PACHI HLYCHHO THLAHCHHÂNA

~ Fc. Chhuasa.

Târi 19th Chhiepa 2015, Chutyhnoh zâlâ dawh 2:30pm liana khata Mara Writters' Club-zy pi ta, a tliata liata ‘Book Of The Year’ phuahna nata lymâ raina eima hneina saipaliena (Review) Meeting hnei pi ta, Pachi Hlychho, Secretary to The Mara Automous District Council Room liata he Meeting he hneipa a châ. Daihti chhâna liata Chairman Nôhro Hmôkô ta Mc. Pachi Hlychho cha thlahchhâna hnei awpa ta hrua ta, eima Meeting cha pachhâsapa a châ.

Dyutlai thai vei hr’aw sala, viasazy heta na khokhei kaw tyh ei ta, kheihawhpa Py-zy liata ma na vaw pahlao ha chhyh hra ei ta, chyhsa hmeiseihpapi hawhta nata athaisopapi hawhta Committee moh phaohpa lia heta ei hlao ngâthlâh ha tyh hra. A châhta chhochhi cha noh kha ta ei no Committee ei hlaona châhzy a y tyh hra cha maw!! Keimo lâ he cha eima biepathlupazy eimâ laichadai hoh thai leipa chhaota Committee â thaona nata chhâna lia he cha thlahchhâna ta pahy pi ta, akhaw lymâpa eima châ. Khazohpa ta tlâ avaw laichadai sa eima tah ha tly ma, eima biepathlupazy uasa khao tyh ma pi!!

Cha hawhta ei hlaohli chakhyh laih ngâthlâh ha hra vâna chata keima cheingei chhao he thlahchhâ awpa ta hruapa châ tyh hra na ta, Meeting liata thlah ama chhâ tyh dâh kha phie a vao ha na ta, a chapia chapô leipa ta ei patlo-patlâh thei thlâh ha tyh hra. Bâhta ta anano laih tyh hra sala , â lyu rô khai thlâh ha. Anodeikua cha, he Writers' Club Committee nota Pachi Hlychho thlahchhâna he la a nano patlua ta, ei pôhmi aduah khai ha ta, ei mothlih pua a pahna khai ha.

A thlahchhâna kha â ki chochâ kawpa ta reih thei khao va na. He Point-zy deikua he la thlâkhaoh ei ngiana taihta my thei aw sala pangiasa va na! Khâpazy rimâ maw?

“Chârohtuhpa miah pie via mah y”

Tlai chuh, he pho heta chârohtuhpa a hnei chyh ngaita kaw dia! Athaipa hluhpi pua ha ei ta, asopa eima hnei hluh kaw bâpa tlai! Notla Marazy hry liata Chârohtuhpa achyhta hnei pi ta, kupahro thlie khi chhao akhi ei va. Nochhi Mara lâ chhochhi cha ama chyh via pâ lâlao heih.

 Khizaw râh hro lâta a ypa Marapazy hra ta âmo tao lei awpa chi ta ma ama pachâ ha ma? Magazine dâhdeipa chhao ama papuapa thâ thei beih pi va… ahy e eima reih Khazohpa ta miah a piepa heta châbu vaw roh hra aw tly?

Châbu he phopi Pachhih nata Kusadi châ ta, phopi cheihchalo ta, tobi ta, parônahsatuhpa chhao a châ. Cha hawhta a châ khiahta cha â ao awpa y leipa ta, â ky awpa chhao hnei hra vei, tahna a vaw châ. Pho hropazy hmia liata chysia chhie kawpa ta â duah hai tahpa pahnopasia ta, Pachi Hlychho heta a Khazohpa hnohta Mara phopi châta chârotuhpa a vaw hiah pâ ngâpa a châ thlyu aw. Râh kyhpachâtuhpa â tahpa, râh nôpaw â tah ta, phopi hyutuhpa hawhta apachâpa sahlaozy heta Mara reih châ heta thlah ama chhâ beih hr’aw vâ tly ma? Hmo byuhchhiah leipa hawhta ma ama pachâ h’aw vâ tly? Kei, kei deikua la, Machâ Pachi Hlychho thlahchhâna heta na pahra ta, ei palôh pahnie ta, a pakeichheih. Ei hiakhei lymâ bâ hra aw.

“Mara reih miah pachu lymâ mah y”

Atahmâhlâ ta eima bua chaina cha, eima châthaipazy taihta Mara reih ama thai leipa he a châ. Politician nah ta thai leipa ei ta, Pastor nahzy ta thai leipa ei ta, eima Officer nahzy chhaota thai hra veih ei.

 Hmeiseihta la eima zydua ta Mara reih he thai tlâ ma pi. Thokha ta English châbu-zy atlyh via ei ta, thakha hra ta Mizo châbuzy amâ tlyh via ha he zaw! Nochhi Mara nahzy chhochhi cha keimo hlâta paru via lao heih ei ta, Vaili mahpaw daihti notahpa hlâ khata bahta ta eima padypadi thai viapa deita he tlâ a châ chy. Eima hmahsiena he kô 100 a hlei ha tawh chhaota a dusaw kaw.

Nochhi Mara nata Notla Mara, khizaw Mara liana heta mara reih â do kawpa ta roh thaipa chyhsa pahrawh (10) ama y vâ ma? A, AW, B eima hneina cha kô 107 a tloh ha tarawpa tlai! Reih miah pietuhpa cha rei lei, RA. Lorrain hmia chhao eima kha thai aw ma?

 Pachi thlahchhâna he nawh kawpa nata hawti chhie kawpa hawhta pachâna a nao kaw. Anodeikua Marapa ta eimâ ngiah ngaitapa Khazohpa hnohta a hiahpa ta ei pahno.

Âthaona Bo 18:32 liata Abraha thlahchhâna nata Khazohpa ta â chhyna dâhzy kha ei na patheisa kaw! “Hy Abeipa, …… cha liana chata chyhsa 10 deita hmôpa vaw châ ha mawh sala? …… 10 vâna chata pahleipadia aw va na."

‘Mara reih do kawpa ta thaipa chyhsa 10 ama y khiahta la, Mara reih he pahleipadia khah y", tahpa ta thlahchhâ bâ awpa eima châpa ta ei pahno. He a thlahchhâna bie heta ei raokhaoh pamai ta, ei na pangiahmasa kaw!

“Eima râh angiaziezy rohpapua thai awpa ta miah bao mah y”

Mara chi nata pho, reih châta thlah eima vaw chhâ tyhpa chhaota Puhpa Pachi hmo hiapa cheingei he la tlô papha tlâ thlyu' aw ma pi. Atlô pasâh chaipa a châ nahta ei pangiasa.

Eima pahno chyupa hawhta England khu Liahpahlô tlâ châ ta, râh hropa hlâta â ngia patluana nata kho â chhih patluana y hlei vei. Anodeikua cha, English chârohruhpazy nata hlaphituhpazy ta pangiapali thai ha ei ta, tlô awpa miah pabyuhsa ta, hmô awpa eima byuh khai ha tyh. Cha hawhna hra chata Texas râh chawhpa nata tihnawh sôna râh cha, Cowboy phôh arohtuhpazy ta tobi thai tu ha ei ta, eima palôh miah palie ta, a thâh eimâ ngiah raolao ngâkaw tyh. Israel râh, râh chawhpa nata kho-iah rai ahnei leipa cha, Bible arohtuhpazy ta roh thai tu ha ei ta, keimo dei châ leipa ta, khizaw pi ta Israel râh cha avâ pasua pi ta, ngiapâna mothlaw chhâ ta tlô awpa eimâ chhuah chyu tyh.

Pachi Hlychho thlachhâna he a hlaotloh cheingei sala ei tah kaw dia! Mara chârohtuhpazy nata hlaphithaipazy ta he râh he ama tobi thai kaw khiahta cha, khizaw liata râh ngiabâhchhih chaipa lâta ama palie thei. Tobipa cha rei lei, eima râh angia zie he â khophie chhâ chho thaipa ta reih thai ha ei sih la cha, lei chyhsa chi to nata pho to tawhtapa pathipalôh he azao leipa y sala pangiasa va na.

 Eima râh thâtih chhao reih thai tlôh pi va…a chhiena lâ saita reih tyh pi ta, byhnâ eima dytha khai ha khiah maw??

Pei ei tah bao cha!!

Khaih aw…. Cha ei pahnona dadieh rimâ cha, a thlahchhâna kha a pahsi kaw taraw mâh my! Eina pahnie kawpa tlai ta ei reih pachhuah thai khao tlâ heih vei chuh. Pei ei tah bao cha!

Râh, chi nata pho châta thlahchhâna ei thei chiehpa zydua hry liata la chyu chai ta, â ki chai. Nawh chai ta, â sâh chai hra. Paro lei chai ta, a khaipahliena râh a kawh chai. Ei palôhrupa râh he nai zualua chai ta, eina suna dâh a pasa chai chy.

 Eima râh Politician nah 50 biereipa hlâta Pachi thlahchhâna chyupa heta râh kyhpachâna kyh liata na pahra via ta, eima râh theihthaipazy biereipa ei 100 hlâta Bâti châ khohna palôh eina pie via. A thlahchhâna nawh ngaitapazy kha phopi hawhta laiseih via ta, eimâ duapapua thei n’awpa ta Abeipa ta chyh-eih tlai sala, A Awnano Machâ pakha hiana kha Abraha hiana hawhta Khazohpa ta rie A heisai khah se!