Zâhnia ei ramâ lâ tlai cha

- Robert B Syuhlo, Siaha

Martin Luther King Jr. ramâ khaihpazy nata John Bunyan ramâ khaihpazy hawhta zâhnia zâ ta ei ramâ khaihpa kha cha reipazi hlao leipa aw ta, ahysaw chhôhso lia hmahta a rie pazi hr’aw vei tahpa cha rei pazi byuh leipa ta a sia thlâh hapa hmo a châpa vâta, “I have a dream” tahpa ta tiria haosâ reih avaw hlâ awpa chhao ei kâ za chhie ta. Chavâta, ei pihkheipa reih, ei pahnothai chaipa reih cheingei ta, “Zâhnia ei ramâ lâ tlai cha..” tahpa ta biehmia ei vaw pahypa a châ.

Mawmyhna nata hmiakhu tihâh deita ei pahraopa chhaota lôhhrâhtlô thei kawpa chyhsa ei châ hapa vâ cha ma a châ ha tly? Mokuh pahâhna thohna angiah hlei leipa ta, zâhnia cha khôphei chô kiahpa ta, lahua nata ei luh amâ ty sikhua tah awpa liata mâ zua ei sa thlâh ha hra cha maw!!

Zâhnia ei ramâ lâ tlai cha….

Mahpaw…

          Dyuchhai nai zualuahpa chô liata liahsa keih pakai khaina chôta ei tyu thlâh ha nota, pawpipa pakha, kô 80 hlei ha sala angiapa tlai heta, “ Kha he Pâchhie, Mara râh do nata hâ he chahryh khoh lai tuah rai si!!” tahpa ta yru viavipa ta ei tyuh chakhyh thlâh hapa cha nâ vaw kei ta. Kei, heihzy hawhta uhthei viapazy zana châh a pahno leipa baona chata, “Ah!!! Mahpaw, khâpa lôhpi ma phaoh chi ta cha hawhpa biezy na reih tly? Mara râh cha rei lei, Siaha Khihpi chhao he hmahta na chahryh hoh rai mâ? Alo-asahna hry ta” zua kei tahna ta.

“E!..Kaduapâ, ei hmi nata sâ heta lochona daihti a kho khao vei hrasala, ei tha nata zâ he cha a locho kaw chy mâh my, avy tyh khaw, duah chahryh kho tua rai si” tahpa ta hmeiseihna nata hrua lyhliana hmihphaopa ta einâ kei chanei ngâpa cha kei thyudyu lôhmaopa châta cha, dytha thei rimâ’pa châ khao heih leipa ta. Ei tyuna dyuchhai naipa cha thyusaipa ta, mahpaw cha pazi hawhna ta.

Zawpi â pahlaopahlipa

          Movi hlâ likawh ta khiahma eima sie chy ei tahpa cha, mohmia vaw pasaih laih na ta, vâ meihdo hry liana heta âvaw duah thlâh ha pi ta. Chipa nata thlazohna hmihphaohna chôta ei khihtlylâhpa mahpaw cha kei mo para na ta. Ano chata, “E..Pâchhie, chi khah y, kheita hmahta y hrao va chi, na ry lâ kha duah moh tua rai” tahpa ta na vaw pahneisao ta. Ei ry lâ cha za moh na ta, zawpi hluh ngaitapazy tlai he kalihpi vaw to thlâh ha ei ta.

         

Zawpi hry liata chyhsa thokha cha ama hmao vo âpalie ngâna taihta vaw pakie silih ngâ hai ei ta. Thokha heih hra cha ama dâh a hi karo ngâna taihta a chiavo ngâ kaw heih hra ei ta. Cha nota a chaki chabâpa liata avaw chaphâ ngâpazy za y heih hra pyly ei ta. Su liah-lô chaina su liata liahsa ama phei chavia khaipa ta phusâ vaw reih ngâpazy nata a para-parô ngâsâpa ta chavei-chachâh arâhreih ngâpazy chhao vaw y hra pyly heih hra ei ta. Cha no pyly chata su dâhthloh viapa liata avaw pypahly ngâpazy chhao hmô chhei thai rimâ’pa châ vei ei.

         

Mahpaw keina chata, “Mahpaw, khu zawpizy khu dua ma amâ hrâkyu vei sai kaw tly? Kheihawhpa chyhsazy ma châ ei ta, khâpa rimâ cha ama buakhei sahlao  tly i?” tahpa ta hiahrih na ta.

         

“Na liahritlona Mara râh zawpizy ama châ khu, atahmâ khu ama chhôhso liata khâ avaw rie tyhpa nata ama vaw hâdy kaw tyhpa daihti ama hmâh hai khao maw…..Khu liata ama hmao vo apalie ngâna taihta a pakiesilih ngâpazy nata ama dâh a hi karo ngâna taihta â chiavo ngâpazy khu pakah ta nie â tlua thaipazy ama châ khu. Ama pakah liana khuta bie thlôhpa sai pa-ô ei ta, ama chhôhparupa deikua a kha ngaita ha tyh! Amo sasyh pha n’awpa a châ khiahta cha nâma nairu bao tlai he hmahta a pha patlua chaipa lâta ama cha papua thei tlai aw” tahpa ta eima ry liata zawpi kalihpi a to thlâh hapazy saipâna chôta nâ chhy ta.

         

“Khuh..khu liata chavei-chachâh riapahlaipa ta a râhreih ngâpazy khu cha, balyh hiatuhpa hnei leipa ta thlih pathlina lâ maihta a hiesawpa hawhta châ ei ta. Khu hawhpa chyhsazy khu cha, chyhsa ta “He lâ sy, cha lâ sy” ama tahna lâ maihta a tlei chakhyh thlâh hapa châ ei ta. Khu hawhpazy khu Mara râh liata ama hluh ngaita kaw. William Shakespeare ta, Hamlet hmâpa ta, Rozen hiahrihna, “Pâpuh, cha cha, ôpyh hawhta miah pachâ chi tahna a châ naw?’ tahpa âchhy paliena, ‘Pachâ lia pachâ cha â! Ôpyh, Abei thlâ pasipathaituhpa! Abei khokheina dao lei awpa chipa vâta a lypai pazupathâ tyhtuhpa! Nâmo hawhpazy he cha, Azyh thei nyupa tlai he lyu ei chi ta, pakachhôh liata khô tuapa nama châ tarawpa ta, nama phahnaina amâ ngiah chhôh ngâlâhta pakah liata ama pa-ôpa, nama phahnaina liahsa ama padi khai na ta deikua a hnôchaipa liata ama palâ ha heih tyh tlô awpa tlai he châ ei chi ta. Cha khai tawhta, nâ ôpyh, ama chasaoh heih tlai aw!!”  a tahpazy hawhpa tlai kha châ ei ta. Mahnô-mahpaw daihti liata, nôhchâ a ichapa, ‘ Seilako masôh siepa hawhta’ tahpazy kha la âmo liata hmô awpa y chahcheita vei” tah heih ta.

         

Kei chata, “Cha hawh khiahta la mahpaw, su lialôh viapa liata liahsa ama keih chaviapa ta phusâ a reih ngâpazy khu zaw? Ama chheipâ liata hmo a tlôpazy chhao ama uasa tlâ vei khu?” tahpa ta hiahrih heih na ta.

“Ummh..khu hawhpa chyhsazy tlai khu na râh Pazu ama vaw tah tyhpazy cha. Amo liata râh, chi nata pho thapasana hmeiseihpa y leipa ta, anodeikua râh, chi nata pho hmâhpa ta sôh nata thih pahaona dâh deikua ama thai ngaita kaw. Hmo to he sôh nata thih ta chalei theipa khiah ma tah ei ta, sôh  nata thih ama hmô thei n’awpa a châ khiahta cha thlahchhie khaoh-mâ chhao rao leipa ta; ti nata râh, chi nata pho zuah khohna palôh taihta a phaoh thlâh hapa chyhsazy ama châ”. Tahpa tan â chhy haw heih ta.

Khihpi no-âhchhihpa..

          A biereipazy nata eima hmo sai hapazy cha â hmiehmâ kawpa ta ei pahnopa vâta a kiah liata ei y theipa cha aly pathao kaw na ta. Buakha chhôh tlai zawpizy apielyuzie eima sai khai tawhta tlâh sâkha, râh kâ ngâpa nata thothi kâ-u khai hapa, a khu khuh ngâhaipa ta a chadôpa ry liata khih sâkha a ypa he kei tlô heih pi ta. Cha khih liana tlai chata, pawpipa tawhta hawtipa taihna heta, amâ tobina nata amâ pielyuzie tlai he avaw sosâh ngâsâ thlâh ha ta. Ama O nata lyu, ama hmo hneipazy chhao cha khizaw râh a sosâhpazy hmo hneipa nata ânanona y tu leipa ta; Châhrasala, hmo sâkha, eino na pa-âhsa kawpa cha, âmo a chyhsapazy atobina nata hmo hneipazy a pha thlâh bao na ta. Amâ lâpizy nata tihry lona zy cha athuhny ngâsâ thlâh ha ta. Châ hlâta ei no na pa-âhsa via heipa cha, mo to ta Laobeih ruapa amâ chaba khai hapa cha a châ.

Ei no-âhtuhapa vâna chata ei mahpaw hnona chata, “Mahpaw, he khihpi nata a chhôh liata apahrâpa chyhsa zy duama anano pachai ei. Ama khihpi chheipâh râh zydua mei ta kâ ta, chawh ngâhai ta, uasapa chhao lyu ei vâ! Ama O nata Lyu atobinazy a pha thlâh bao nahta lao beih ruapa a chabapa ta a khiekhâ hai ei, âmo ama pathai thlâh bao nahta, ama lâpizy nata ama tihry kyhzy khu dua maw?” tahpa ta kaw reihpapua haw nah ta. Mahpaw cha hmo rei papua awpa ngiaroh kawpa hawhna heta buakha chhôh tlai a zâ chalih ta.

“Ummhh..khu tlai khu Mara râh duahmo dopa a châ khu. Eima O nata lyu, chy nata sia, eima hmo hneipazy cha a sosâh chaimâh ta, châhrasala, Mara râh deikua hnôh a sy via ngâ kaw tlô..A chyhsapa amâ sosâh khiahta cha a râh cha â sosâh eima tah thei thlâh hr’aw vei mâ? Tahpa ta hiahrihna na palôh liata a y thei ngyu aw. Ei sawchapawpa y, ei cha chho tuah aw, moh la , sai tua; Khu O nata lyu, amâ tobina nata hmo hneipazy khu molâh kuzô sai a châ khu. Khu tlupo ta ama hmo hneipazy pha ta, a sosâh ta, khazia e lao beih ruapa ta amâ khiekhâ tly ? Palôhrupa liata hmahsie tlô leipa chôpho lâta a sosâh kawpa heta khâpa e a sa papua ha tly? Cha cha hmahsiena dopa a châ thei rai ma?”

“Ama lâpizy nata tihry kyhzy liata adona nata ngâchhihna a thy thlâh hapazy, am achy nata sia liata molâh kuzô abaipâ thlâh hapazy nata ama O nata lyu rônahpa liata molâh riahpaw chhiesana nata thisaih abaipazy khu hmô thai ha maw ei sala cha, ama châna hmeiseihpa apahnopa ta, sykhao abupa ta, buhchâ hry liata ngiathai ahawna hneipa ta chaphôh ama tu tlai thlyu aw. Khu laobei ruapa, ama phao laipazy khu, râh lao beih châ ta, molâh kuzô lao beih liata molâh ngôh nata taka khô awpa ama tluana liata lao beih ruapa ama chaba lai khu tlyma. Molâh laobeih hmâhpa ta molâh ngôh nata taka khei laipa cha, hmiakai kawpa ta, hmah eima sie ngaita kaw! Eima tah ngâ aw mâ?” tahpa ta a rei ngâ hai nona chata, ei khapi ta â kaw rôh ta, pao awpa hawhna heta za y ta. Ei duana su tawhta liahsa ei bâ pakaih khaipa ta, kei paza ei chhuahpa cha a kaw hra haw nahta.

         

Ei mo kaw padeih na ta, mohmia ei vaw pasaihpa cha, khôphei chô liata, nohchhôh sawvawhta, liahsa pohluh akhu khaipa ta ei vaw zia thlâh hapa he vaw châ ta. Ei ramâ khaihpa cha pachâpazi chaimâh nah ta, kô kha mâ ei kha a sa tyhpa châta cha ‘Kha hawhpa mâ tlai kha sa chanei  thei heih tlai sala aw!’ tahpa cha ei saduthliena liata a zâ riepa châ leithei tlai vei!.

II

Kha zâ, leilô chô liata padua patyupa ei châ tawhta a ei khana châta mâ ei sa tawhna khata; hrohrâ ta mâ hropa sa awpa a chhuahpa ta, ei zia hmahta mietaku diahpai a zawpakhô ngâpa ziezy chhao zâ khazie lei châ ma vaw reih ha heihna ta. “Chata khata a mô la” tahpa ta a thai sopazy ta a môna dâh ama reipa sâhraw hlei tlai chhao hmâh ha hra nah ta. Châhrasala, mâ hropa raita ei sa thei khao leipa vâta, “Kha he hmiakhu tihâh nata mawmyhna dei heta la mâ na pasasa thei khao vei” tahpa ta ei thobyh chao liata Krismâ viapakao chalei n’awpa ta ei vaw paso hnolohpa cha thlachhâna hnei hleileipa ta thao hawnah ta. Eima Vaih Bazaar liana chata, “Ahy vao thiepa ma thawh chai aw?” tahpa ta daihti vâropi chhôh tlai ei mokhaoh nata pachâna ei saohiah tawhta, Vao sô saripa, a thawpa sai hmahta zô palihta a chha sala angiapa cha kâchhiena nata akarina hnei hleileipa ta Kezi khophie dua chaleipa ta, thapawh ngâsâpa ta hiesaw laipa ta O pangai haw na ta. Ei nie byuhna dâh tlaita hawhta nata kheita mah chho sala ei mo eina paku chai aw? tahpa chhao pachâ hleileipa ta, tlokhuh chhoh khai ha nah ta. Lao ma ei nie hluh via ma vao thawpa ma? tahpa chhao pahno khao lei ngâna taihta ei vaw nie thlâh hapa la, ‘Pati he âvaw pari thei tlai he tlyma’ tahpa cha mopakha palôh liata bietluna za châ lei thei vei.

He zâ he cha, mâ sa awpa ta mietaku rei ngâ byu khao leipa ta,ei luh nata ei lahua amâ tyna dawh nata daihti lia tlaina chata kô kha chhôhta a einona châta mâ zua ei sa thlâh heih cha maw! Vaosa efek tah leithei vana….

Zâhnia ei ramâ lâ tlai cha…

Biereituhpa Uasa hlaoleipa..

Ei khihbôpi Siaha liata su lialôh chaina liana heta paw pakha, kô 60 hlei châ ha sala angia awpa tlai heta mathlai chhaota, a bâh liahsa pakai khaipa ta bie he vaw reih ngâ kaw ta. A Chôtho, chy kaw bâpa bâh cha liahsa ty khai ta, a hmiakô liata zawpi a hlai chhiechhu ngâpazy nata a hluatheipa pyury paro khôlô ngâpazy uasa rai rai leipa ta a biereipa cha rei hnolo ngâ kaw ta. A hmiakô liata a hlaihlâ ngâpa zawpi chhao chata ano cha ama uasapa ta chhao a lâ hra vei. Ei pachâna liana chata, “ He tlupo tan oh a sa thlâh hapa chhao a papeisa leipa ta bie reih hnolo thlâh hapa cha bie chakhyhpa rei vei khi, kha he kei nahthlie tua rai sâh” tahpa taei duana su cha pasiepa ta a kei pahnia haw na ta. Lâpaw hlâta a hnia via awpa tawhna heta ano cha liahsa uahnaopa ta nata nah pachôpa ta a biereipa cha nahthlie haw na ta.

“Marasawzy pi heta hrozie nôchâ a ipa hnei bohbi mah pi. Thlih pathlina lâ maihta a hiesaw thlâh hapa nata nohthlah a châpa sai na eima châ. Hmiaky (Mask) a kypa ta a nyu pi ta. “A mo riahvaih, a ku khoh tô” tahpa hawhta chihupa nata chyhsa zoh mopa ta nohlychhiki hrozie eimâ châ papua tyh. Eima râh he nohthlah a châna tlyliah nata Lô-O laipa su lâta pachâsa pi ta; khotalaipa hrozie hawhta â pielyu thlâh hapa lyu pi ta, châhrasala, Lô-O liata âtâhpa hawhta eima chhôhmarupa cha â rôh ta, eima hro â cha-ie chahmy kaw bâ he zaw”

“Kheikhaw!! Chyhsa riahphapa, hmo châna dopa a reih ngâhpa ama vaw y thlâh hapa he..” tahpa ta ei nah cha pachôh via heih na ta.

“Biedopa nata hmophapa a reihpazy cha ahao ha pi ta; sôh nata thih tlaichhaina vâta eima khihtlâh Awnanopa nata Py hrozie nôhchâh deikua a padâh via rili ngâ hai. Hmophapa taona zy cha Chyhsapa hrozie raina a châ hra tahpa hlâta, “ He hmo he tao sa la, khâpa ei hmô palie aw??” tahpa pachâna tawhta taopa sai vaw châ ha ta. Hmo avaw lie awpa hnahbeiseihna chôta eima veiseih palôhhah pathao ha ta, lymâ eimâ hnahbeiseihpa vâta eima hmopha taopazy chata rei a daih thei khao vei”. A chôtho akypa bâh cha kaw ty via heih ta, a khipâh liata a mathali za loh ngâpa cha a ku ta kaw hrupa ta a chaopasy liana chata za hru ta.

“Râh hmahsiena châ rai eima hriapazy chhao, ‘Bei châ hmiapasapa ta, sei châ hnôh eima pachhysa’ tyhpa vâta chhâ vaw y heih awpazy châta tahpa cha rei lei, ‘My kha ti dâhdei hmahta doh tyh vei. Chi nata Pho laiseihna tahpa ta ao thari pua ngâna taihta aw sâh chaimâh pi ta, molâh hmiakô liata Irupa hawh deita eima chi nata pho a paphasai heih tyh tlôh pi ta”

“Marasawzy pi heta hmia no eima hnei pathao hai ha bâpa ta a lâ ta.Cha cha ‘ Lôhawhpa hro nata Dâhthlopa hro’ eima tah thei aw. He hro mianopazy heta khotalao thlâh ha tlô ta lô-O liata â tâhpa miah palyusa thei ta. Pahneisilih thlâh ha tlô ta, a cha ngâpa miah pachâsatuhpa a châ thei hra….he vâna tlai heta eima thyudyupa nata thyutliapazy ta ahy hro he ma eimâ mopâ bâ aw? tahpa ta â chaka pathao hai ei ta, hro lâlaopa nata viavipa ta, he hawhpa hro tawhna heta khotalaina eima hmô thlyu la tahpa ta, ama nô nata paw, chhôhkha nata khihtlâh puasaipa ta, hmophaleipa liata khotalaina ama tlua hai ha bâ he zaw..!!”: tahpa a rei hai nona chata, ei hmiakô ta liana heta mawtawr angia chaimâhpa, rôhsaih panyupa ta tobipa he a vaw duah ta. A chhôh tawhna chata, “ Adâ nata Ivy pathla chhyh panyupa a kaw ka hrapa châsala â ngia leipa, vâlyuchâpa, a hnazô nata sâhmia ta vâ satliazy chhôhso hmah pabua ha lah” tahpa ama chipa vâta khizaw lâta ama za pathlie-pathlaw hapa châ sala angiapa chanô tlai heta kei, Mara satlia nairu bao lia hmahta heih a lyu lei chaipa tlai baona he zua eina vaw mo thlâh hapa ta khâchâ pahnona ei za hnei thlâh ha cha maw!..Ei kiahpâ liana chata, chyhsa hropa, keima hlâta mopha via awpa ama ypa ta ei pahno leipa vâ cha ma a châ ha ma..? Riahpha lôhpi phaopa ta, hnahbeiseihna ta na vaw saituhpa cha, “ Hnahbeiseih tlâh y khao na la y” tahpa mokhao ta kei sai paliena ta, a pahnothai hapa cha ma a châ ha ma..? a mawtawr cha pahro ta, ‘Mâpha sy’ chhao a tah hleileipa ta, na khôhsai haw ta. Ei palôhrupa liana chata, “Marasaw, hmo a châ bohbi leipa pachâ-pady eima thai dâh nata eima palôh â zaw vo dâh rimâ he la aw….!” tahpa ta biereihtuhpa cha kei uahnao heih’pa a chhuahpa ta ei luh ei kaw pahiehpa cha..vaw y khao vei. Hmia no cha eima hnei tlai he tly ma.

Uasa hlaopa biereituhpa..

Ei duana su tawhna chata apasiepa ta, su dia viana lâ pangai tua sâh tahpa ta pheilia hai ha heih na ta. Buakha tlai ei sie tawhta su sâkha, nohdipha ngaitapa ry liata zawpi hluh chaimâhpa, hârie dyuchhai liata liahsa ama phei chavia khai hapa ta ama hmiakô liata paw pakha, rao-ao nata viakaochô, mâ ru kawpa châ sala â ngiapa chhaota atobipa ta biereina ahnei ngâpa a vaw nahthlie haipazy kei hmô chho heih na ta. Atyuna ruapa tluapa ta mohmia pasaih para na ta, atyuna ruapa rai vaw y khao vei..sâkha hmahta vaw y vei!..A duah hmahta tlâ nahthlie tuah sy tahpa ta ei duasu cha paryh haw na ta.

“Mara râh hmahsiena nata hnahtlâhna cha keimo Party liata y hluh chai ta. Eima sawhkhâ tlai khiahta la, eima Party manôhzy khokhei awpa tahpa cha eima biepipa châ aw ta. Biehneina nata sôh nata thih hnawh pha viapa eima hnei thei chhochhi khiahta cha ahy hmahta lyu â taopa ta niebaw tlua khao leipa aw ei chi ta, sôh naosiapa, mathlai loh leipa ta nama   papua ha bâ aw. Chatita la eima râh hârapa heta mohôhtuhpa hnei ha bâ aw ta, hmahsiena he âzaw ta na â zaw aw. Kheiti nata sapiti lona râhzy, eima vaw saduthlie tyhpazy kha hmeiseihna râh pachâsa aw pi ta; rairuna noh nata daihtizy he la ramâ hawh dei ama châ ha bâ aw..” tahpa ta a py chô liata liahsa a ku so khaipa ta a rei ngâ nona chata, kei palôh a zaw vopa bao chala, a biereipa cha, bie thlâhthlipa, palôhhâ leipazy dôhveina khi a châpa ta ei pahno hapa vâta cha su cha puasai awpa ta apachhuahpanoh haw heih na ta.

Cha su puasai awpa a chhuahpa ta keih khei chakâ pathao hai nona chata, Khichha irupa, siaha liata ama pathlie tlamaw hapa châ sala angiapa hawh tlupo ta apara-parôpa paw pakha, ei puasai haipa su ngaipa ta âvaw ngiapa nah chata eima luh cha a chakhyh haw pi ta. Ei luh cha a keichhei khai ha khiahma ta ngâ awpa heta y ta, ei luh kaw chamao a chhuahpa ta ei bâh ei kaw hypa cha a kaw hra haw na ta.

Ei mo kaw padeipa ta, mohmia ei kaw pasaih hei bao cha la, khâpa hropa vâta vaw châ vei! Rakhô tawhta â khu lâta, ei khi ta siphiah â chakhy ngâna taihta ei vaw tlapa he châ ta..cha ei ramâ khaihpa rimâ cha la, “ Hmia no khiahma eima hmia a chakhy pi tahna ta hmia kha deita pasa ei tao he zaw” tahpa ta siphiah cha thyusai para na ta. Ei ramâ khaihpa pachâ pazi lymâna chôta ei khi cha chamao ngâ na ta. “ Kheita rai châ sala, mâ ei sana châhki ta ei sa a pasa thlâh haw khiahta la pha thai vei, ramâ khochhipa nata nai zualuahpazy sa hra bâ tuah sâh,a” tahpa ta khôphei chô cha kiah lilawh haw heih na ta. Hmia no cha eima vaw hnei tlai he tlyma…

III

Kha hawhta kôpi kô kha chhôhta mâ eino(2) pasasapa ta ei y tawhta nata ‘Atakô’ chhao ‘Zâkô’ vaw châ ta; ‘Hâkô’ chhao ‘Atakô’ avaw châ ha heih tawhta chhao, mâ cha rei lei, ‘Mothlaw’ dâhdei chhao hnei thei khao leipa nah ta. Atakô nata Hâkô likah liata hmotlôpazy chhao asaohia ei chhuahpa chhaota, ‘Mâ’ rai rai ta vaw tlô thei pyly vei! ‘Chiehleina cha ma ei hnei ha ma?’ tahpa ta Dawty ei pamohsapa chhaota, ‘Nâ la sapa hnahtlâhna liata la, chaolia lochono hawhta thatlôpa nata hri-ia phapa tlaina na châ’ na tah ha chhy tlô ei. “Ch’aw khiah khazia Mâ rai rai ta ei sa thei tlô vei cha!?” tahpa ta hiahrihna ei taopa hra cha, “Kei he Mâ taotuhpa ta ma eina reih chi!?’ tahpa cha achhyna eima hmô thei chhôhpa châ chhy ha tlô. Ei nôpo pathao ta, heihzy ta ama thlachhâna liata, “Sonazy, hneirônahzy, hnatlâhnazy’ ama hiah ngâ kaw nota, kei deikuala, “Mâ’ hiahpa ta hazoh moku chhao khaih thei khao vana! Mâ sa awpa ta ‘TEKTIK’ nano nanopa ei hmâh tyhpazy liahsa ei hmâhpaki khai heih tawhta chhao yzie rai hnei pyly vei!

Zâkha cha Thâmaih Nô daoh liata, Mara aomâh pahâhpa, “Lialai Aomâh”, ‘Statement’ ta chatypa, kupi tie tlai châ sala angiapa chakiepa ta atyuh thlâh ha nah ta. Ei pachâna liata  alai chaipa chhao, ‘Kheita e mâ ei sa thei aw?’ tahpa cha za châ lei thei vei. Cha daihti liana tlai chata Hmo no-âhchhipa avaw tlô haw!

Cha ‘Lialai aomâh’, ‘statement’ ta chatypa chata, ‘Buddha hawhta Nirvana’ eina patlôsa la tah vana, Leonardo da Vinci ta a nohthla rohpa, ‘The last Supper’ liata ‘Code’ apabupa hawhta Thâmaih Nô heta he a lialai-aomâh liana heta ‘Code’ apabu hra la tah ngâ hra vana. Anodeikuala, Ei movo tlai cha, ‘Laihsa hmiphapa hmiakô liata satlia apakawpa anai zualuah tyhpa’ hawhta, vaw nai chai mâh ta, ei mo tlai cha athata vaw ku ta, mokuna chata einâ byuhnie hapa cha ma a châ ma? Thâmaih Nô kuhvâ chakieh ngâpa chhao cha uahsa khao leipa nah ta, dyuchhai seipa liana chata apazawh haw nah ta. a nano dâh rimâ cha, ‘Lialai aomâh’ Efek’ cha ma a châ ha ma? ‘Mâ’ zua ei sa thlâh heih cha maw!!

          …Zâhnia ei ramâ lâ tlai cha….

Hnazô dyhrualuanô!

Matlamala kawpa ta zawlâ kiah liata atyuna ama taopa liana heta avaw tyuh thlâh ha nah ta. Ei tyuhna hnôhky liana chata, O, a hmia mopa chhaota chy kaw bâpa he y ta. A chypa nata arytu hapa vâta, ‘O-Hâpa’ dâhdei chhaota lôhro phaosaipa ta, a tleisai habâpa châ sala angiapa he châ tlai ta. Cha O tlai chata ei mohmia na pakhâ ta; su hro-râh hro aheih thei lei awpa ta eina tao hapa cha ma a châ ma? taorâh moh thlâh ha nah ta. Buakha chhôh tlai ei sai tawhta, cha Ochypa nata rypa tawhta ku ta nâ vaw kei ngâpa ama ypa ta ei pahnopa vâta, rao pachhua khaipa ta kei mo pasia via heihna ta.

‘Kheikhaw!! Ei mo cha ma sia khao vei ma? Ku ta nâ vaw keituhpa cha Chanô tlaina a châ! Lâpaw tawhta saipa ei châ tarawpa ta, mokhao ta a dytha thei lei awpa sâhmia hnazô tlai na a phao. Eima râh hârapa chhutla-chakha, chiahtlao-chiahvopa hry liata, kei, zasâh-manôh hry liata hnazô-sâhmia nawhchaipa tlai ta, einâ vaw kei thlâh ha hrapa cha ei tyuhna thyusaipa ta, âduana siphiah ei kaw tlypa cha apahno hmâh vana!

Lâpaw tawhta saipa hlâta cha, a kiah liata, liahsa aduapâpa ta ahnazô ei saipa chata hmôpasia via heihna ta. “ A hnazô sâhmia liana chata khochhina nata pawngiana, lôhraopa nata pahneisilihna chôta bâhlia amâ cha-ao hainopa he hmô nah ta. Amopadei liana chata, ngâchhihna, pathaina nata nônaina, vâ manôhzy hro lia deita abaipa châ sala ei vaw pangiasa tyhpa, tlâhpadâ thlihua naizuahluapa ta ahiesaw ngâ haipa za hmô hra nah ta; Ei chhôhso cha tlaichhaina nata apanawhna ta za bie khai haw ta!”

“Leilô heta he hawhta hnazô-dyh-rualuapa chanô he  asapapua thei aw mâ?!!” tahpa cha ei palôh liata hmo lai chaipa za châ ta. A hnazô-sâhmia cha moleina zydua rona khi tlaina a pha!!

Cha hawhta buakha chhôh tlai cha, pachâna pualeipa nata ei mokhao sihrypa ta pawngiana nata khochhina, sapa lâta pachâsapa châ sala angiapa hnazô ei sai nona chata, ei ku pualeipa cha a ku pathaipa ta vaw patupa ta, “Satlia, avy tyh.Hmo cha pahmôsa tuah sâh” tahpa ta O-Chhôh lâ cha nâ ngia khei haw ta. Ei pachâna liata hmo za laichaipa la naw, “Kheikhaw! Daihti nai zuahluapa eima hmâhkho tlai hi!” tahpa cha châ lei thei vei!

Ei pachâna nata saduthliena liata, “Daihti nai zuahluahpa” tahpa pyu sai ta âripatlai ha tawh tly cha, ‘iru nodipa hawhta’ pazi lymâ haw nah ta. Anodeikuala, O chhôh eimâ za ngia patawna ta ei mo ta ei za hmô tuachaipa deikua chata eino deikua na pa-âhsa leithei vei!

Thlalâ

O cha a chôpho achy hapa hawhta a chhôh cha vaw chy kaw bâ hra ta. Cha zydua hlâta ei palôh na la viapa deikua cha, ‘Thlalâ’ sai ta a bie thlâh hapa cha a châ. Thlalâ, pôhpa zydua alâpaki khai theipa tlai he avaw patyuh chilih thlâh ha ta. Cha thlalâ hry liata sâkha, a liahlôh chaipa liata ama patyuhpa deikua cha ‘Poh’ ta avaw khu ta; cha thlalâ pohta akhupa lâ cha nâ chhipa ta, thlalâ hmiakô liana chata na paduahsapa ta, “ A piepâ rai rai kha y” tahpa tan a chhopa ta, thlalâ khutuhpa poh cha la pathla haw ta.

         

Thlalâ liata chyhsa avaw lâpa cha, ei hmia pahno biehpa rai vaw châ khao vei! Sasyh apahnopasiana ta khiah ma ei vaw bie hra atahna ta, cha thlalâ liata avaw lâpa deikua cha, ‘Leilô tao tuahno tawhta’ ei hmia pahno beih leipa tlaina a châ ha!

         

Thlalâ liana chata, chapaw, laki tawhta pheipaza taihta pualeina ta a khupa he avaw lâ ta. Alu liana chata, moh alâna tlaichhaina, rônahna tlaichhaina nata khohleikhona chhaichhi ta taopa lakho tlai he a kho ta. A mopadei liana chata, Ahaona, uahvana, Sihryna, hiatliana, mohropazy khâsawta reileina nata apalaina za hmô hranah ta.

         

A hmao liana chata, reithai pakheina, a iekhyna, haidi-haiduana, mo hropazy reithaina hlâta reipachhiena tlaichhai viana tilaipi tily chahrapa hry liata areisina nata apanawhna balyh,âhiesaw ngâpa chhao hmô chhei thai rimâ’pa za châ vei! A chachôhna liata rôhsaihdôhpa ta a chadôpa chhôh liata hiehâna, lianyh chei awpa byuhna, apakheipa ta pachâna mei ta adona nata ngâchhihna chyhsia akâ ngâpa chhao cha hmô lei apachâsa thai rimâ awpa châ chacheita hra vei!

         

A ku, sôh tlaichhaina vâta azapa nata pathapa, a khaohliana liata thisaih kaw pua ngâpa nata hiatliana nata haiphiana vâta ârâhreina liataa pheiky chy khai ha bâpa chhao cha mokhaota hmôchhei thei’pa châ leipa ta, ei no cha rai ta, eino na-âh via ngâ kaw ta;cha thlalâ liata avaw lâpa cha keima ei châ thei aw mâ? “Laihsa, he thlalâ liatapa he ahy maw a châ rai tly?” tahpa bie cha eipachyh-pary hlâta ei paka tawhta kaw pua haw ta.

         

“Satlia, kha thlalâ liatapa kha, ahy hropa châ vei ei, nâma tlaina na châ” tahpa cha âchhyna cha châ ha tlô ta.

         

Nozana nata athaileina ta za bie pathao haw nah ta. Chyhsia phapa ta ei pôpa ei khu tarawpa ta, dualeipa hawhta apachâna za hnei hawnah ta. Ei mo vaw zoh ta, ei mathlaiti vaw syuh ta, cha thlalâ chata eina palâhâh khai dâhdei aw tahpa china chata za bie nah ta. Ei ku ta ei mo cha chahupa ta, “Khu para tyh, poh kha vaw la la, he thlalâ he khu para tyh!!” tahpa ta laihsa cha ahaw hawnah ta. Laihsa chata thlalâ cha vaw khupa ta, nozapa nata hmiachhiepa ta ei duah thlâh hapa cha,hetanah heta na chho ha ta, “ He hawhpa thlalâ he, Khizaw liana heta hmô zôzaw leipa aw chi ta, sôh nata thih ta chalei thei awpa châ hra vei ei. He hawhpa thlalâ heta cha, ahneirôhpa nata dychhiepa pathluatuh hlei leipa ta, pachâ peimawh chai hra vei.”

          “Anodeikuala, ahy raita he hawhpa thlalâ he hnei chyu pi ta; châhrasala, amok ho beih ma pi. Thlala nohthlapazy liata tlao amokho via ha pi ta. Eima siena vawna lia maihta, buakha chhâ amo awpa ta maniah hrua tyh ta, châhrasala, eima tleisai ha tyh” 

         

Cha bie a rei khai tawhna chata, thlalâ khuna poh cha hy ta, angia syulyu haw ta. Cha thlalâ vâna chata, ei ngia nâ ryhthai khao leipa ta, cha su cha puasai para awpa khona ta bienah ta, apara-parô ngâsâpa ta pua hawnah ta. Zawlâ liata ei tyuna su liana khata a kei tyu heihpa ta, ‘Thlalâ’ tahpa sai cha ‘Ei pachâna liata pyu parochaipa cha châ ha heih ta’ . Thlalâ cha moto ta eima hnei ha thlâh tlô khiahta cha khataihlia a y ha tlô aw? cha thlalâ cha khataihlia ei vaw my haw vâ? Tahpa ta pachâna ei hmâh ngâhainona chata, ei kiah liata 407 aduah moloh thlâh hapa cha, Rickshaw heta ‘Pahlai!!!’ vaw su ta, Rickshaw thlalâ cha, ‘Kahraiing!!’ keipa ta, a chhôh tawhna chata nô pakha he kaw sâh chai mâh ta.

         

Cha nô pakha sâhpa pyu chata, ei khitlyna ramâ tawhtapa na pakuahsapa ta, “Atahmâhlâ chhâ thyutliazy ei chi he, azoh-thâpi ta thlalâzy tlâ pado ei chi, miah pakeipapâ heih ei chi!” tahpa ta Thâmaih Nô ta siphiah liata thlalâ keipa a phi ngâpa cha kaw hmô haw nah ta. Ei pachâna liata Thlalâ sai ta abie thlâh hapa vâna chata, ‘Thlalâ!’ tahpa ta ei paka ei kaw â heihpa cha, “ Y khao vei! Eima thlalâ hneichhôhpa na pakai khai hi” tahpa ta hiehâ ngâsâpa ta Thâmaih Nô chata achalyu ngâpa ta O-phi ta na vaw dypâ thlâh ha ta!

         

‘A châ tlai na, hmo to he keimo ta châ sala eima tahpa hawhta sai ta hmô awpa a chhuah tyh pi ta, a châna dopa hmô kho tyh mah pi’. Hmo châna dopa maniah pahmôsatuhpa Thlalâ deikua eima tlei sai ha tyh..!!