chaipa nâ y chi ta, hmia nata hnôh eimâ vaih rairie kha tlyma” tahpa ta a kei chhy ta.

Vachai chata, “Unawh, â do kaw. Hiahvâ ta eima vâduana nohta a rao lei khiahta cha hladyuh pathluahpa ta, sapi-salai luh eimâ vaw dikhei cheingei tlai my..khiahta la keila ei châ môsai tua ei, zâhnia zâ a mô phathi leipa na ta..khata avaw pakyh thlâh muh vy” tahpa ta siphiah liana chata a ziapâ ha ta; buakha y ta, a pahnawh pâ lymâ ha hra. A thachhâ kawpa na a châ ei aw.

Ngôki chata Vâchai cha â mô pasia liahsa ma tahpa pasiapa hawhta a za uahnao tawhta a kaw heih papuapa ta, “A Uh Dôthâ, atahmâhlâ la khazia ma châ tly, ei cha vâ para ngâthlâh ha cha maw…mylâ râh a khiena lâ nama sie awpazy chhao he a thei sala la cha vaw zi awpa taihta na ei khoh thlâh ha hra..” tahpa ta a pala hlô cha baiba liana chata kei khô ta. Dôthâ kiah liata avaw tyuh heihpa ta, avaw hniepâ ta.

Dôthâ chata thlai vaw chakupa ta, Ngôki luh cha a ngiatlâh liata pachhaisapa ta, a ku sâkha lâta Ngôki sâhmia hiapa ta, a ku sâkha lâta Ngôki ku cha patupa ta, “Atahmâ cha he eimâ pazina noh nata khihzy chhao vaw pasih ha bâ hra ta. Opi paryh khoh awpa chhao ngiarohna rai ei za hnei vei cha maw. Hmeiseihta la, na nô nata paw chhao heta ei hârana nata machhiepa ei châna he pahnolei amâ pachâpa ta ei pahno. He heta thlalôhna athata eina pie. Anodeikua chyhsapa hmialâ daihti rei theipa a châ leipa hawhta, a pha chaipa a pahawh sihla, syna Opi miakha ry liata eima laizaolao khohna daihti hâ hnolo chy pi ta tah tyh” tahpa ta Dôthâ chata Ngôki luh liana chata a kâh cha kei pachhai ta. 

Ngôki chata chakoh liata mei a ia hnolo ngâpa cha mohpa ta, “A uh Dôthâ, nâma nata kei he la hiahvâ sâhmia patipatypa tlai na eima châpa ta ei pahno tyh. Eima daihti khô chiehpazy ei za saihna ta la, â do via ngâkawpa ta ei pahno tyh. Ei nâ nata ei pâ ta chhao nâma he la seina rai cha hnei vei ei. Khihliah biethâh liata na thâchhie ama cha rei tyhpazy chhao he zo rai vei ei mâh my” tahpa ta, Dôthâ ku cha za lapa ta, a ôkhaih liata kaw nâpâ ta.

“A uh Dôthâ, nâ he châ vaw tyh vana tahpa ei chi kaw tyh cha maw! A châhta la ei cha pahlei aw, tahpa ei chi tu hana liata zâcho ei mokuh a pahâh lichih zy heta ei kaw hra thlâh ha heih tyh. Kyh ei cha pachâ tu hapa vâta na a châ aw tah tyh?” kaw tah ta.

Dôthâ chata Ngôki cha a zâ pyh pa-I viapa ta, ano lâ a kei via heihpa ta, a luh cha ano hmiachhy awpa ta za pahiehpa ta, mei ia ngâpa ta a khaipa, a mopadei liana chata kyhpachâna nata tlaichhaina, thlalôhna nata alyna za hmô ta. Ano liata hnabeiseihna a hnei kawpa chanô khochhihpa cha, cha zâ, sidiapa nata dâh rolopa ry liata mei ia ngâpa khaihna liana chata, ano liata khona zydua a thaohpapua khai ha khiah maw, tah awpa ta Ngôki hmao liana chata za sy ta.

Cha Hmypi zâ sidia kawpa ry liana chata, Khihhrâ khih liata satlia nata laihsa, khihtlâh mo a chohna chaipa panopazy chata ahy hropa thâh rai a ngiah vei ei. Ama likah liata kyhpachâna, mei hawhta a ia ngâpa cha ama mopadei liata kaw ia papua ta. Cha chata amâ pielyuzie zydua kohkipa ta, cha zâ sidia kawpa ry liana chata kyh amâ pachâna cha peihria leina rakha ta liata papitlohsa haw ei ta.

Zâcho awh vaw khohpa ta, a mylâ mydi ta râh a khie awpa, Dôthâ palôh cha vaw pahrapa ta, a chachôhna liata thlahlôh ngâsâpa ta a luh pahniehtuhpa, Ngôki cha za mohpa ta, za pakie ta. ‘Thina dei leipa ta cha miah pachhaih aw vei’ tahpa cha ano thei khita ta za reihpapua ta. Cha a biereipa chahnao pa-ipa tuhpa châ sala a ngiapa ta, zâcho awh cha vaw khoh haw heih ta. 

Dôthâ chata buakha chhôh tlai Ngôki a mô ngâpa hmi, thlalôh kawpa ta a hu a so ngâpa cha a sai tawhta, pahrapa ta, pasaih lei kawna chôta nata I kawna chôta a mâpha ha ei ta.

(Bo 8-na thlai eima vaw pazao heih aw.....)