Myanmar : Pheisaih sawhkhâ china vâta nô nata pawzy ta ama sawnahzy chhôhkha ama châna tawhta ama thy

Yangon, Myanmar: Thla thôh a khô hapa chhôh nohchareih tah thei awpa liana khata, Myanmar liata sawhkhâ thâtihbu-zy liata cha ama chhôhkhazy ta chhôhkha tawhta ama thy hapa pahnosana ama papuapa hmô awpa y ngâthlâh ha ta, â lâhâh kawpa ta Myanmar pheisaih sawhkhâ adyuhtuhpa ama sawchapaw, sawchanô, samohpa nata ama sietanô/rilâhpa sawzy cha ama chhôhkha tawhta ama thy ha, tahpa pahnosana papuapa hmô awpa a y ngâthlâh ha.

He hawhta chhôhkha tawhta a thyna, chhôhkha manôh ama châna tawhta â thyna pahnosana he zâkô Phiapi thla tawhna khata hmô awpa y ngâthlâh ha tyh ta; Myanmar pheisaihzy ta sawhkhâ thypathlahpa ta sawhkhâna ama siekhei tawhna khata athata he hawhpa pahnosana he hmô awpa vaw y via lymâ ta; he he achhâ chaipa ta â lâpa cha, pheisaih sawhkhâ heta pheisaih sawhkhâ adyuhtuhpazy nata, pheisaih sawhkhâ adyuhtuhpazy luh nyuna awpa ta ama O nata lyu a hmâhtuhpazy cha ama O nata lyu, hmo hneipa zydua ama lapa khai ha aw, tahpa pahnosana ama papuapa vâta châ ta. He pahnosana a zipa heta pheisaihzy heta O hluhpi cha amâ ngiahnao ha hra.

He hawhta ama chhôhkhazy ta chhôhkha châna tawhta ama thy hapa pakha, Car zuahtuhpa, Lin Lin Bo Bo, chhao he pheisaih sawhkhâ adyuhtuha pakha châ hra ta, a chhôhkhazy ta chhôhkha manôh a châna ama thy ha tahpa pahnosana he thâtihbu liata ama papua ha hra.

Lin Lin Bo Bo he a chhôhkhazy ta zâkô Phiapi (November) thla liana khata sawhkhâ thâtihbu miakha, ‘The Mirror’ liata chhôhkha tawhta ama thyna pahnosana he hawhna heta ama vaw papua : "Lin Lin Bo Bo he a nô nata pawzy khozie a nahthlie khoh leipa vâta chhôhkha manôh a châna tawhta eima thy ha” tahpa ta, a ry liata a nô nata paw moh â roh pâ.

He kô 26-ta uhtheipa, Lin Lin Bo Bo he Reuters thâtihbu-ta amâ pakyhna liata,  a nô nata paw ta ama saw a châna tawhta ama thyna kyh ama hiahrihpa cha, Myanmar pheisaihzy ta ama O lâ a vaw ngiahnaopa ta ama vaw tluapa vâta a nô chata ama sawchapaw a châna tawhta ama thy hanazie a chho, tahpa a reih.

He hawhta ama chhôhkhazy a nuapa ta âmo adyuhtuhpazy chhôhkha tawhta pathysana hmahlana he Myanmar pheisaihzy heta kô 2007 tawhna khata vaw hmâh syulyu ha ei ta, kô 1980 chhâna lâchhâh tawhna chhao khata ama vaw hmâh ha hra; châhrasala atahmâ hawhta a hluh viapa ta ama hmâna cha February 2021 liata Myanmar sawhkhâ, zawpi ta ama patlohpa pheisaihta ama thypathla rakha tawhna khata châ via chai ta; Myanmar râh liata he hawhta ama sawnah, chhôhkhanahzy ta pheisaih riah ama chipa vâta saw ama châna tawhta ama thy hapa thâtih he rei awpa a hluh kaw.

SOURCE : https://www.ndtv.com/world-news/hundreds-of-myanmar-parents-publicly-disown-children-who-oppose-myanmar-junta-out-of-fear-2753164