Mizoram : Kô 2021 kha kô 10 chhôhta meikâpa a hluh chaina kô a châ

Zâkô 2021 kha atlia kô 10 (2012-2021) chhôhta Mizoram liata meikâpa a hluh chaina daihti châ ta. Zâkô chhôhta O kâpa zakha liata 67.10 nata râh kapa zakha liata 93.46 cha February - April thla chhôhta a tlôpa a châ. 

Fire & Emergency department ta ama ngiana dâh liata zâkô 2021 (January - December) chhôh khata Mizoram liata O kâpa (House fire) 76 ypa ta, râh kâpa (Forest fire) 199 y ta, Rs. 27,74,83,-507 rachhôhta a sôhpa HMO a kâ (value of property damage).   

Meikâpa vâta hmahphaohpa 3 ypa ta, Fire service ta ama khâsia thei leina su liata târi 25.2.2021 zâlâ dawh 3:30 khata Zamawia (87) Kepran khihpa cha YMA park kiah liata râh kâpa a pachhaina liata a hrona a pahlei.

February - April cha meikâpa hluhna daihti châpa ta, he thla 3 chhôh heta O kâpa 51 ypa ta, he he zâkô 2021 chhôhta O kâpa a ypa zie 76 tawhta zakha liata 67.10 tloh ta, February - April chhôh pyly ta râh kâpa 186 taihta a tlôpa chhao zâkô chhôhta râh kâpa zydua zie 199 tawhta zakha liata 93.46 a tloh hra. 

Zâkô chhôh khata January-liata Rs. 63,800 tluta a sôhpa chhaichhi hmobaoh kâpa y ta, February-liata Rs. 91,44,300 tluta sôhpa chhaichhi hmobaoh kâpa a y. March cha meikâpa hluh chaina daihti châpa ta, O kâpa 22 nata râh kâpa 106 tlôpa ta, he thla chhôhta chhaichhi hmobaoh kâpa sôhna lâ cha Rs. 16,94,12,500 a tloh. 

April-liata Rs. 1,71,32,250, May-liata Rs. 15,11,000, June-liata Rs. 2,74,94,807, July-liata Rs. 13,12,500, August-liata Rs. 12,00,000, September-liata Rs. 30,-68,350, October-liata Rs. 23,000, November-liata Rs. 82,00,000, December-liata Rs. 3,89,21,000 tluta sôhpa hmobaoh a kâ.