J. VIALUA NATA VA-IA LÔH-LIENA HLA

– Pachi Hlychho

Mara vâ-iana hla, (love song) lôhliena hla (sentimental song) nata râh kyhpachâna hla (patriotic song) zy he mo pakha ta ama phipa hlazy châhrasala a râh zawpi palôh phaozie rei ta phipa nata sa tyhpa hlazy a châpa vâta, a râh chyhsa palôhrupa âlâna hawhta pachâ thei awpa a châ. Mara va-iana hla nata lôhliena hlazy he a tlâpihpa ta eimâ chu khiatala hla phituhpazy ta ama chhôhsoparu phuah n’awpa ta nata ama palôhliena rei n’awpa heta tlâhpi nata chavah, Thlâpâ nata Awhsi, sopavaw nata châhvâ raihnô, thosôh pawpi nata nopi meihthâh a zawhpa lâ taihta ama hmâh tyh.He vâna heta Mara love song nata lôhliena hlazy heta chyhsa palôh pahnie hmâ kaw tyh ta, a nahthlietuhpazy palôh apaliepa dei châ leipa ta, a hlabiepa nata a hla râh liata eima pachâna zydua miah a chareisa thei tyh.Pho hropa love song he a pakhona hawhta reih sih la, mongyu love song liata cha “Oh yeah, hey, I love you more than I can say…..” tahpa zy “ I love you because u are understanding” tahpa zy châ ta, Mara reih ta duah palie mawh sih la “Hy reih thei va na, Hy chho thai va na……” tahpa lâta pua salyu h’awpazy lyu ta, palôhliepa cha rei leipa ta, chareipakhyna O lâ miah a ngiakhei awpazy alyu ngâ kaw. Mara love song deikua cha ‘Luhchô Bydi lyubie ch’aw hlâ vei mâ, khazia mohtlei eina châsai ha chi’ tahpa zy “Râh lâ si zâti khai hrasa rohpadyh tyh na”. tahpa zy châ ta, palôh apahnie dâh cha bâh anano via rai rai.

Mara pho he khahlâ zydua tawhta hmotaopa (creatures) nata leilô thyukheipa(nature)zy nata avaw chôhpih kawpa, tlâh râh ngia ngâsâpa liata vaw pahrâ zôhzawpa, tlâhpi chô liata meihth?h â zawhpa nata sopavaw nata châhvâ raihnô ao ngiapazy ta ama palôh avaw palie tyhpa a châ zie he ama lôhliena hlazy tawhta âlâ pasia kaw. Khizaw hmahsiena vâta khahlâ ta thothihturâh nata lôkâhkavohpa liata pheiphawh ta valâzoh tyhpa sawzy kha atahmâ cha metal road chô liata dôhla hawhta chatliepa ta khi eima tlyh ngâkaw bâ.Khahlâ ta chôthlapi khaihna ry liata “ Khiahlô liena chôta ei chareipa he,na sikhôh khuh vy lailâh zydua ta,” tahpa ta laikhachha tlâh tawhta pa-awh hnolo ngâ tyhpazy kha atahmâ cha street light khaihpa vâta eimâ kâ khai hapa alyu.Khâparai châsala hmahsiena vâta eima ti nata râh eima nôchâ hrozie nata khihsanazy a thla khai ha hrasala Mara zie do kawpa,kyhpachâna la pasa thei kawpa nata palôh âlie thei kawpa pho eima châna deikua cha street light nata metal road,concrete-o nata T.V zy heta panano thei vei tahpa he eima hla phithaipazy hla nata bie tawhta a sia ngâsâ. He Mara hla phithaipazy hry liana heta J.Vialua chhao ahlao hra ta, a khizaw noh tla ha hrasala a hlazy deikua he cha Mara râh do nata hâ liata adia heih khao nata angia vei.

J.Vialua he hlaphi nata hlasa thai pakaohpa a châpa vâta a hniehnôh chathôh thadâh âchhi kaw.Ei pahnochhei leipa khiata la ‘D’ hro rai vâ va na” tahpa hla he a phi tuachaipa a châpa ta ei pahno.Kô 1971 May thlâpâ, sâh tu nohsa locho nota a phipa châ ta, a hla deikua he cha diasilih hata alie ngâsâ. Kô 17 uhthei liluapa a châ nota nata a thyutlia lômaoh daihti liata a phipa châ hrasala a hla phipa he eima moh khiatala a phituhpa hnie he alai aw tahpa â pahno thei kaw.

‘D’ HRO RAI VÂ VA NA

1. Ei sai tyh aw tlâhpadâ la ‘D’ nô chareina tlâh,

Ei hrochhôh khiahlô tlâh nawpa

‘D’ nô nâ dei na châ.

Chhôhso vâsâna zydua,

Nô pangâtuh awpa ta ;

Pawmaih hry lia nâ ei cha tly,

‘D’ hro rai vâ va na.

2. Hy lôhdu nô duah sai tua la,

Pawlâh di ei cha hrua ;

Chhaihleina lyubie naw hlâ la,

‘D’ hro rai vâ va na.

3. Chhaihlei lyubie reih tua sih la,

Pawmaih ‘D’ ei tlyh tua nô,

Ahy thâ rai ngiah leita,

Bâhlia a cha-ao bâ si.

A châhkhana ngâlâh he moh sih la, chapaw vâtlâhpa palôh do kawpa cha he hla chyuta heta areih pasia kaw. Taopathao tua noh tawhta chapaw palôh zydua latuhpa nata â lyna chaipa he hneirôna nata thatlôna zy châ leipa ta, ‘D’ nô dei hena a châ tahpa he thyudyupa J.Vialua ta miah a chho. Thatlô riahphana nata mohpathâhnazy he chapaw hrochhôh khiahlô tlâhna châ mawh sala Satlia Samsona kha chariah ku liata thi cheingei hlei vei. Hneirôna, abeina nata sonazy he chapaw alyna chaipa châsala cha Bei Solomon chhao khata ‘Hlazy Hla’ kha a phi ngâ kaw nata angia vei.

Mara hla phithaipa hmiatuapazy hawhta J. Vialua chhao he a hla phipa mopa ta Mara râh ngiana (Beauty of nature) ta a palôh sy ta, a palie kaw tyh tahpa he a hla liata alâ kaw. Lôhliena hla a phipa, “A ZAW THAI SA” tahpa hla liata a chaneina he duah moh sih la :

“Angia raolao tlaina châhvâ nopi,

Thlihua naizuahluah nah sâhthai vaw tozy ;

Tuhpi thosôh pawti zyh ei,

A zaw thai sa tlâh to su to sai ta,

Hryh laihpa ei khoh”

Hmo ngiapa nata pha kawpa chhao he â ngiazie nata a phazie palôhruhpa ta a hmô pasia thei leipa khiatala sapa mokhaoh heta hmô hrasala pakah ta reihpasia thai tyh vei. Mo nata pakah he cha palôhrupa ta a hmôpa nata â pyhpa maih a phuahtuhpa dei a châ. J.Vialua he patuapaluana tiah kawpa (Sharp Imagination) nata palôhruhpa mo pasoh kawpa hneipa a châ thlyu aw. A patuapaluana râh tawhta a palôhrupa mo pasoh kawpa ta a hmo hmôpazy hla ta phi ta, âlie ngâsâpa ta ano cheingei ta avaw sa nata cha a hla khizaw liata miah angia khei ta,su to nata tlâh to miah a chahryhkhei tyh.

Mo hropazy chhao he kyhpachâna cha pikhei lai kaw sai hra pi ta, eima kyhpachâna lâpi araih lei châhta chhochhi cha eima palôh hiah ta, â lie kawna daihti chhao a y tyh hra. Châhrasala zawrâpa pi cha bie sapa lâta eima pachâsa thai hra leipa vâta, eima bie nata hla châ thei awpa zydua chhao kha, meihthâh hawhta apai heih tyh. J.Vialua deikua cha bie hneirôh ta reihkah a thaipa dei châ leipa ta, a love song phipazy he eima moh khiatala thyutlia reih nata reih machâpa hmâh pakaoh thai ngâsâ ta, he vâna heta a hla nahthlietuhpazy palôh sy ta apahnie hmâ kaw tyh ei. Ano he a daihti nata su reih zie lyma hawhta hla chi nano nanopa,rock, pop, blues,country, etc ama tahpa zy phi thei lymâpa châ ta, a hlabie yzie lymâ hawhta hla ao chhao tao thei lymâpa a châ.

J.Vialua vâ-iana hla nata lôhliena hlazy heta moto pahly ta, thyutlia viapa nata kô uthei viapazy taih a chahri pha khaipa vâta nata ano cheingei ta âlie ngâsâpa ta a vaw sa nata cha a nahthlietuhpa zydua pi kha a hla Sylpouline ry liata miah a patyusa khai thei tyh. He ary liata lôhliena hla a phipa sakha he duah moh sih la;

RAMA HAWH AMA CHA KHAI HE ZAW!

1. Khataih lia nama y ei laihlâ zy saih u,

Tah ta cha vaw tlua laih ei na ;

Lôh miahkha phaoh ta charei khohna daihti,

Rah-mâ hawh ama châ khai he zaw.

Lopa ta lytlâh khô khai ei,

Laih zaolaona thyudyu phana zy ;

Hnôhlâ zaizy vâ ta a hi laih na,

Lopa ta lytlâh miah khôsai ei,

Rah-mâ hawh ama châ khai he zaw.

2. Hy lôhlie â chhih â lie rili,

Nopi meithâh zawh hry lia ;

Hnôhlâ zaizy vâ ta a hi laih na,

Lopa ta lytlâh miah khôsai ei,

Rah-mâ hawh ama châ khai he zaw.

3. Meikiah zy avaw lo laih he zaw!

Eima thyudyu phana zy chhao ;

Khih liah khydi nah saliah pawmaihdi zy chhao,

Rah-mâ hawh ama châ khai he zaw.

A châh thôhna bie he eima moh khiatala hla phithaipa hropazy ta ama tlô pha leipa he ano ta cha tlôpha ta, he hlachâh he uhthei viapazy palôh palie thei kaw awpa a châ. Ama meikiah zy lopa ta ama lochona daihti phapazy khô ha hrasala, ama satlia laihsa daihti chyu liata cha hmipha mo-ai achhih leipa ama châna nata ama huasua daihti phapazy ama vâ tyh hra zie a reihpasia thai kawpa ta ei pahno. Chyhsa ahyrai he hati via no daihti liata cha kaw pitloh hr’awpa angiatiah leipa ta hnabeiseina chhaota hmialâ sai tyh ei ta, châhrasala kô zy vaw hluh ta meikiah zy a vaw lo haw nata deikua cha ama thyudyu phana daihti zy vâpa ta ama palôh alie pakhua heih tyh.

Hezy he J.Vialua sâina lytlâh tawhta cha alâ pasia kaw ta, a saina lytlâh a luahpha hra leipazy châta deikua cha a hla chhao he reipachhuah thai awpa a ru tyh.Ano he râh thapasana hneilai kawpa a châpa vâta râh kyhpachâna hla a phipa thokha liata cha a phahnaingiah tuhna lâta â zawchapawhpâ ngâ kaw. A reihkah hmâpa chhao chahrâh ta ahyhmahta â padia hra leipa vâta a chahripa phuh chahri ta, vaw pasakhei paru ngâpa chhao ama y chili.Châhrasala vâ-ia lôhliena hla liata deikua cha a reisi ta, a reihkah â sohsi thai kaw. A hla “EI CHAW MOH PATHLEI HA TYH” tahpa liata a châh-nona ngâlâh lapapua tua sih la;

“Khydi lyubie hlâ tua sah la,

Aryh thai khao vei,

Lailâh hrozy pawlâh ‘D’ tluapa aryh khao vei;

Kei raihrao chhôhsolôh lia dei khâ na zârie cha,

Ei phuhlei nô nâ e, ei chaw moh pathlei ha tyh”

Hla liata cha “Kei raihrao nawhnai” tahpa nata “Ei phuhlei nô” tahpa zy hleikhôpa ta cha apanawh via heih nawpa biechho hropa y hlei vei. J.Vialua heta he reihkah zy he a hla liata hmâh hluh kaw tyh ta, he heta a hlazy he apatiahsa kawpa ta ei pahno. Hla nata bie liata J.Vialua chhaichhi tiah kawpa sâkha cha hla ao ngia ngâsâpa a tao thaipa he a châ. A hla-ao zy he Mara lôhliena hla ao hropa zy hawhta battery pahryuhpa hla ao châ leipa ta, a hla bie nata âhmie awpa hla ao tao thai ta, a hla ao he a tlâhpipa ta chapaw kaw ta, ahua ta, a thyu pha kawpa vâta a nahthlie ai âchhih lei kaw tyh. A love song hlabie he thyutlia reih a hmâh tarawpa ta uhthei viapa nata machâ viapazy palôh paliehna rakha ta hlâno hlabie nata reih machâpa hmâh pahlao thai ngâsâ ta, he he J.Vialua a maihdi kawna cha a châ.

J.Vialua he mohropazy hawhta Siaha khihpi â cha-iechahmy kawpa nata palopasah kawpa liata pahrâpa châ hra ta, chahrasala a hla phipa nata a hlabiezy he eima moh khiatala khipi pyury (Din of City) zy heta a pachâhna khizaw he patyhpamâ pha leipa ta, a kalihkathiana nata a lôhhawhna zy heta a palôhliena pangâ thei hra vei tahpa he, he ary liata a hla phipa biezy heta a reih pasia kaw.

KEI LA EI CHA HA TYH

1. Chô nohly nô vaw chhi heih ta.

Tlâh to ei vaw sai pachâh no;

Hnôhlâ ei vâ via tyh,

Tuhpi kali yru nô a khaih châh;

Raihrao kei la ei cha ha tyh”

Hnôhlâ zaizy ei vaw rohpady;

Chhôhso lôhlia rai za tlâh thei vei.

Chhôhnoh rylia rohpady châh;

Raihrao kei la ei cha ha tyh’

2. Châhvâ,nopi vaw chhih heih ta ;

Kaohreileina thâ ngiah laih na ;

Raithlih loh nawpa sai,

Meikiah lo ta hnazô tleih hrasa ;

Raihrao kei la ei cha ha tyh.

3. Khihliah khydi pawmaihzy sai laih na,

Lôhhia lyubie rei nawpa sai ;

Chhôhso lôh apasa,

Châhvâ,nopi, khihsua diati pasoh ;

Sai châh kei la ei cha ha tyh.

Hla pha ngâsâpa,Mara reih ngia ngâsâpa ta paryhpa hla hluhpi phituhpa J.Vialua he a hla nata bie mopa heta pyungiapa khizaw liata cha a ziza chahâpa he asâh ta a khichhai lei kaw. Love song a phipazy mopa heta J.Vialua he a yru tao awpa pahno leipa ta saphâvihtô a hniehpâ ta hla a phi chakhyhpa châ vei tahpa asia kaw. Mara love song phi thaipa hropazy hawhta hazo chôthlahpi khaihpa nata awhsicharu nô zy khita a palôh a palie tu leipa a lyu kaw. A hla mopa heta chô nohlynô vaw chhi tyhpa heta a palôh la via ta, thlihua naizualuahta ta apathlina tlâhpadâ nata tuhpi kali yru nô nata châhvâ raihnô khaihpa zy heta a palôh a palie kaw tyh tahpa he a hla reihkah tawhta asia kaw tyh.

Love song hluh via he cha lapinô a hnei tawhta a phipa châ ta, daihti khôchiehpa angiahna nata a chhaihna hla sai rô a châ. He a hlazy he eima ngiahnao pathu via khiatala yruziaru ta a phipa châ vei tahpa âpahno thei kaw. Ano tlaita â tyhpahnopa nata a siepahliepa hlazy châsala ângia chai. He a hla sakha he mo heih tua sih la,

AVYUH CHIAHCHI

1. Chhâkha thyu lia vaw laih hra baona,

Paw hawh ei vaw ly tua nô nâ e,

Thyudyu pawhna âraoh lei va,

Dyhchâ khô pheih na kiasai chi,

Ei rohpady ei khiahlô nâ lie.

Tahmâ lyubie paru naw hlâ chi,

Ei chhôhsolôh na za palie chi,

Khâpa lôhpi ma na phao tly i,

Vawkua ha mawh la,

Aryh thai khao vei,

Nawhly apyh pakhâh khai pi,

Avyuh chiahchi haw dei pawh khoh tyh va pi.

2. Dyhchâ khôpheih na kia no kha,

Bâhlia châ-ngieh ngâpa ei khoh ;

Aryh thai khao vei nawhhnai kei châ,

Vâ leipa hawh na khôsai chi,

Ei rohpady ei khiahlôh nâ lie.

3. Vaw kua mawh la aryh thai khao vei,

Nawhly apyh pakhâh khai pi,

Lyubie paryh heih mawh sih la,

Raihrao chhôhso chhâna a pasa aw,

Avyuh Chiahchi hawh dei paw khoh tyh vâ pi.

Achaneina liata tlâhkha ngâhlâh he moh sih la, naizualuahta ta “aryh thai khao vei” a tahpa bie hnôkyta liana heta chyhsa palôh pasasa awpa a kho leina bie nata mohropa aly n’awpa a pachâzie âvaw lâpa he eima mo pakhô lei awpa a pha kawpa ta ei pahno. He hlabie “Avyuh chiahchi hawh dei paw khoh tyh vâ pi” tahpa tawhna heta J.Vialua he liahpahlô palôhrupa phaohpa ta hlaphi vei tahpa â lâ kaw. Chyhsa hluhpi ta love song he hmô Rahabi lâlao khai ha pi ta, love song sa tyhpazy cha tilaipi saihpa chaka mâh leipa hawhta pachâna khachâ eima hnei tyh. ABBA hla sâkha liata cha “Something Good in everything I See” tah ta, ado sala â ngia kaw. Hmoto liana heta hmophapa khâpa tlyma he cha hmô awpa a y lymâ tyh. Love song he Krizyhpazy pi ta hmô sihryh lâlao ha pi ta, a biepa apha patlua zie nata thyutliapazy palôh apahnie theizie he pahno pha khao tyh ma pi.Khazohpa reithaina hlabiezy he love song bie tlu heta thlôh sala la atahmâ hlâ heta thyutliapazy palôh pahnie via sala ei pangiasa tyh.

A hla phipa zydua mopa heta J.Vialua he opychhikao buahta tawhta a kaw patawh ta hla phi tyhpa châ vei tahpa alâ kaw. Mara love song thokha cha pâhchhôh lâ miah paheihsa thlâhpa zy a y. “A chhâna taih na pasia la, kei chhao lôhhro ei phaoh hra aw” tahpa hla zy he lôhlie âchhi kaw tarawpa ta a heihpa y khao lei awpa lyu ha ta, “Vâsâhna chibai a bu laih ngâpa ei kho” tahpa hla ta atlâh pakyu heih tua awpa zy a byuh. J.Vialua hla deikua cha a chhaihna hlazy hmahta châ hrasala hnabeiseih awpa khâpatlyma chhâ cha a pahlôh lymâ tyh. A hla he pachawparaw tu leipa ta, a laothao kiahna taihta apanawh hra vei. “Keima Raihrao hâra viavi paw dei he” tahpa hlazy he bâh a reisi tu ha khiah maw tah awpa a châ.

“Lytlâh bypi na khôsai ha hra la,

Ei chhôhso lôh lia khô mâh va chi,

Sihnôh a vaw kua heih mawhna tah ta,

Kei la khâ ei chaw sai paza tyh’

Eima hla khochaipa zy he daihti khôh chiepa liata eima chhôhso keichheihpa reina hlazy hena a châ ama tahpa heta a chô liata hlachâh khi a chhopasia pha kawpa ta ei pahno. Rig Veda daihti liata hla sâkha cha “Ei nâ cha sâhdaihpa châ ta, ei pa cha Dawty a châ” tahpa hla châ ta, a hla he duah moh sih la hlabie pha kawpa nata hla phithai kawpa palôhruhpa tawhta apuapa hla châ vei tahpa âlâ kaw. Chahrasala kô hluhpi a khôh tawhta cha Rig veda dâihti nota chyhsa hrozie tlâhpipa kha he hla chyuhta tawhna heta athata amâ laichadai. Halleluia paw hlazy he atahmâ tawhta chhâ vaw y lymâ awpa liata cha atanoh ta eima khitlâh hro nata eima hrozie tlâhpipa zydua chho pachhuah lymâ tuh awpa avaw châ aw.

Ei bie khaw nawpa ta he bie nawraih kawpa heta J.Vialua he ei pathlie chanei………

Na thlôhchho nata Nôpih chhôhno opi ry liata laina khizaw khaihpa hmô awpa ta nawh hawh na vaw pih no kha ahy pahno hmahta hlao hra vei la, atahmâ sihnôh kua heih khao lei awpa ta na pihna Maraland hnôhchhy chi ta, Molâh khydi châ ha bâ awpa ta bôhzyu lytlâh na khôna daihti liata cha Maraland khizaw ta raithlih chhaota eima cha pathlie hi.

Na hnazô hmô awpa y khao vei hrasala, sopavaw hawhta lôhlie ta tlâhpadâ to na hryh tyhna Maraland liata na lailâhzy chhôhso liata deikua la paw hawh lo heih khao aw va chi.

Na hnazô cha tleihpa ta chhaoh-lei opi dâhrolo ry liata ti hawh loh awpa ta chhâzaw châta mokuh-rahmâ khaih ha hra la, na hla nata bie, na ao ngiapa nata pyungia totie paryhpa ta Mara râh nâ ei tyhna zydua deikua kha cha Marasaw chhôhso liata lo heih beih khao aw vei.

…Lôhiah leita ta khôh ma y …. Mâpha…… Maraland sopavaw.