J. Vialua hla - OLIVE THOHNA

- Beimozachhi Hlychho, Siaha

Ano J. Vialua hla "Olive thohna" tahpa Evelyn Azyu ta a sapa he dia maw nahthlie via na pahlaopahli via na ei tah thláh haw?

"Sáhria no daihti cha achhá haw,

Pachhapa ta y tlá ma pi,

Pachhana bie chhotuhpazy,

Ao cha nahthlie kho tlóh pi va."

Jeremia, Abeipa hnohta Izarel saw nahzy váta a paphóhpa zy, Eliza ta Izarel saw nahzy vá pyly ta Khazohpa hnohta a hrona lapa awpa ta a hiapa zy kha eina patheisa dáh ch'i! Ámo hleikhôta Hrosopa hluhpi ta A kyhpachápa A chyhsa váta rairuna amá tyhpazy chhao. Khazohpa váta kyhpachá tláh lei Izarel sawzy kha hmó theipa nata thei theipa khô láta kyh ama vaw pachá cha maw!

He hla he "Khazohpa Hla" ma a chá ma, "Pho Hla" maw, tahpa keima pachâna ei hiahri cháhta la, ano J. Vialua he Zisu ta Lázara a pathyupa hawhta pathyu thei sah la ei tah kaw tyh!

Kó 1907-pa liata Thátihpha dao pi ta, kó 2007-pa liata "Centenary" eimá ly. He hawhta kó 100 ta uhtheipa (pachha chá hapazy) a tah thlá hapa he eima Missionary-zy pei a hria thlá h'aw khiahmaw, tahpa taihta pachána eina pahneisa hra.

Ano J. Vialua hla hropazy kha eima moh khiahta la J. Vialua he "Satire" hla phi thai kawpa chá ta; "Syukizápa" hla kha abiepa na moh khiahta la ahyzy tlyma a reipachhiesa a chá tahpa na pahno thei aw. "Alaipa lai lao, a leipa lei lao" tahpa bie a hmá dàh tawh heta chyhsa a kho dáh (ráh pha via n'awpa ta) hawhta hroh leipazy tahchakia a thaizie hmó chhei ngyu va chi.

He hla Evelyn Azyu ta a sapa chhao he kei la "Khazohpa Hla" tahta reipa he ei rukhei kaw cha maw! Mara pho chyhta zy hmah eima sie leizie nata hnóh khawtuhpa eima cházie a reina, tahpa he ei palôh liata kháchá a y cha maw, ánano dá!

"Olive thohna y vei ma?

Cha lia patláhtuhpa y v'ei ma)

Khazia ei chyhsa ei sawchanózy

Ama tláh to vei tly(2)"

Izih chyhsazy khata khazia maw Izarel saw nahzy kha chichhihpa hawhta ama hmô tly? Izarel saw nahzy kha phopi ta amá dua awpa ama chi váta tlao chá vei má? He hla he ei rei chiehpa hawhta "Khazohpa hla" tahpa hláta la "Pho Hla" a chána heta eina zai pasa via. Ano J. Vialua he Marazy kyhpachâtuhpa châ ta, a saina mokhaoh lâ tawhta saipa ta la "Marazy Paw" tahpa ta rei tláh a chá tah lei thei va na. Marazawzy kyh miah a pachápa hláta chhao a liahritlona, thyutliapazy ta moláh chyhsa hnohta eima pahlei tlamaw aw tahpa riah a chi vá he chá thlá ha vei má khazia a hla hropazy liata " Viahpa kalá tlaikao chariahzy miah dó ei, ei liahritlona liata" tahpa ta avaw soh?!

"Sahro zy ta laopiena pahno ei,

Ei chyhsa izarel deikua,

Kei ama Bei Khazohpa hi

Ei ao nahthlie khoh tlóh ei va"

"Khazoh pho tlyhpa" eima chána he Marasawzy heta eimá palaikhei kaw, mao ma pi. Apalai awpa rai eima chá. Khazia ma he hla heta ei pachâna he eina pahrupa tly? Hetan'heta pachâ heih na ta, sahrozy ta ama laopiena pahno ei ta, keimo mara nahzy deikua Khazohpa ta miah ávaw tlyhna chhâpa, eima châna "Mara" tahpa he eima my ha khiahma i, ei tah. Mawráh, chho láta pahrâpa eima châ váta Khazohpa heta miah á tlyh vei, "Marapa" eima chá vá deita ta tlao a chá. A rônah tah lei thei va na.

Khazia maw ano J. Vialua hla tlai he heta ei pachá syulyu ha tly? Pahno khao hra na. Sahrozy ta laopiena ama pahnopa hawhta keimo Marazy ta deikua Khazohpa miah á tlyhna chhápa my ha pi ta, "Mara" tahpa liata eima sia tlâ khao vei he zaw!

Váchhie J. Vialua a thi chyta ta angiahmana vâta pitloh kawpa thata a chapa thâtih ama reipa kha kei la my thei va na.

Khataih liata ma "Olive thohna" cha y ta, pachhana bie chhotuhpazy chhao cha? Ama ao nahthlie leipa ta khiah maw mietakuhpa hawhta eima pavia ngáthlá haw! Marasawzy thyu sih la, khizaw he khaipahlie hra tua s'u chá!