Thina Lyuhchâpa

- Robert B Syuhlo, Siaha

­­­­­­­­­­­­­­­­­­

My kha cha, Paw pakha heta dyuchhai chô liata atyuhpa ta, thopi sah pha ngâsâpa padi pâna chôta Thâtihbu he vaw reih ngâkaw ta. A thâtihbu rei ngâpa liata Obituary Column ( mongyuh râh liata thâtihbu apuapazy liata a thi hapazy thâtih chyupa ama rona) liana tlai chata ano moh, hawrawpipa ta ârohpa tlai he za hmô ta. A moh ry liana chata, “Messenger Of death” (Thina lyuchâpa) tahpa he a ropâ hra ta. A hroh thlâh hapa tlai ta a thi hapa hawhta ama vaw palâsapa chata a thopi do ngâpa chhao cha padosa molo thei khao leipa ta, a hiehâh ngâsâ thlâh ha ta. Cha Thâtihbu Editor cha vâ padai ta, tlahnao awpa khona chata pa ysa molo thei khao tlai vei. Anodeikua, pakhâta ta thâtihbu cha za reih heih ta, “Thina Lyuchâpa” tahpa bie tlai chata pachâna thiehpa pahneisapa ta, apachâna, hiehâhna vâta mei hawhta a ia ngâpa liana chata, he pachâna he avaw ngia haw ta, “Vaw thi hmeiseihpa châ ha aw sala, ei thâtih cha he hawhna heta chhâ (generation) vaw y lymâ awpazy ta vaw rei lai aw ei ta,” tahpa pachâna cha! Cha pachâna chata, a palôh chhôhmarupa liata pachâna thiehpa sapapuapa ta, mo hropazy nata chhâ vaw y lymâ awpazy ta a thâtih a phana zieta amâ thei ngâthlâh thei n’awpa ta hmophapa tao khona chata, ‘Meitipo’ hawhta hiehâhna vâta a ia ngâpa, apachâna cha vaw padia haw ta. A hneirônah zydua cha, Khizaw liata mo hropazy châta hmophapa apatlôsatuhpazy palyupalihna châta hmâh awpa ta tlokhu vaw so khai ha ta, “Thina Lyuchâpa” cha, “Hrona Lyuchâpa” lâta pachâsapa avaw châ haw!

He chyhsapa he ahy hropa châ leipa ta, Alfred Nobel, Bomb taona chhaichhi, TNT ataopapuatuhpa kha a châ. A sôhzy cha atahmâhlâ khizaw liata eima pasâhsa kawpa, Khizaw châta hmophapa ataotuhpazy nata hmahsiena a tlôkheituhpazy palyupalihna, Nobel Prize pachhuahpanoh n’awpa ta tlokhu vaw hlâ khai haw ta. Nobel Prize ama raipapua chhôhta la, Alfred Nobel Moh chhao lei khao aw vei. Thina Lyuchâpa kha hmophapa ataotuhpa, Hrona Lyuchâpa a vaw châ hapa a châ.

A châ tlaina, chyhsapazy pi he chhâzaw ta a hroh awpa nata chhaolei chô liata charei awpa y tlâh ma pi, pakha hmahta y chacheita tlai ma pi. Eima hrohchhôhta eima hmotaopazy he, eima pôhpa, khizaw zilihphapa angiah khaoleipa ta chhaolei thocharu ry liata paziahpa ta a y tita, eima lei moh atheithlâhna a châ n’awpa kyh liata pachhie papha theituhpa a châ tahpa deikua pahno ei suh u. Eima huta so pi ta, eima pôhpa cheingei ta âtô lâta chhaolei chô liata yhmo eima pary nona heta cha, eima theina-thaina, eima sâhmia-hnazô nata eima hneina sôh nata thi liata cha nochhi nata notla hawh saita â hlapa eima châ khai thlyu tlai aw. Châhrasala, eima sapa ta leichô zilih hlâta lei ry chakuahpa a tlaichhai via tita deikua, yzie hnei khao aw vei ei. Eima hrochhôhta eima hmotaopazy vâna khata na a theipa eima châ ha bâ aw.

Kheita e nâ vaw thei hra aw ei ta, eina vaw pahno aw ei tly? Thina Lyuchâpa tahpa ta awpa la châ hraoh ngyu aw vana; anodeikua, ataopathitupa hlâta aparaotuhpa tahpa liata pahno ei hlao via ha tlôh khiahta deikuala, Thina Lyuchâpa tahpa ta awpa nahta ânanona y tlai aw vei!

Hro he pachhoh ta, nâ nata kei nairu baona heta Minit sâkha chhôh chhao he hmahta keimo khota pasihsa thei ma pi. Chavâta, asohsi kawpa nata a chado kawpa ta hrozô pakhôsapa he hmopha chaipa a châ ama vaw tah tyhpa chhao a châ tlai hrapa a châ.

Khizaw chyhsazy heta khei hawhpa chyhsa he ma a thei ngâthlâh ha ei ta? Kheih hawhpa chyhsa he ma ama pahno ngâthlâh ha tly i?

Ngôh nata tâkâ a hnei hluhpazy he pahno hlao kaw awpa ama châ nota, khizaw ta â thei ngâthlâh hapa hry liata thokhazy kha la, O nata lyu dâhdei chhaota a hneileipa nata ama pôhpa paziah n’awpa râh dâhdei chhao a hneileipa ama vaw châ. Ch’aw khiah, sipasapa nata rietheipazy he mâ Khizaw ta â thei ngâthlâh haw? Châ pyly vei, khizaw ta eimâ thei ngâthlâh hapazy kha ama hneirônah nata sipasana vâta athei ngâthlâh hapa châ bobi ma pi.

Mahatma Gandhi cha a ngiapâ leipa eima tahpa, Hindu Ochhôh khaohkha tawhta kaw laiseihpa nata kaw pitlohpa châ ta; anodeikua khizaw chyhsa nata Krizyhpa chhaota pasâhsa pi ta, atanoh taihta a lei moh khâ eima reithai tyhpa a châ. A biereipazy nata hmotaopazy khata atanoh taihta a lei moh, “Gandhi” tahpa cha cheihchalo ta, nâ nata kei, India maw nochhi chaki chabâpa liata apahrâpazy chhao heta chasipaw sikri a aipâna chô nata nopi nota ti sôhzie reipâna chôta khâ eima reithai tyh vei mâ? Khazia e he chyhsa, a hmia mota nawh kaw hrapa nata chiehlei kaw hrapa tlai he a thei ngâthlâh ha pi ta, khâ eima reithai ngâthlâh ha tyh tly? Adona, Ngâchhihna, riahphana nata apanawhna ta a hrochhôh lôbô ta, cha a lôbôpa liana chata mohphana a baipâ hapa vâta a châ. A thlâ lô liata bie hropa ro angiah khao vei.

Kheitazie e Abraham Lincoln, khizaw haosâ râh liata a pahrâpa, Mararâh châta phahnaina a hnei bohbi leipa tlai kha, pasâhsa pi ta, a thâtih khâ eima rei tyh tly? A hrona châta chi a chhihpa hmo chhao pahno lei apachâpa ta, ‘Khotalaina’ O chhi ngiapa a pahypa vâta tlao châ vei mâ? Khotalaina vâta a lei sapa cha pahleipa châ hrasala, khotalaina vâta a hrochhôh lôbô apa-i-pacha hapa tlao a vaw châ. Âmo pano leipa chhao he rei awpa hluhpi ama y chilih aw, rei khai tiah tlai aw mah pi.

Eima râh liata eimâ thei ngâthlâh hapa, a chhiena lâta châ leipa ta, ama moh eima reina daihti liata eimâ palaikhei kaw tyhpazy kha zaw khâpa vâta eimâ thei hra tly? Ama hneirôh vâtazy, ama thatlô kawpa vâtazy  a châ ma? He râh, khazohpa ta atlua papuapa râh châta ama theina rakhata keih ama chakâ hrana vâtazy nata he râh châta hmopha viapa khâ ama vaw pachâ tyhpa vâta tlao châ vei ma i?

Hneirônah ta a cha lei thei leipa hmo hmâpa ta ama hrochhôh lôbô ha ei ta, Mara chi nata Pho â duah chhôhta la khâ eima reithai ngâthlâh ha tlai aw! Ama thlâ lô liata, ama hmotao phapazy a roh vei hrasala, ama thlâ lô vâta a thei ngâthlâh leipa pi ta, eima palôhru liata athei thlâhna lô ama bô hapa vâta my thai khao leipa tlao eima châ.

Keimo deikuala, zawpizy eima dôhvei hotuna liata ama so khai tawhta chhaota, dôhveina dâh thiehpa hmôpapua awpa khâchâ eimâ chhuahna vâtazy pahno hlao ha pi ta. Politiks sôhdaona châta ei hmâhpa vâta a thei ngâthlâh hapa eima châ pathao ha bâ. Châna nata tovyuh tlaichhai ha tuhpa vâta pahnopa châ ha pi ta; eima ao nata reihzy ta eima hmotaopa â chadaipha khao leipa vâta chhâ vaw y awpazy ta amâ thei ngâthlâh ha awpazy ama y chilih ha bâ. Râh châta a theina rakhata hriapa ta, ano sasyh taihta apaky ngâna taihta râh châta rai a hria tahpa ta a thei ngâthlâh ha awpa eima tlaichhai kaw nota, râh sôh a theina rakhata a nieparu hra tahpa ta pahnopazy chhao eima y pathao hai ha bâ he zaw! Eima hmopha taopazy a tlâhta zawhpi ta, anodeikua, eima hmophaleipa taopazy deikua ataopathi hlei mah pi.

He râh, heihzy râh hlâta khochhih lei viapa hawhta na pachâpa he na râh hneichhôhpa châ ta, khâpa na taopa hra aw? Râh hropazy hlâta hnôh a sy via hapa vâta khei hawhpa kao liata chhâ ma hmahsie hra lava tahpa ta heihzy ta ama deichhyna sôh nata thihzy he mâ na bawh paru ngâtlhlâh ha aw? Pachâ pasia la, nohzana châ pahnopa ta, ataopathi hra tuah bao. Na reih, mohlâ khydi nata dinôzy kiah liata na zakhei kaw tyhpa he na reih hneichhôhpa, tlyzaw ta na châna cha phuahluahpatuh awpa a châ. A laiseih n’awpa hlâta alei n’awpa a tluatuhpa na châ khiahta la naw, he reih cha pietuhpa khiahlô tlâh chacheita vei la y. Zyhna, na  lei sapa a leidia tita na chhôh thlapa chhâzaw hrona a pietheipa kha O-tataw a châpa hawhta, su dâhthlohpa na tlô patawna ta na thy ha chhy khiahta la, na tovyuh awpa a chhie kaw la y. Pakheina he hmo chichhih leipa la châ chacheita vei la y! Chyhsapa zy pi he hmotaopa liata dahdie chaipa châ pi ta, eima lei sapa aleidia tita kheita eima lei lô eima bô vâ he?

Thlâ lô liata bie ama ropa pha ngâsâpa nata chyusia kawpazy ta Charles Lamb cha a hawti viano tawhta pahnie kaw tyh ta. A vaw pitlo tawhta chhao cha hawhpa, Thlâ Lô liata biepha kawpa a rohpazy cha tlua lymâ tyh ta. Anodeikua, a palôhrupa pabua kaw tyhpa hmo sâkha y ta, cha hmo cha a lahpinô hnota hetanah heta hiahrih haw ta: “Mary, moleipazy he khataihlia ma ama pabu haw vâ tly?” tahpa ta.