Russia-Ukraine buana : Russia ta US cha adyuhna patlôsa thomo a chhuahpa hawhta a bai

Russian President Vladimir Putin chata Notla râh US cha Ukraine chôta Russia ta abohna kyh a pachâ peimawhpa hlâta, Russia cha adyuhna lâta khâchâ a ngiakhei awpa amâ chhuah viapa hawhta a bai. Ukraine râh tlahnao thei awpa duasu liata a duah haipa hawhta ziza â charih haipa ta hâta ei charu tlai a ryu tawhta, Putin heta Russia nata Ukraine likah ziza liata a pachâdâh khizaw hmiakô liata a phuahluah tua chaina liata he bie he reihpa ta, "Atahmâ cha hmoto a sia ha bâ...Russia ta a pachâ peimawh chaipa cha pahnolei amâ pachâ," tahpa ta Putin heta NATO manôh râh, Hungary PM ta Russia a tlyna liata thâtihbuzy amâ pakyhna liata a reihpapua.

Putin chata hmialâ daihti vaw y awpa liata hmo a tlô theipa reihpa ta, Ukraine cha NATO liata lapangiapa châ tuapa ta, he khai tawhta Russia ta kô 2014 liata a vaw la hapa, Crimea Peninsula cha NATO heta la heih awpa amâ chhuahnazie a rei.

Putin chata, "Ukraine he NATO manôh (member) hawhta pachâ sihla, he pheisaih thatlôna hmâpa ta a tlahnaona he Ukraine ta a vaw pathao hapa châ sala. NATO râh apakaohlâhpazy nahta eimâ dyuh aw tahna a châ ma? He pachâna he nama hnei beih ma? â lâna dâhta cha hnei beih ma pi," a tah.

He thâtih pachhuahpanoh hai no taihna heta Russia heta Ukraine nahta amâ râhrina liata pheisaih maluh 100,000 tlai soh ha ta; he vâna heta Notla râhzy chata Russia heta Ukraine he tlahnao (invade) awpa â chhuahpa hawhta ama pachâ.

Russia chata he Ukraine tlahnao awpa achhuahpa hawhta baina he dytha taraw hrasala, Ukraine râh vâta Russia abohna châta hmo chichhihpa a tlô thei awpa a châ khiahta cha pheisaih thatlôna ama hmâh aw, ama tah pyly heih. Notla râhzy chata Russia ta Ukraine a chho (Invade) tlai khiahta cha hriena (Sanction) ama chaluah aw, ama vaw tah ngâkaw hra.

Russia chata Notla râhzy cha kô 1999 liata aryhna vaw y hapa, kheihawhpa râhta hmahta râh hropa abohna paraopakeinazie ta âmo râh abohna ama buakhei awpa châ vei, tahpa cha za awpa ta ahawpa ta, he aryhna he atahmâ ta ama buana liamarih chaipa a châpa hawhta Russian Foreign Minister chata a reih hra.

He aryhna, kô 1999 liata Istanbul liata a rohtuhpazy kha ‘Organisation for Security and Cooperation in Europe’, manôh sahlao - United States nata Canada-zy chhao amâ hlaona kha châ ta; kha aryhna hawhna khata Russia heta a râh abohna awpa ta Ukraine kyh he a pathlâpazi tua awpa â ngiah, ama tah. Ukraine râh, NATO lâta lapangia awpa achhuahna a ypa hawhta pahnona cha, Russia buana chaipa a châpa ta â lâ.