Kyhpachâna!
- VL. Thakima Chozah
Chyhsapa hro liata hmo sôh chaipa nata eima hrona liahmari chaipa cha Kyhpachâna he a châ. Kyhpachâna he yleipa sala, eima pahrâna Khizaw he chyhsazy châta pahrâna tlâh awpa chhao châ aw vei. He kyhpachâna yzie pahno leipa nata asôhna zie pahno leipa sahlaozy heta chyhsa hrona sôh ngaitapa he nohcharei ta ama pahlei palô tyh he zaw! Kyhpachâna y leina su nata râh zy liata cha âthietuna zy, buabâna zy, tyhreina zy, â-isina zy hluh ta, chyhsapa hrona he khâpa sawhta saleina a hluh ngâsâ. Kyhpachâna ama pahno pasia lei vâta a châ. Kyhpachâna he kaonano nanopa ta reih thei awpa hluhpi a y. He liata reih eichhuah chaipa deikua la Satlia nata Laihsa likawh liata kyhpachâna a vaw pihpa he a châ. Kyh no ngâlâh ei reih aw. Ei thai viapa nata pahno viapa vâta a reihpa châ leipa na ta, ei palôh liata â vawlâ kawpa vâta a reihpa deita ei châ.
Satlia nata laihsa likawh liata kyhpachâna a vaw pihpa he khizaw liata chyhsazy mohmô theipa hry liata hmo ângia chaipa châ ta, satlia nata laihsa kyh apachâ kawpa nata âkhoh kawpazy eima hmôpa cha mo ama pha hleikhô ta, uava chhao amâ chhi ngâsâ. Achhâpa â hiahhri sih la, eimâ chhyna awpa la kyhpachâna sôh zie nata pha zie, ângia zie nata palôhtlâh âchhih zie zy eima reih chyu aw. He leipa ta ahropazy chhao reih awpa hluhpi eima hnei nata ei pangiasa. Satlia nata laihsa kyh âpachâ kawpazy cha ahy pabua leipa ei ta, pawpi hawhta ângia ngaitapa ta adaihti ta liata ama pawh kho tyh. Chavâta, satlia nata laihsa kyh apachâ kawpa nata akhoh kawpazy he eimâ hao awpa nata ama thâtih a chhiena lâta eima reih awpa châ leipa ta, eimâ lykhei kaw awpa tlao a châ hri tahna a châ chuh.
Chyhsa thokhazy ta mohropazy akhoh kawpa nata kyh apachâ kawpa, baota âkaopazy he moh khoh thai leipa ei ta, chhyh thai hra veih ei. Achhâpa la kyhpachâna sôh zie nata ângia zie ama pahno mâh lei vâta a châ thei. Chaleipa chhaota ama khonô tlyma khopaw tlyma amâ chhaihpa vâta chyhsa hropa, aly kawpa ta baota âkaopazy achhyh thaileipa chhao ama châ thei hra. He hawhpazy chhao he aki leina Khizaw liata a pahrâpa eima châpa vâta hmo y theipa sai a châ hra tahpa deikua eima my awpa châ vei. Chyhsapa zy pi he eima vaw pih dyu tawhta hiatliana nata aohraohna ta a biethlu thlâhpa châ tlôh pita!
Kyhpachâna he reipasia âchhuah sih la, chyhsa tota ama pahno pasia thai thei n’awpa ta reipasia khai thai a rupa a châ. Apachhoh chaina zie ta, mo pano likawh pazaotuhpa âzaona ri peimawh chaipa a châ tah sih la eima tah chhei tu nata pangiasa va na. Satlia nata laihsa a vâ-ia kawpazy chhao he kyhpachâna ri ta amâ pazao leipa khiata la nôpi-nôva atao hmeiseih thaipa châ leipa ei ta, amaochhie raihriena nata adyhryh leina saita a biethlu thlâh ha tyh ei. Kyhpachâna he mo pano likawh pazaotuhpa âzaona ri a châna hawhta Khophei chô liata thluahruapa ta kyhpachâna he pasia thaipa châ leipa ta, mothli nata bie ta pasia thaipa chi chhao châ hra vei. Kyhpachâna cha eima chhôhso palôhru liahmaripa tlôkhu zydua he hnei khaipa khota, palôhrupa atlua tyh. Kyhpachâna chata eima palôhrupa pahnie ta, eima pachâna palôhrupa nata rurie nata lathli zydua asiepahlie khai ha tawhta chhaota eima palôhru liahmaripa liata a châh ngâthlâhpa tlai he a châ Kyhpachâna cha.
He hawhna heta pachâ tua si. Kyhpachâna he hro âpie khaina (full surrender) he a châ ama ta tyh. Âdo tlai. Satlia nata laihsa thokhazy ta nôpi-nôva châ hlâ tawh chhaota chanô chapaw châna vaw hmâ hlâpa he âpie khaina hawhta pachâ ei ta, kyhpachâna pasiana hawhta ama pachâ; anodeikua vaw châ hlei vei. Sapa hiatliana nata chanô chapaw châna, khona hlaopatlohna deita a châ hri. Tahmâ ta kyhpachâ kawpa hawhta na pachâpa kha chhie chaina duahmo liata âvaw duah haw sala. Pamosana ta pasana vâta a ie-pazo pathai byuhpa ta chalyu chabâ abyuh na daihti liata kyhpachâ kawpa nata daodyu kawpa ta na mohôh lymâ thei tlai aw ma? Pachâ pasia abyuh hmeiseih ta tyh? Chavâta Marasaw satlia nata laihsa chhithai ngâsâpazy nata châthaipa sahlaozy ta eima thyudyuna daihti liata kyhpachâna eimâ pasiana ziezy he eimâ mohpasia via awpa abyuh.
Kyhpachâna eima rei tita eima my beih lei awpa, eimâ thei parei thlâh ha awpa cha ‘âpahnokheina’ or ‘âpyhkheina’ (Mongyuh nah ta Compromise ama tahpa hi) hnei raihrie theina he satlia nata laihsa likawh liata kyhpachâna ri apazaotuhpa peimawh chaipa a châ thota kyhpachâna ri apa-i-satuh chaipa chhao a châ. Chyhsazy pi he eima vaw pih dyu tawhta hrozie nôchâ âlyu leipa, pachâ dâh nanopa a hneipa nata khozie nanopa ahneipa sai eima châ. Nôkha chhi tawhta apihpa, unawhpazy chhao tlai heta ama pachâna nata khonazie alyu thai tlâ vei. A yzie cha, a laihsapa ta hlasapa nata lâsona lâchhâh pahâhsa kaw sala, a satliapa ta a laihsapa pahâhsapa nata pasâhsapa zy he pahno khei thai leipa ta, khâpa sawhta a sathai leipa khiata la satlia nata laihsa likawh liata âkhohna, avâna nata âtlaichhaina hmeiseihpa pih thai aw vei. Eima rei ha chiehpa hawhta eima khopa nata pachâna zy he ânano khai hapa vâta hmoto eima taona liata âpahnokhei thaina nata âpyhkhei thaina hnei lymâpa abyuh tahna a châ chuh e. Âpahnokhei thaina nata âpyhkhei thaina y tua leipa ta satlia nata laihsa likawh liata kyhpachâna ri pazao thaipa châ vei. Hmo y theileipa hawhta pachâ theipa chhao a châ. Chavâta satlia nata laihsa zy pita hmoto eima taona liata âpyh dâh thaipa nata âpahnokhei thaina hneipa he a peimawh chai tahpa eima my awpa châ vei. Achhiena lâ châ leipa ta aphana lâta âpyhkhei thaina he hnei awpa a châ.
Mara satlia nahzy pi eimâ pachâ pasia via awpa abyuh. Mara laihsa nahzy ta maniah ama tlaichhai thai leina chhâpa nata vâ maniah ama ia thaileina chhâ chaipa sâkha cha satlia nata laihsa likawh liata âpahnokhei thaina eima hnei thaileipa vâ heta a châ chai tyh. Mara Satlia nahzy pi he eima chyhsa châna, hrozie nôchâ, hmia hnazo phaozie nata hmotaona zy liata la chihropazy hlâta eima pha via chai hri khiah maw tah theipa a châ. Hrozie chhie kawpa nata sahrao sahrâ kawpa ta va rei ngakaw awpa y lilâ mapi. Anodeikua! Khâpa vâta Mara laihsa nahzy hmiakô liata Mara satlia nahzy pi he a iah thaileipa mâ eima châ? Mara satlia nah la sia kaw taraw ei ta, ‘anodeikua la’ maniah ama tah thlâh ha chhyhna chhâpa hi pachâ pasia tua si. Keimo Mara satlia thaileipa tlai châ vei ma? Mara laihsa nah he chanô ama châ vâ leikâ ta eima maochhie ngâthlâhpa he hmodo chaipa a châpa ta pahno va na. Âpahnokhei thaina hneina kyh liata bâh eimâ phahlapa ha chypa vâta a châ hi.
Laihsa nahzy chi khata Mara satlia nahzy pihe Satlia nata laihsa likawh liata âpahnokhei thaina a hnei thaileipa eima châ eimâ tah vâta hrohrâ ta maniah maochhiepa ta maniah mopahnai chakhy thlâh ha khu vy. Mara Satlia nah he khizaw satlia hry liata Mara laihsazy châta vâ-ia awpa nata avahpa châta tao awpa chhaota apha chaipa eima châ hi. Eima mahnô mahpaw daihti no tawhta chhaota he hmo he hmodopa a châ. Eima zyhna Châbu, Khizaw liachhao ta Châbu sôh chaipa nata pha chaipa ta ama reihpa Holy Bible lia chhaota eima chipho heihpa cheingei nôpi novah âhneipa a sôh zie nata pha zie pachosapa a châpa he. Mara satlia nahzy hmiakô liata palôh yna nama hnei tyhpazy he duah âmo pasia via hra tua u. Chipho hropa satlia hmiakô liata na châta tao awpa, na khozie nata pha tahna zie na reih ngâhpazy kha Mara satlia nahzy pi he paveihpa hneileipa ta a sia kawpa (frank) ta maniah chho ngâh bâ hra tua u. Namâ pangiasa papha leipa hlâta Mara satlia nahzy pi heta âpahnokhei thaina nata kyhpachâna eima hnei pathu via syulyu aw. He cheingeipa hela ei rei ngâh. Mara chapawzy pi he eima mahnô mahpaw chhâ tawhta chhaota chanô duahmo cheihchalo thaipa nata papeimawhsa thaipa eima châpa he Mara chanô nahzy chi heta nama my tlamaw aw tahpa ei chi kaw.
Mara laihsazy sai u, apachâ pasia via hratua u ly. Mara satlia nahzy pi heta eima cha tlaichhai muarua mâ my. Chihropa satliazy bâhlia cha-aopa ta khihpi ngiathliahzy hrypa ta Restaurant, Park, etc. zy liata namâ palypa-uasapazy eima chahmô tyhpa he Mara satlia nahzy pi heta aru lâta eima hâh charie pita, eima ‘Blood Pressure’ taihta maniah nama pasâh khai ha tyh hi. Cha apei bâtu châ! Hy laihsa y, Mara satlia nahzy pita nama châta eima tao theipa nata hneichhôhpa la khizaw sôh nata hneirôna zy chhaota a chalei theileipa kyhpachâna cha hneipa ngâlâh he a châ. Nama chô liata palôh eima phaozie awpa nata pachâna zie awpazy he nama yzua ta pachâ tyh hra tua mu vy. Mara satlia thatlô bâseihpazy pi heta Mara laihsa nahzy chi he chi hropazy (a eih viapa ta Tlaikaopa nata Lai zua) hlâta cha tlaichhai via pita, eima chhôhso liahmari chaipa liata chhao nama y chai.
Achhâ chaina liata cha ei viasa lôhkhy zydua saih u, hneirôna zy, sapa âtlaichhaina zy, hnazô tliatlâhpa ângiana nata phana zy ngâlâh chadai/moh thlâh leipa ta kyhpachâna dopa he tlao tlua chyu hri suh vy.
