Mylâ Khochhihpa nama vaw hnei thei n’awpa ta

 - Robert B Syuhlo, Siaha

Kô 1297 châ ta, Scottish pasaiphazy cha adyuhna chhaichhi  ama hneichhôhpazy nata maluh amâ pakhy thei tlakaihpazy chhaota England Beipa Edward I pheisaihzy; pheisaih amohôhna dâh dopa nata chariah chhaichhi phapa torai, a daihti liata cha, ‘he hleikhô he la’  tah thei awpa ta tobipazy nata ‘Sterlingbridge’ ama tahpa su liata ama liahritlona râh, Scotland hmialâ daihti nata ama chhichâ n’awpa pasiapanô awpa ta a hmiachhy hai ei ta. Ama râh hneichhôhpa , ama liahritlona nata khotalaipa ta ama laizaolaona râh cha chariah ku lia siesaipa ta, chariah hmialia ama dua/hnôhsy aw tly ma? ….

         

          Scottish satlia hrihryh liana chata adyuhna liata thina saikao sao chi â chhih zie vaw pahno hapa nata zaozi nata seichhi hmiachhypa tan oh pakhôsa rairuzie nata chichhihzie apahno hapa ama y chilih nota, thina saikao cha rei lei, sa thisaih dâhdei hmahta apaloh mâh leipa nata nohkha noh liata pazu-pavaw sâpa pyu dâhdei hmahta apahlaw awpa chi chhao ama y hôlô hra thei ngyu aw. Lâpaw tawhta avaw saituhpa châta cha ama chhaichhi nata ama pôraoh tawhta hmahta , “ Um,..England pheisaih sahlaozy hao ta Scottish satliazy hao nôhchhie ta ama nôh tlai hu..”  tah lei thai rimâ awpa châ leipa ta. Kyh totie liata âpahlie ei ta, tiahtuhpa duahmo to awpa ta la Scottish satliazy cha ama dahdie tu ha nah tah lei theipa châ vei ei.

         

          Châhrasala, Sterlingbridge adyuhna liata pahniena totuhpazy deikua Scottish satlia dadiehpa sahlaozy tlai he châ ei ta, England pheisaih phapazy nôhchhie ta a nôhtuhpazy chhao âmo tlai he ama châ hra. Kheita rimâ e he sahlaozy heta tiahna to theilei awpa hawh tlupo ta pachâpa to ei ta, kheita e ama hmiakô liata chariah tiah thei lei awpa hawh tlupo ta pachâpazy cha Irupa hawhta ama papaih pahlyusa khai thei thlâh ha tly? Khâpa hropa vâta châ sala a ngia vei, Scottish satliazy chipa nata a chalyupa ta ama y thlâh ha nota râh kyhpachâna dopa paphaosa ta, ti nata râh châta hro hlâpa tluta rônahpa y vei tahpa biedopa atutuhpa, William Wallace biereipa vâta na a châ tah lei thei thlyu ma pi. “ Atanoh he eima hrona cha miah ama lapa thei ngyu na; anodeikua, eima khotalaina he la miah lapa chacheita aw vei” tahpa ta Scottish satliazy china vâta palôh dua pathao hapazy nata sihnôh kua byuhna a hnei pathao hapa apasyutuhpa reihka tlai hena pahnie theileipa pahniesa ta, tiah theileipa patiahsatuhpa cha..

         

          American satlia Nathan Hale cha America ta British tawhta khotalaina a tei hai nona khata satlia dawpa, kô 21 ta uhtheipa châ ta. A liahritlona râh khotalaina a hmô thei n’awpa ta thina meihdo hry liata chareipa a châna ziezy pahnolei apachâpa ta, America ta khotalaina noh khochhihpa a hmô hra thei n’awpa ta helamaw a hriatuhpazy hry liata apahlao pahli hra ta. Châhrasala, New York khihpi liata British chariah teikhâ n’awpa dâh pachâ pahmaohpa ta amâ hmô pakhy hai nota patupa châ haw ta. He hawhpa daihti liata British sawhkhâ adyuhna zieta hmah alapa hriena cha “Thina” a châ tahpa cha hmo sia thlâh hapa a châpa hawhta satlia Nathan chhao cha ‘Pa-aosao awpa ta a chôchâh pachâpa a châ haw’. A thi n’awpa su ngaipa ta, Pa-aosaona daosâhpa liata amâ vy khei nota a biereipa, “ Ei liahritlona châta hlâ awpa hrona sâkha ngâlâh ei hneipa hena pei ei tah chai” tahpa deikua chata American zawpi thlapalôh ta, ti nata râh châta a pie pasaina a papôhsa via rilipa a châ.

         

          Adyuhpi ei 2-na daihti châ ta, Japan chariahzy cha tilaipa hawh tlaita ama hmiakô liata za pahnie lymâpa ta India râh maw nochhi liata a ypa Kohima chhao ama za hria pathao haw. British sawhkhâ cha a thlazoh ta, Japan ta Kohima ama la tlai khiahta cha ama duahmo awpa cha a chhie ngaita aw tahpa cha ama palôh liata sia thlâh ha ta. Chavâna tlai chata pheisaih pha chaipazy tuahpa ta Japan chariah cha ama chatôh ha hrapa a châ. Pheisaih riahphazy riahphana nata hriapasana vâta Kohima aboh ta, India chhao â boh ha hra. Châhrasala, Kohima adyuhna tawhta khizaw ta apahnopa nata â thei ngâthlâh hapa hmo deikua Japan chariah lai zie tlyma British pheisaihzy riahpha zie tlyma châ leipa ta, râh kyhpachâna  hmeiseihpa palôh a phaohpa pheisaih thlâhthlipa pakah tawhta kaw puapa bie, “ Sihnôh kuapa ta liahritlona râh nama kei tlô tita la, nâmo châta mylâ khochhihpa avaw chhi thei n’awpa ta atanoh ta eima hrona he eima vaw hlâ haw tahpa ta lyubie va hlâ bao muh vy” tahpa he a châ.

         

          Râh kyhpachâna hmeiseihpa ahneipa chyhsa châta cha atanoh apakypa ta, a râhta mylâ khochhihpa a hmô hra thei n’awpa ta khizaw liata chyhsapa ta a hmo hneipa hry liata sôh chaipa, “HRONA” tlai chhao hmahta I pasai leipa ei ta. Râh kyhpachâna hmeiseihpa ahneipa ta cha a hmotaopa tawhta ano sasyh mohphana a kaw y thei awpa hlâta a ti nata râh, a chi nata pho ta â thôkhei awpa tlao apatuah-palua tyh. Anodeikuala, râh kyhpachâna laopatai ta hmâhpa ta, sasyh ativyna atluapa , sasyh mohphana atluapa nata ti nata râh a zuah kho thlâh hapa ama y hra tahpa deikau my kha ei suh u.

         

          Eima paryu hapa, Mara hla kôpipa, Puhpa J.Vialua ‘L’ kha ei kha cha, a hlaphipa hry liatapa sâkha, reih hropa lâta palie ta phusâ khazie rakha ma ta chalei awpa ta a vaw hia ei ta. Châhrasala, Mara reih pasô ta, khâchâ pabohsa a chhuahtuhpa Puhpa J.Vialua ‘L’ deikua ta cha, “ Nâmo cha bie nata hla liata uhthei viapa châ ei chi ta, reitiah lei satiah hlei nama hnei thlâh hapa kha, keimo ta eima hnei tlakaihpazy he la rie miah la p’awpa a chhuah tuah kh’u” tahpa ta avaw dytha hapa a châ. Ti nata râh, chi nata Pho kyhpachâtuhpa dei leipa ta cha he hawhpa hmo he dytha thei ei sala angia vei.

         

          Eima chi nata pho, reih nata nôhchâ hrozie pabohsana kyh liana heta Marasaw zydua heta tao awpa eima hnei chyu tlai na. Eima hmiakô liana heta cha eima hmotao awpa chyu chata maniah hâ thlâh ha ta, anodeikua eima tao theipa nata eima tovyuh deikua alyu tlâ thlyu aw vei. Anodeikuala, eima ti nata râh, Chi nata pho pabohsana raihriana kyh liana heta, Râh kyhpachâna hmeiseihpa nata dopa palôh phao awpa ta mo to maniah â hnaw ta. Sasyh mohphana tlyma, sasyh athôna tlyma nata sasyh apapy-pahlyna tlyma atluapa châta deikua hria hoh a chhi lei chaipa nata hria thai rimâ awpa a châ leipa rai a châ. Sasyh apaphsaipa ta, sasyh hlâta râh angiahna pahnothaipa ta, râh kyhpachâna hmeiseihpa tawhta apuapa palôh reihka, “ Nâmo châta mylâ khochhihpa a vaw chhi thei n’awpa tan a atanoh ta eima daihtizy he eima vaw hlâ” tahpa ta, râh, chi nata pho pabohsana rai he hria lymâ ei suh u.