Mara Phopi Paduana (Mara Nation-building)

- Rev Dr Laiu Fachhai   

Biehmia

Biehrai parohpa he a pha kawpa ta eima rei khiata cha, mopakha Khazohpa ngiapâna kyh hluhpi a ypa chhaota, ânuapa hluhvia zydua cha Izrel râh paduana (Israelite nationa-building) thâtih a châ. Israel râh cha ama chheipâh chi hropa nata râh hropazy taozie hawhta châ leipa ta, Izrel-sawzy cha Khazohpa china nata achhyna chôta, ngâchhihna, adona, tiamana, pathaihna, nata kyhpachâna ta hro ta ama râh cha ama padua awpa a châ (cf Biehraw Piepa). Hehawhta ama sie lyma khiata cha Beipa byhnâ to lymâ aw ei ta. Biehraw Piepa nata ryhpa nata biepie hropazy ama parao khiata deikua cha hriepa ta y aw ei ta, pahleipadiapa ama châ aw.

Daihti vaw sie laih ta, Izrel beizy nata a râhsawzy cha Beipa Khaozohpa nata a hla via laih lyma ei ta, moleina chi to rai ama tao pathao. Ama moleina hry liata miakha cha, abeizy nata molaipazy ta a râh zawpi cha tlybai ei ta, âmo kaw hneirô nawpa sai ama pachâ bâ. He vana heta biehneina achhupa ta âmo nata âmo a teina chhao thata a y. Abeipa khozie hawhta ama hro leina vata a râh nata a chyhsazy liata chhiena a vaw tlô thei awpa hrosopazy ta zikyu thata a râ ei ta, chahrasala hrosopazy zikyu arâna cha Izrel beizy nata zawpizy ta ama papeisa lei vata Asuria nata Babylaw râhzy hmâpa ta Khazohpa ta Izrel râh a parao haw. Izrelsawzy cha ama râh tawhta Asuria liata Babylaw râhzy lâ sei ta a chhipa ta ama y haw.

Maraland nata Marapasawzy chhao pi he Khazohpa paduapa râh nata chi eima châ hra. Chavata Khazohpa chi ta, a khozie hawhta hro ta, ngâchhihna, adona, tiamana, pathaihna, nata kyhpachâna ta eima râh-luhpazy ta zawpi maniah a chhi ei sala, keimo zawpizy chhao pi ta, ngâchhihna, adona, tiamana, pathaihna, nata kyhpachâna zy he eima hro châ hrapa ta, Mara phopi cha eima padua awpa a châ. Eima missionaryzy, eima Awnanopa nata khitlâh chhituhpa nata râh-luhpa hmiatuapazy ta hehawhta ngâchhihna, adona, tiamana, pathaihna, nata kyhpachâna zy ta maniah a vaw siekheipa vata Maraland nata Marasawzy pi he atanoh duahmo he eima kaw tlô tah si la, eima rei chhei na ta pangiasa vana. Chahrasala, a tlia tawhta deikua cha eima râh-luhpazy nata zawpi hluhpizy pi liana heta ngâchhihna, adona, tiamana, pathaihna, nata kyhpachâna hrozy he eimâ phahla kaw bâpa a lyu.

East Maraland (Myanmar Mara) lâ kyh chatlupo ta rei awpa pahno tu leipa na ta. Chavata he ei article he West Maraland (India Mara) ânua via chai. West Maraland liata party laipa miathôhpazy chhao a ma policy (achhuahna) cha a pha kaw sai. Chahrasala, keima mopakha hmô dâh ta cha ngâchhihna, adona, tiamana, pathaihna, nata kyhpachâna hrozy he eima râh-luhpazy nata zawpizy ta eima hnei lei khiata cha, cha policy pha kawpazy cha hmâ thai awpa chi châ leipa aw vei. Eima râh liata ei y leina a rei tu hapa vata eima party laipazy policyzy a kichaipa ta pahno khai thei leipa ei na ta; khih-liah liata ei theina rakha hawhta comment vaw pie tua sala.

Mara phopi padua awpa ta West Maraland liata party laipa miathôhzy Policy-zy :

1. Congress Party

He party he eima râh liata cha party hlô chaipa hawhta pachâpa châ ta, amâ chhuahna chaipa cha “Direct Finance” a châ ei aw. Cha yzie cha District Council eima châna ualua ta heta y ta, Mizoram sawhkhâ siepahlie leipa ta Maraland châta sôh cha Central Sawhkhâ tawhta direct ta MADC lâ kaw patlôsa awpa he a châpa ta â lâ. Chahawhta Direct Finance biehneina to khai tawhta UT cha azyh azyh ta rei laih awpa achhuahpa ama lyu. Atahmâno ta India sawhkhâ siezie mopa ta he he, hmo thei leipa a châ leipa chhaota, hmo ru ngaitapa a châ ei aw. Mizoram sawhkha blessing (pasaina) a ngiah thlyu aw ta, cha cha Mizoram sawhkhâ heta maniah a pie khoh na ta pangiasa a chhih vei. Congress heta MADC liata sawhkhâna a tao tyh nona kha Mizoram nata Central liata chhaota Congress sawhkhâna taona nata a chhyhna daihti vâropi vaw y ta, chahrasala Mizoram congress nata Central Congress zy chhaota MADC liata “Nehru Plan” hmâ awpa tlyma, “Direct Finance” hnei awpa tlyma he chatlupo ta maniah ama khokheipa ta a lâ vei. Atanoh taihta he hmo he a hmeihseihpa ta hmô awpa y mâh vei. Hmialâ daihti kheihhawhpa liata ma cha eima hmô thei awpa ta hnabeiseih hualua pachhi si la.

2. MNF Party

He party he Mawrâh liata cha a thatlô kaw ta; Maraland liata chhao a tha a kaw tlô pathao laih hra. Mawpa châ tlôh leipa ta Marapasawzy ta he party liata ama pahâna chhâpa hehawhta châ sala ei pangiasa. “Mizo” tahna liana heta “Mara” chhao eimâ tlôh hra. Marapazy chhao pi he a kawh viapa ta cha “Mizo” eima châ hra. “Mizo” heta Marapazy, Laipazy, Chakmapazy, Luseipazy, Hmarpazy, Paitepazy, etc, etc, a pahly khai, tahpa he amâ pyzie châ sala ei pangiasa. He pachâna he âdona kao a y hra. “Mizo” he chahawhta Chin-Kuki-Lushai chipathla zydua kha pahlysa khaipa a châ khiata cha keimo Marapazy pi chhao cha Mizo eima châ hra. Chahrasala, Lusei reih a cheihpa thokha ta Lusei reih a cheih hra leipazy pi Mizo hmeihseihpa (Mizo diktak) hawhta maniah ama pachâ leina daihti a vaw y pâ tyh tita deikua a vaw lalao pâ kaw tyh.

Marapasaw MNF party liata a ypazy ama policy cha hehawhta châ sala ei pangiasa. Direct Finance tlyma UT tlyma he cha eima hmô tlai aw ma, khatitama eima hmô aw, tahpa sia tlôh leipa ta; Mizoram sawhkhâ hra heta sôh lâ chhâh ta Maraland lâ he maniah rie kaw tyh tlôh ei ta, chavata Mizoram liata sawhkhâna ataopa party, MNF party he, eimâ hly hra khiata cha Maraland châta hmasiena sôh thata eima pahyupaly thei aw, tahpa ama policy a châ ei aw.

Congree-nah motto cha “Direct Finance” vaw châ ha sala, MNF-nah motto cha Mizoram sawhkhâ hmâpa ta “Development for Maraland” a châ ei aw. MADC liata MNF sawhkhâna ama la nona kha Mizoram MNF sawhkhâ tawhta sôh Maraland châta thata â khy ma, tahpa deikua, ei rei hapa hawhta kei cha eima râh liata ei y leipa vata pahno leipa nata, he châ areihtuhpazy ta nama pahno via aw. Atahmâno he MADC cha MNF sawhkhâna tlupo hawhta pachâ theipa châ ta, development sôh cha Mizoram sawhkhâ tawhta thata â khy awpa ta hnabeiseih hualua pachhi heih si la, â khy ti chhaota Marapasaw – sons and daughters of the soil – zy cheingei ta eimâ thôhkhei cheingei awpata hnabeiseih hra si la.

3. MDF Party

He he Maraland liata cha party thie chaipa châ ta; ama motto cha Maraland châta Union Territory (UT) a châpa a lyu. District Council biehneina rakhata heta la Maraland nata Marapasawzy abohna nata hmahsiena khi tloh hmeihseih vei. Chavata keimo tata ryu areina UT he eima hmô patoh bâ awpa â ngiah, tahpa policy heta Marapasawzy maniah sypa ta maniah a vaw pahnie kaw ei aw. Party thieh chaihpa hâh liata cha he policy a hlyheipa Marapasawzy chhao ama hluh kaw. Chahawhta thapawh â chhih kaw nota, rei hmo pyly ta, UT chhao he Mizoram sawhkhâ blessing leipa ta cha India sawhkhâ heta chahawhta nyutata maniah pie thei hra aw vei. Mizoram sawhkhâ ta maniah a khokhei tlyma khokhei vei tlyma, India sawhkhâ ta maniah a pie khoh tlyma pie khoh vei tlyma, tahpa cha kao nanopa ta vaw châ ha sala, Marapasawzy pi UT eihpa ta y awpa ta ao nata reih parosapa cha Maw biereisa ta a “awm” kaw bâpa tlai a châ. Keimo chhâ liata eima hmô leipa chhaota eima samoh-sahlah chhâ liata chhâ cha hmô thei awpa ta hnabeiseih hualua si la.

Hehawhta UT motto ta ahneipa MDF luhpazy heta UT he ama palôh hmeihseihpa ta amâ nua ma, Marapasaw nohhâh (dignity) y nawpa nata hmo pha hmô nawpa a châ khiata cha riethei tao hualua ta hmialâ hmo pachâpa ta atahmâno he cha ky chy ngâhna taihta amâ pie khoh ma; Marapasawzy chhao pi ta sôh nata châna lâ chhâhta chahawhta ky ngâhna taihta UT cha eimâ duakhei khoh ma, tahpazy deikua he UT reikah a parosapazy ta âmo mopakha palôh-rupa cha amâ pahno chai chyu aw.

Mara phopi paduana

Khazohpa a pahnopa nata Khazohpa ta a pahnokheipa Mara phopi paduana (Mara nation-building) he politics dopa, Mara zawpi, lyuchâ pastor, Machâ, Khihchhôh Machâ, KTP, KNP, KHP, nata KPP zydua chhao taihta eima pahâ khai awpa â ngiah. Ei rei hawpa hawhta keima mopakha hmô dâh ta cha, he achô liata palâsapa party laipa miathôhpazy heta ama policy cha pha kaw chyu hra sala, eima râh-luhpazy nata Marapa zawpizy pi heta ngâchhihna, adona, tiamana, pathaihna, nata kyhpachâna hrozy he eima hnei lei khiata cha he policy phapazy heta khâpa râh hmâh ta maniah tlôkhei aw vei. Ngâchhihna, adona, tiamana, pathaihna, nata kyhpachâna hrozy ta hro ta Khaozoh china chô ta eima sie ha khiata cha atahma ta eima MADC biehneina rakha ta nata eima râh leilô hneirôna rakha heta aduana khi cha a tloh thlah hapa ta ei pahno. Mizoram sawhkhâ nata Central sawhkhâ panyupapâ ngâ kaw byuh leipa ta Marapasawzy ta developmental private company nano nanopazy padua thei pi ta, India nata foreign lâta private company zy chhao Maraland liata investment vaw hnei awpata eima hrua thei hra. Chahawhta India nata foreign lâta private company laipazy ta Maraland liata investment ama vaw tao khoh thei nawpa nata ngâh thei nawpa ta cha, Marapasawzy pi he  chyhsa ngâchhihpa, adopa, tiamapa, pathaihpa, nata kyhpachâna ahneipa eima châ zie maniah ama pahno awpa â ngiah. Eima râh liata MADC sawhkhâ chhao a steady awpa â ngiah hra.

Party laipa eima hneipazy policyzy cha ama pha kaw sai. Chahrasala, he policyzy deita heta Malarland he hmah pasiesa leipa aw ta, Mara phopi he padua thei hra aw vei. Policy phapa cha ngâchhihna, adona, tiamana, pathaihna, nata kyhpachâna hrozy ta a pazi lei khiata cha a hlaotloh thei aw vei. Khazohpa china chôta ngâchhihna, adona, tiamana, pathaihna, nata kyhpachâna hrozy ta hro hana liana heta Maraland hmasiena dopa nata Mara phopi thatlôpa paduazy cha a y.

Khazohpa achipa, ngâchhihpa, adopa, tiamapa, pathaihpa, nata kyhpachâna ahneipa Marapasawzy vata Mara phopi cha a duah parei sa la, khizaw liata a chaluah bâ mawh sy!