Morocco chapaw hawtipa hrona pachha thei khao vei ei!

Pic : Chapaw hawtipa nô nata paw

Kô 5 ta uhtheipa, Morocco chapaw hawtipa, tikhaoh/leikhaoh (well) liata a tlapa, khizaw maluhpi ta ama pachhapapua awpa ama mokhâh thlâh hapa cha, pachhapapuatuhpazy ta Leikhaoh tawhta ama lapapua thei ha tarawpa ta, vâduachhih kawpa ta a hrona pachha thei khao vei ei.

He chapaw hawtipa he pachhapapuatuhpazy ta tikhaoh tawhta ama lapapua tawhta, daihti rei leipa liata a hrona a chhâ pâ, tahpa Morocco bei chhôhkha biepuapa chata a palâsa.

He hawtipa Rayan tahpa ta ama awpa pachhapapua awpa ta Hmahlana he Morocco râh dei châ leipa ta, khizaw ta mokhâh ta, chyhsa sâh hluhpi ta he chapaw hawtipa vâduana atyhna su he ngaipa ta, pachhapapuana raihria no he mokhâh ei ta; he hleikhôta TV nata Internet tawhta khizaw chyhsa hluhpi ta ama mokhâh hra.

He chapaw hawtipa he ama O kiah liata tikhaoh (well) metre 32 (104ft) liata tla ta. Pachhapapua awpa ta Hmahlana he lei chopa vâta chatlie chakoh thei vei.

Pachyhnohzâ khata he hawtipa he â tâhna su tawhtahpa lapapua theipa châ ta, ama lapapua nona heta a thi ma a hroh ma? khâpa ma a duasu? tahpa reipa châ tla leipa ta. Ano vaw mokhâhtuhpazy ta thapha ngaitapa ta ama pachhapapua hapa vâta alyna pyury ama tao hai nota, a hrona pachha thei khao vei ei, a thi ha na, tahpa biethâh ama theipa chata palôh a patypamâ kaw.

He chapaw hawtipa he, noh 5 chhôh tlai feet 100 hleita a thuhpa khaoh liana heta anodeita a tâhpa ta, a luh liata hmah phaoh pâ ta; ti nata Oxygen hleikhôta, niebaw awpa ama za pathlapazy hra a nie thei ma, a hmâh thei ma, tahpa pahno thei leipa ei ta; Leikhaoh liata a y no tawh rai heta, a thi ma a hroh ma, tahpa ama pahno thei khao leipa kha a châ.