Napolean ta Josephine hnota a châpaphaopa cha…

Riahpaw, machhyu-mahrâpa nata adyuhna liata lathliphapa ta ama reipa nata ryureituhpa, a chyhsazy ta ama chi kawpa nata a phei sâkha lâ deita a chakâpa hmahta Europe râh khophie a chalyusa thei ama vaw tah tyhpa, French General, Napolean Bonaparte (1763 - 1821) he a thâtih eima thei tyhpazy cha adyuhna natakhizaw pabuatuhpa tahpa ta eima thei hluh via thei ngyu tlai aw, hmo sâkha eima pahno hra awpa deikua cha, châpaphao awpa a rothai patluapa a châna he a châ hra. A thâtih reituhpazy ama reina zie liata a hronoh chhôh liana khata châpaphaopa 75,000 hlei tlai vaw roh ta, he hry liata ahlu viapazy he cha a lahpinô khohngaitapa, Josephine nata amâ hnei hlâta nata amâ hnei tawhta a paphaopa sai rô châ ta.Atahmâta eima vaw palâsa awpa he kô 1796 liata Josephine nata amâ hnei hlâta liata a châpaphaopa a châ. He liana heta machhyu-mahrâpa nata riahpaw lôh-lai hmiphaopa nata alyupa Napolean chhôhso hmeiseihpa liata hmo a ziepa cha na hmô thai cheingei tlai aw.

“Paris, Di,1795

Atamy la Chhôhso liata nâma rohpadyna biepakhô ngâna chôta khôphei chô thyusai na ta. Zâhnia zâlâ nohtlapa ry liata ai lei kawna chôta na kiah liata daihti ei hmâna iahzai chata na sâhmia rohpadyna mothlaw lia pachâhsa ta,cha chata ei pahnona zôh nata zâhzy he patypamâsa lei thei tlai vei. Khochhih, phapatluanô Josephine y, ei pachâna palôh liana heta khâpa iahzai ta mah eina zai ha chi tly! tah aw sala na lôh cha pahiah vana ta tyh? lôhhrina ta a vipa na sâhmia kha la na patyhsa khao aw va chi ta tyh? chata leipa ta na khiahlô ma tlao arôh ha ma?... ei thlahhmi he nôpona vâta pasa tao ta, nâma vâta ei chhôhso heta lôhkipa ta apahâna noh hnei vei mâ my; châhrasala, na chhôhso tawhta nata na chanô hmao khochhihpa , chhôhso peirâh na patlôsa tyhtuhpa nata kyhpachâna chhaopamei na kâ khai ha tyhtuhpa na pietuhpa liana khata kei châta hmo khochhihpa za y via thlâh ha chyh aw vei mâ? Zâhnia zâ liana tlai khata na na sâhmia hnazô ramâ lâta ei tyhpa khata, nâma hmeiseihpa liata khochhihna khophie phie pachhuahpa chhao palâhâh vei tahpa ei vaw pahno papua!

Thlaita sâhmia eimâ tyh heih sy..

Cha hlâ via cha, Khochai, mâpha chyh sy (mio dolce amor,) ei sâhkha hlei cha syh thei awpa ei khoh; châhrasa,nâ ta la na syhpalie kha y, ei thisaihzôh he mei hawh pa-ia heih tlô aw chi.”