EPILOGUE ~ By Kunal, IAS (Siaha DC parohpa)

Palietuhpa : Beihrosia Syuhlo

Samaw..

Marâ râh tawhta ei Blog hnôh chaipa awpa a vaw châ ha bâ. Phiapi, 2009 tawhta atanoh taihta he su lôhdu ngaitana liata Deputy Commissioner hawhta ei vaw y tawhta daihti pha kawpa vaw hmâh lymâ na ta. Mawrâh sawkhâ ta târi noh 1, Chhiepa, 2012 liana khata Secretariat lâ y awpa ta chôsu eina paryh ha tly cha, cha lâna cha thlaita ei pazao ha bâ aw.

 Khitlyna, Phiapi thlâpâ 2009 tawhta avaw thao hapa cha a vaw chhâ ha bâ tlai na! IAS Officer châta la, District avao tuachaipa he kypachâ tuachaipa hawh tlai ta vaw châ ta. Keima mo pakha châta a vaw châ via pachai..!!

 Hmalana nata hmahsiena chi nano nanopa liata thata avaw pahlaopahli hrapa ta, noh nata daihti khô ta sie chatlie ngaitapa chhao za thlie thei khao va na!!

He khitlyna heta hlaotloh ta thapawhna nata hlaochhâna daihti; thatlôpa ta hmahsiena nata thachhâpa ta hnôhsyna daihti; hawtipa hawhta hmoto pahnopasia ta a laichadai khohna nata uhtheipa hawhta pitloh kawna daihti hluhpizy vaw sa papua tyh ta. Hmoto a pahlaopahlipa tlai a châ. Thotlâh khih tly laihpa ta, ama kypachâna nata ly-uanazy, amâ hnawpa nata eima ryh-rao khikhâhnazy; khazy kha my thei awpa ta a hnia vei! 

Sawkhâna cha ti lopa hawhta châ ta, he he hmahsiena hleidy hnôh chaipa a châ tahpa reih thei ma pi. Cha hawh tlaina chata ei noh hnôh chaipa liana chata hmahla n’awpa saipa ta ryhraona chi nano nanopa, Thohna-O tobi via n’awpazy chhao pachâpa ta y hai pi ta… Cha no tlaina chata pangiasa leipa ta  thata apahlawna chôta he bie he (pasiena châhna) dao na ta; Sawkhâ, kei liata â pahniehna deikua ta thata a ngâna tlao eina pie. 

He ti nah râh chakao awpa he Chô Hiavâ ryhraona tlai a châpa vâta ryhpaona, daihti huhiehpa nata athaotôna phapazy thlai ta hmâh thei awpa ta eima hmiata liata sopa ta a pha chaipa lymâ ta hmahla awpa ta biepie chyupa eima châ.

 Pahaona cha chyh-nawhpa châ vei….kao to liata hnôhsy chaipa châ pi ta - Chichei bialopa liata tlyma, achuna liata tlyma, lâthlôh azaona liata tlyma, Hnatlâna liata tlyma… Atanoh deikua cha Khazohpa ngiachhiena nata eima hria paraohna zawzi ta aleilô pizie eima thla thei taraw leipa ta hmahsiena duahmo, eima hriapapuapa liata deikua Mawrâh District hry liata Siaha District cha District pha viapa hryta â hlao haw tahpa apalai kawpa ta eima reih thei haw! 

Apalaikheitlâh châpa hmahsiena nata hlaotlohna eima papitloh hapazy ei pahnona liata za pachâpapua khai thei thlâh ha chy na ta…Lôdaw Lâpi zy, Ka-ao Hleidy zy, Khôpai khih liata Iahmaipa chariena khaw zy, Micro Hydro Power Plant zy, Thohna-O chhaichhi tobi viana zy, khihchhôh lâpi taopathipa zy, he leipa ta a hropa Hall, Tlyliah nata VC Court-O zy chhao. Achuhaipa thokha amâ chuna liata hlaotlohna ahmôpazy chhao apalaikhei hmeiseih hra na ta, eima HSLC result hmahsie via lymâpazy nata MPSC exam na liata Marâ saw atlypa ta ama y via lymâpazy chhao ei palaikhei ngaita.

 Hezy he hmo chyhpata hawhta alâ hrasala hmahsiena châta deikua reih tlâh châ ngaitapa, eima missionary zy hriapasana theilâpa, râh nata su chakipa liata ypa châ hraw’ sih la atanoh ta Marâsaw achuhaipazy a phana lâ sai lymâna chôta byhnâ ama topa cha a châ.

Hmo hluhpi hria awpa ei khoh hialiapa ei pathao hmâ khao lei awpa, Chichei bialopa, theilâpa mohôh nata tobi viana zy, Lyu tao nata Chicheina kyh cheihchalopa zy, ku raihria hmah pasiesa viapa zy, thyutlia kuzôthaipa hmahpasiesa awpa zy, Auditorium nata Indoor Stadium sa awpa zy, District Park padua awpa zy taihta hria ta a pha viapa ta taopathi ei byuh ngaita... châhrasala cha noh nah daihti ei hâdy kaw tyhpa deikua hra cha chhi thei khao tlô aw va!

Hmialâ daihti pha ngaitapa Marâ râh hmiata liana heta y ta, Marâsawzy ta daihti ryhraopa ta a awna cha ama patu thai thlyu nahta khâchâ ei ngiapâ. Ama patu thaipa dei châ leipa ta ryhpaona phapa cha âmosasyh châta athaotôna tôh bô ta paduana châta tlao ama hmâh thlyu nahta ei ngiapâ. 

Kaladan Multimodal Project, NTPC Hydro Power Project nata Project laipa hropa hriapathao haipa zy, Marâ râh hmahsiena kyh liata thata rai a hria cheingei aw.

 Look East Policy hmâpa ta sôhdaona thlai ta ama pahy awpa heta ryhpaona lai kawpa Marâ râh châta a pa-aw cheingei aw. He râh, Beinô lo chadôpa Marâ râh he a râh taozie ta a papipatlopazy ta su sâh viapa lâta â chhina noh hnei thlyu aw ta, cha noh nata daihti khochhihpa hmô ta pahnokheituhpa pakha châ hr’aw sala tahpa cha ei hmo khoh chaipa a châ zôzaw ha bâ aw!

Daihti khachâ rakha ma ei vaw chakao hapa, Maraland nata a chhôh liata pahrâpa manôh khochhih ngaitapazy, nama chi nata pho nôchâ hrozie pabohsa lymâna chôta vaw tlâh parei muh vy!!

Mâpha sy!