MARA NOVEL : PHURIE, BO 6-NA

Khihhrâ beipa nata a machâzy sahlaota Khihhrâ khihtlâh châta kyhchhihna rônahpa, cha-ypi daihti amâ hmâ n’awpa noh châta daihti ama vaw raopa chhao â vaw hnia lymâ ha hra. Râh a khie awpa ta Khihhrâ khih pasaiphazy nata satlia sahlaozy chhao achhuahnoh pathao ha ei ta. Sato-sazaw luh cheingei ta kyhchhihna rônahpa pachhuahpanoh cheingei awpa amâ chhuahpa vâta ama khih sa a ka thaipa, pasaipha hleikhôta, chapaw, satlia thyudyupa tawhta paw uhthei tu leipazy taihta he râh a khiena lâ sie cheingei a chhuahpa ta Meithei a hneipazy nata chaihrai hropa a hneipazy chhaota ama Meithei nata chaihraizy khâsiapa ta taopathi angiahpa nata pamihpatlaoh a ngiahpazy cha tao lymâ ei ta. Cha noh vaw tlô awpa cha ama hâdy kaw sai.

Hâta eikha dua râh a rie awpa ama châpa bao hnaihta, zârie a phaoh awpa sâh daih chiehpa chhao amâ chhuahnoh pha kaw. Cha-ypi châta râh amâ khie awpa cha Khihhrâ khihliah bie chaipa châ ta. Laiphô chôna nata thophao tithaina liata ama rei chaipa a châ hra. Laihsa thokha hra ta, cha hawhta ama satlianah râh amâ khie khai awpa cha ama palôhzy avaw lie chhielie ta; laiheihpaw thokha, râh lâta dyutlai leipazy hra ta O hâtuhpa châ awpa cha ngiaroh kaw ei ta, thailei amâ pachâ kaw hra.

Dôthâ chhao cha sa luh phaoh theipa nata sa ka theipa a châna hawhta Zôrih tlâh lâta sa luh tluapa ta râh amâ khie awpa a ngiahtiahlei kaw hra ta. A paw ta a thi saipa, sa luh hluhpi âvaw dikhei hana Meithei, aolainô tlai seihpa cha pazupathâpa ta, vaothawzy hniapa ta, patlaoh a ngiahpazy nata pathai angiahpazy pathaipa ta, my tawhta a Meithei cha buakhei ta. Châhkeih liana chata a zai-ôh nata a Meithei cha pazupathâ ngâkaw ta, zôrih tlâh liata Chaolia lai kawpa, a ki hmahta liahsa maih padih khai hapa, a parawpachaw viapazy ta ‘A ki hmahta liahsa â tyh khai ha’ ama tahpa tlai cha ka awpa achhuahna a palôh liata lai kaw ta. A Meithei cha a pha thei chaina hawhta chamao-chahlia tua awpa â ngiah tahpa ano tluta pahnopa y aw vei ei.

A paw a hro no, chapaw hawti deita a châ nota a paw ta Chaolia lai pha kawpa, a ki chhao liahsata ta a maih khai hapa a ka nota, ama khih hawka liata hladyu pathluahpa ta khih tawhta ama kei dy nozy kha a mothlaw liata âvaw lâ ta. Ama khih bei ta ama saluh vaw phaopa Vaothaw ta a iapa nopazy kha a mothlaw liata zâhniatlia ta hawhta a châh thlâh ha chy. Zôrih tlâh tawhta ama khih hawka liata hladyu pathluah cheingei awpa cha â chhuah chaipa châ leithei vei.

Ama O bâ liata saluh nano nanopa â tawhpa hryta Chaolia ki pha kawpa â tawhpa cha kaw moh ta, a palôhrupa chata, “Na viasa awpa thlai ei vaw tawh hr’aw la y” kaw tah ta.

Cha hawhta a pachâna liata hnôhlâ daihti a pakyhpa ta â chalih thlâh nona chata, “Pâpâ, cha mylâ cha Zôrihtlâh lâ râh namâ khie bâ awpa châ ta, eima satlia thatlô lichih nozy châ mawh sala cha ei sie cheingei hr’awpa tlai ta aw! Atahmâ cha eima kô nata khihzy ta eima pachâna a chadai pha khao tlôh vâ!” tahpa ta a pawpaw Mawkhu cha châhkeih lâ kaw puapa ta a Meithei pathai ngâpa cha avaw tyupâ ta.

Dôthâ chata, “Ei pâ, atahmâ he hmahta na tha hoh no châ sala cha keimo hlâta hmahta san a phaoh hluh via thlâh ha chy thei la y” vaw tah para ta.

Puhpa Mawkhu chata, “Pasapanana zy ta na taola vei mawh sala cha, atahmâ he hmahta ei tha nata zâh â za kaw chyhpa tlaita aw! Châhrasala, chyhsapa he uhtheina lâ ngaipa ta, hro pasihna chhao chiehleina ta a zi awpa ta paduapa eima châ ha tawhta tly cha..a pyh thai awpa he a ngiah tyh ta. Chhâthiehpazy châta eima khizaw eima tleihai thai awpa chhao he a ngiah ta; cha cha leilô ytuzie rai châ hra tlôh ta…chhâthiehpa ta taozie thiehpa nata pachâna thiehpa amâ vaw ngiakheipa cha, keimo ta hmahsiena eima vaw tah heih tyh hrapa a châ. Kha he na Meithei cha cha vaw mopa tua sa y” tahpa ta Dôthâ Meithei cha kei paza ta. Dôthâ chata thlai vaw hlâpa ta, puhpa Mawkhu chata Meithei cha pazupathâpâna chôta, “He Meithei he ei pâ ta na paw hnohta a paryupa châ ta. A hriahrâ pha ta, a ka pasa ta, chaolia khazie leichâ ma cha na paw khata avaw pahluah ha hrapa a châ” tahpa ta Meithei cha-iapheipi zy cha za chamao-chahlia ta.

Puhpa Mawkhu mokhaoh liata Meithei ta thathyuna nata palôh a liena a kaw thaohpapuapa cha, Dôthâ chata hmôchhei vei. A lei lâ a zâ khupa ta za pakie ta. A zai-ôh cha za pazapa ta, kaw paliepalâpa ta, a khaoh nata a chhiehru-zy cha za mohpasia ta.

Puhpa Mawkhu chata Meithei cha ka awpa hawhta kaw hypa ta, okah liata thokô cha kei mopa-ai ta. A palôh a lie ta, a tha nata zâh ta a pha mawh sala cha Dôthâ-zy kiah liata Zôrihtlâh lâ sie awpa cha a pahla kaw hra, tahpa cha a mohpadei tawhna chata a sia thlâh ha.

Meithei cha Dôthâ pie heihpa ta Puhpa Mawkhu chata, “Pâpâ, hmo sâkha na pahno ngâthlâh ha awpa deikua cha, na paw a hro nota khihtlâh châta ngâtlâh a chânazie zy nata a veiseihnazie zy kha my leipa la. Râhhmâhpa liata, ahy hmô pha leipa liata thina nata hrona likah, sahrâhpa hmiakô liata a duah awpa nama châpa vâta ahrohrua ngâthlâh hana chôta nata asohsi kawna chôta a pielyu chi ta. Riahphana nata sa ka theina liata vâtlâh chô lâta a ypa hmahta châ hrala, hlâta uhthei viapa zana nata, veiseihna khâ hneina chôta a kei pielyu ma y. Riahpha kawpa ta nata, Khihhrâ khih châta thlalôhna khi na chânazie kei palâsa ma y. Eima khih satlia thokha ta na thâtih ama cha reina dâh chhao pahno leipa la châ vana. Anodeikua, amâ châ tlu leipa vâta amâ châ iekhyh tahpa pahno lei awpa ngâsâ ta la machâ mâh hra vana la y. Kheitarai châ sala, na châna a pahnopa ta kyhtotie liata a a pha thei chaina hawhta a pielyu la. Vânoh to tlâh awpa ta na châna a pahno ngâthlâh ha ma y” kaw tah ta.

A bie kaw rei heih awpa ngiaroh hmi kawpa hawhta buakha chhôh tlai â chalih tawhta, Puhpa Mawkhu chata, “Manô hâra chô liata biesi thâsi hluh, seita hâra chô lia matli hluh tahpa khâ my leipa la; riahphana dopa cha a su nata daihti reizie ta a panawh theina he châ ta, anodeikuala, adyuhna maih kaw liata pahnie viapa ta ypa he pha chai hlei vei tahpa chhao my rai kha y” kaw tah heih ta. 

Dôthâ chata, “Ei pâ, na bie eina chho tyhpa chi zydua he keima châta cha hro lâthlôh dopa na pachhihsatuhpa nata palôh pitlohpa na paphaosatuhpa a châ hmeiseih” kaw tah hra ta. 

Puhpa Mawkhu chata, “Pâpâ, râhhmâhpa liata sa a byh awpa ta a sie awpa châ ei chi ta; hmo na pahno ngâthlâh ha awpa deikua cha, kheihawhpa sa rai na ka awpa chy ta, nâma cha pasasa thei leipa – Sakhih zy hawhpa cha a taw a chhi ngâpa ama châ ma?tahpa pasia tua ha tyh ma y. Taw a chhi ngâpa ama châ khiah ka rai kha y. Sakhia palôh pachhiena châ ta, sa hropa ka thei khao aw va chi. Sakhia ta râhsa cha vaw haopa khoh khao aw vei” kaw tah heih ta.

 Dôthâ heta a pawpaw Mawkhu ta a chhoreina nata biephapa a chho tyhpazy vâta he hawhpa duasu liata a kaw duahpa a châ, tahpa khâ â pahnopa vâta atahmâ ta a pasyuna bie chhao cha my awpa rai a chhuah vei.  

(Bo 7-na thlai eima vaw pazao heih aw...vaw reih la, na pachâna (Feedback) hmâpa ta vaw Comment hra ma y...)