Marapa ta vaw pih na ta, Marapa hro ta hroh na ta, Marapa ta ei thi aw

~ Machâ Dr S.Hrachu

Kô 1910 rachhôh liana khata Chhaolô khih liata chapaw hâti mochao chiehpa ta vaw pih ta. A moh cha Râhkhu Lâhvâ châ ta, vaw lai via lymâ ta, kô sythôh hlei taihta hroh ta. Mochaopa châ hra sala, pahnotheina, ku ta hriapa ta rahvawh chhao thairi châta apha awpa nata pha lei awpa a ku ta pathâ ta a chhaw hlâta apahno theipa a châ. Theilâpa kô chhao a kô liata hriapa ta apathei nata pathei leipa a pahno thei lymâ hra. Dawhkiah-zy, Bokai-zy nata Aphieh chhao a kyh thai khai thlâhpa a châ. Ku ta a hriapa maih cha a sa thai leipa y vei tah thei awpa he châ ta. Ku ta hriapa ta a pahno thei leipa cha, ‘Rôh’ he a châ. So kaw ta, bierei awpazy he a pahno ngaitapa vâta a kiapâh liata ypa chhao thapaw apachhihsa kaw tyh hra. 

A so kaw tarawpa ta,soleina a pathu kawpa ahneipa sâno duah vaw nahthlie tua sih y. Nohkha cha lyurâhpa Rôraw chaih byuh kaw ngyu aw ta, sahria liata tâkô apasâpa, ta rôraw lyu awpa ta lyurâhpa lâ cha sie ta. Râhhmâh thothih liana chata rôraw kô tluapa ta râhhmâh thokô zydua cha a patypa ta pathâ laih lymâ ta. Rôraw kô kha, a chyhta a patheipa he pathâ pasu chho ta, a sahria liata tâkô pasâpa ta kiahnao ta. A chiah liata a tyuhpa ta, a thei hluh viapa chiah tluapa ta pathâ lymâ ta. A chhâna lâ liata cha a chiah laipa kawpa, a pathei hluh via chaipa cha thlâh awpa a chhuahpa ta thochiah cha vâ hli ta. Atyuh n’awpa liahsa a paryh khai nahta a chiah lâ cha atyuhpaliepa ta a kôpi lâ aheihpa ta rôraw chiah cha a chai lymâ ta. A chhawh pachhô nata rôraw chiah nata âraopa ta alei lâ ama tlakhoh lymâ ha. A lei liana cha ta za tlakhoh taraw ei ta, a tlana â sâhpâ hapa vâta a pasa tah kaw ta. A tâkô hra kha a za tlana liata khataih lâ ma a pazaw syulyu haw tahpa chhao pahno leipa ta,a rôraw chiah thlâhpa liata a thei chhao tlua thei khao leipa ta tâkô chhao hnei khao leipa ta, hnabeidy kawpa ta âvaw hrôziah laihpa ta o cha kuruapa ta zâlâ ta vâsâ tlô ta; a chhôhkhazy ta a thata ra chhiechhu ngâkaw ei ta, reih awpa a hnei khao leipa vâta a luh dei tlâ â khaoh ha bâ.

Eima râh liata chyhsa sopa nata nôpawpa, pachhaohtlâh ta eima hmôpa zy chhao he, so kawpa ta, a topi pahno hr’ei sala, Râhku Lâhvâ hawhta keimo tla n’awpa ta a chhawhkhâpa nata keimo byh pachhaipa ta sa a chazâpa eima y hôlô thyu hra aw. Eima râh liata O hmo / lyu hmo phapa zy Council dôveipa ta ngiachhie apachhisa kawpa ta hiah pi ta, maniah ama ngiachhiepa vâta maniah pie ei ta, cha cha eima râh chyhsa chhao a châ leipa liata a ru lâta zuah pi ta, eima râh kyh raita pachâ leipa eih a châ khai haw! Eima râh liata hmo pha viapa nata sôhdaoh-na awpa su pha viapa zy moh tua, Râhku Lâhvâ ta atâkô hneichhôhpa pazaw syulyu ha ta, a rôraw thei pathlapa hmôkha chhao padi leipa ta chyhsa hropa du pha n’awpa ta a châ khaipa hawh dei eima châ khai ha he zaw ! Kha su pha râh phapa zy kha Mara-pa ku liata avaw lie beih khao aw vei tahpa pahno tua ei s’u. Keimo pahnona tlâpa cha la, “Adâh khataih liata na y?” tahpa hawh deita la a châ ha bâ.

“Cha Râhku ngâ dâh cha la” tahpa eima hluh kaw thei aw. Râhku Lâhvâ he maochhiepa ta mohnao thlâh kha ei suh vy. Râhku ta thochiah a thlâhthlu thlâh hapa he so kaw taraw ta, cha deikua rôraw thei chiah hlâh hla awpa angiâtiah lei tupa vâta â tyuh n’awpa hmo yzie a pachâ hmâ khao leipa hawhta keimo chhao ei o, ei râh, ei sadôh, su nata hmo hropa chhao Council ta asaipa ta maniah pie ta, keimo hryuh byuh leipa ta, a thô kawpa ta eima zuah thlâh ha tyhpa zy he Râhku maochhie thei awpa châ ma pi la he ! Kha eima hmosôhpa eima zuah hapa vyuhpa ta hmo pha viapa a taopa cha zakha liata panozy chhâ eima y bao vâ ma!

Eima râh chhôh liata o hmo pha viapa zy, râh, su pha viapa zy, Siaha khihpi chhôh liata o hmo lyu hmo pha viapa zydua marôh, râh kypachâna rai rai a hnei leipa molâpa zy ku liata nata biehneina liata â pahnieh khai tlamaw awpa he thapasa â chhih tu haw. Buakha eima hmo khopa liata hmialâ samoh-sahlâh zy châ taihta ky n’awpa liata eima hnaoh khai thlâh hapa he noh hro la angiapachhipa ta eima bâh, a si ngâna taihta pazaw ngâ hr’ei sihla, Pilâ ta, “Ei ropa cha ei roh khai ha khaw’’ a tahpa hawh deita la eima châ ha bâ aw.

Eima râh awhbyh tie ta, buakha chhôh ngâlâh a ly n’awpa nata a thôh n’awpa liata molâhpa khina râh pha n’awpa nata râh kyhpachâna râi ahnei leipa, ano athôhna awpa dei apachâ thlâh hapa zy hnota eima pie thlâh hapa he a pei châimâh tahpa hlâta a peivia syulyu tahpa eima pahno leipa he puhpa Râhku Lâhvâ hlâta eima hru viana tahpa he âpahno tua ei suh u. Râhku cha rôraw thlai chaih awpa a byuh tu hapa vâta â tyu n’awpa su chhao pachâ n’awpa châh pahno leipa ta a tâkô pahleipa ta, rôraw kô chhao thei kha hma chaih leipa ta mo hropa zy aoh vei n’awpa ta ano hmâhchâh riethei vâsâ apazâhpa hawta keimo chhao O su nata râh-zy zuahpa ta, hnei khai hapa ta, ano hmâchhâh maniah O ry tlôh lâipa ta rielâ hawhta a pavia lai ngâpa ody khazie ma y ha pi vâ tly!? Marâ bieso liata ‘’Râh pazu hmâchhâh a bei ta na, O pazu a pho ha e’’ tahpa eima tlô ha bâ he zaw.

Eima O, eima lyu, eima râh liata molâhkhihtlaopa ta a zipa maniah châpa ha ta, keimo cha ama raihriatuhpa lâta alie ha pi ta, “Heta tao teh, khata tao teh, kha hawhta tao khâ……..’’ tahpa ta rapa ta chhohpâpa ta eima luh dei karôh karôh akhaohpa ta, eimâ heihpamaihpamyh ngâ kaw bâ bao’’

So bâ su vy. Marâ râh he ChôKhazoh ta manôh mapaw daihti no tawhna khata Marapa râh châ awpa ta maniah pie ha ta. British sawhkhâ chhaota Mara Beipa zydua hnota amâ bei n’awpa ‘râh’ rakhapa, ‘Tlâhchâ’ avaw pie khai hrapa ei a châ. Chavâta, Marapa a châpa maih zydua pi cha, he bie he eima Motto ta châ chyu thei sala, eima râh he aboh aw ta, chhâh vaw y lymâ awpa liana chhaota eimâ boh thei aw.

“Marapa ta vaw pih na ta, Marapa hro hroh ta hroh na ta, Marapa thi ta ei thi hra aw” tahpa ta.