Lôhliena Tlâh…..

I

Cha chheipâh râh cha zâlâ nohtla awpa, notla tlâhthlôh chô tawhta cha chheipâ vaw pakhaihtuhpa chhao chata khôhsai awpa ngiaroh sala angia ta. Vahtiepa paro khôlôpa ta aloh ngâpa chadôpa ta tuhpi thosô, chasipaw thlihua chakuah châ kholopa ta a hiesaw ngâpa khaihpahliepa ta zâlâ notla awpa thlaraw aripatlaipa ta avaw lâ heih tyhpa chata, cha râh nata a chheipâh pawngiana cha baichha via heih sala a ngia ta. Chhôh daihti chhâ haipa nata zâ daihti avaw tlô ngâpa ngiarohpa châ ei sala angiapa ta a chiavo hôlôpa, tuhpi thosô chô liata sopavaw sâpa pyu chata cha râh nata a chheipâh ta lôhliena apathyuzie cha pahnolei apachâsa thai rimâ awpa châ thlyu aw vei! Châhrasala, cha râh angia ngaitapa ta a chadôpa chhôh liata O, lâpaw tawhta saipa chhaota kô hluh a sie hapa liata sapa châ ha sala angiapa deikua chata, cha a chheipâh râh ngiapa liata hmo a tlô haipazy cha a uasapa chhaota a ngia vei. Kô hluhpi thlirupa nata saopi vâchhiepa tawhta a kalachhôh liata pahrâhpa chyhsazy khâchâ avaw pabohsa zôzaw tyhpa vâta chhao a châ thlyu aw ; a hmiakô liata leilô angiana apakaih ngâpa chhao cha uasa leipa ta, sikhua ziazi a roh thlâh haw.

Anodeikuala, cha O uhthei kaw bâpa chata a chhôh liata apahrâpa, pawpipa, a lei kô uhtheina vâta a sâh liahsa a paw khai hapa, Poh, pohsathai patluapa ku puapa châ sala angiapa abupa ta zâlâ nohtla ngâpa khâ avaw saituhpa chhôhso cha a pahnothai khai vâ tlyma?

       A châ tlai na, Puhpa Thalai heta kô hluhpi chhôh cha bâ leipa ta chasipaw zâlâ nohtla awpa cha vaw sai hra tyh tlai ta. A chheipâh pawngiana chhao cha hmôchhei chahcheita aw vei. Lâpaw tawhta saipa chhaota kô 70 hlei ha sala tahpa a hno thlâh hapa, âmozy hawh châta cha; cha chasipaw zâlâ nohtla awpa, vâchychhâna liata âsy haipa chata he khizaw, hrochhiepa, pawngiana raita a hnei khaoleipa ta chhaolei liata hrozô pakhôhsa chy hr’awpa ta athlyuna chhao a châ thei hra mâh ta.

       Liahsa adua khaipa ta zâlâ nohtla ngâpa a saipa a châ hapa vâna chata, a lochono daihti liata a pôraoh awpa chhao khachâ rakha ma cha rohpady theipa châ ta. A lei kô uhtheina chata a pilâ cha vi ha hrasala, a lochono ta cha vâtlâh chô lâta chareipa, a khotlâhkhi a pha hrapa a châ tlai aw tahpa cha hmôchhei thaipa châ thlyu aw vei. A sâh pha ngaitapa, pala hawhta râ padi thlâh hapa nata a mitlao kawpa ta ziepa a châna chata, chyhsa amohôh pha kawpa nata â khâsia pha kawpa a châ aw tahpa palâsa ta. A vo âdao kaw bâpa ry liata a ruhrei pahrei kawpa chata a lochono ta cha thatlô-bâhseipa ta ama reipa a châ tlai aw tahpa palâsa ta. Anodeikua, a ku vo âdao kaw bâpa ta a chôchahrei apatu-pa-ihna dâh tawhta saipa ta cha, a lei kô uhtheina chata a sapa pachiapa zydua chahryh-papuapa ta, chyhsapa apalaina, thatlôna dâhdei chhaota a sapa chielei ngaitapa cha, chôchahrei baokhâna leipa ta cha paduahsa thei khao vei tahpa deikua âlâpasia ngaita kaw.

       Kô hluhpi chhôh cha Puhpa Thalai heta chasipaw nohtla haipa avaw sai ha bâ hra tlai na. A mo sia khao lei kawpa cha zâ thlâpâ khaihna ry liata khiliah akhie n’awpa châta cha hmâhtlâh châ khao hra vei sala; chasipaw zâlâ nohtla ngâpa sai n’awpa ta deikua hmâhtlâh leipa la châ hrao vei. He a O paroh kaw bâpa liana heta matlamala kawpa ta kô hluh vaw pahrâ ha ta. A lei peirâh nata hriena su chhao a châ eima ta thei aw.

II

       Zâlâ nohtla ngâpa chhao chata, a ry liata leilô sawzy cha ngiaroh kawpa ta khôsaipa ta, zohna châta su tlei haw hra ta. Puhpa Thalai chhao chata, arypa hawhta Opy cha a hneisaipa ta, lômathu lâ mei a ai awpa ta apasie haw hra ta. A dyuchhai hmâhthaipa, ano kô tluta uhtheipa châ sala angiapa chô liata a tyuhmo paryhpa ta, lômathao liata meikâ ngâpa hmiachhypa ta a tyuh ta. A mei a ai ngâpa chata a sapa uhthei kaw bâpa cha lalôhna vaw pie pathaopa ta, a poh abupa cha pami-parai via heih ta.

       Cha O chhôh liana chata lômathao liata meipalei a ia ngâpa hry ta tho kaw pa heih tyhpa deileipa ta cha pyu nata ry a taopa rai y vei ei. A ku cha kaw chanaoh liahsa ha heih tuahpa ta, lômathu chô liata a khaipa, thobyh chyhpa, kuzôthai kawpa ta ataopa châ sala angiapa cha kaw pazapa ta. A by chô liana chata liahsa patyuh ha heih tuahpa ta, chado kawpa ta a hraina masôh cha phiapa ta, a chhôh liata nohthlapa, chy kaw bâpa cha la papuapa ta, liahsa pazupatha ha heih tuah ta. A kiah liata dawhkâ chô liata mobaina a sopa cha lapa ta a bait a. Cha nothlapa, paroh kaw bâpa cha chado kawpa nata khâsia kawpa ta pakaipa ta, cha nothlapa liana chata a hnôhlâ daihti khô hapa, a daihti vaw hmâh tyhpa zydua â bai hrana tahpa pahno hrasala, moh leithei tlô vâ! Cha nothlapa ta avaw tlôkhei awpa, yruna nata lôhliena cha a ngiaroh chhielie hapa cha ma a châ ha ma? Buakha tlai a ku liana chata chabapa ta, su hro sai ha heih tuah ta. Châhrasala, cha nothlapa mo byuhna chata, a chhôh liata ngiarona a hneipa cha pahniepa ta, khaihna hmâhphahnaina zie ta apahiepa ta, nohthlapa cha moh haw ta.

       Cha nothlapa liana chata Nôsaw, achakupa ta pahneisilihpa,  alyna nata thaphana, thlalôhna sâhmia a phaopa he avaw lâ ei ta. Nothlapa cha a uhthei kaw bâpa vâta nata atahmâhlâ nothlalana phapa chhaota lapa a châ leipa vâta siatu khao leipa ta. Châhrasala, Puhpa Thalai palôh liata deikua cha tluta nothla a lâpasiapa cha y thlyu aw vei. Nothlapa liana chata, Nô chhithai kawpa nata nônai hmi kawpa a phaopa ta pahneisilihna chôta chanô hawtipa nata chapaw hawtipa, thapawna sâhmia chhaota apahnei ngâpa, thlalôhna chhaota ama nô a chaku ngâpa zy he avaw cho ta. Ama hnôhky liata chata Nohtla ngâpa, saidôpa thlaraw ta a chheipâh a khaih hai nopa a vaw lâ hra ta. A pôhpa akaw sua viapa nata a ku ta cha nothlapa a hmiepasa viana dâh tawhna chata, Puhpa Thalai chhao cha, lei manôhzy hro liata a bai khâchâ hapa, chhopasia thai leipa hmo chata a vaw tlô thlu ha hra tah leitheipa châ vei!

       Atyuhmo tawhna chata a daihti khô chiepa, hnôhlâ daihtizy chata amâ dôphi lymâ ha heihpa hawhta pahno ta. A hmiakô liana chata hmô lei apachâ thai rihmâ awpa chhao a châ leipa ta, a sia kawpa ta a hnôhlâ daihtizy cha amâ vaw pakaih pathao haw heih. Yruna, lôhliena nata lôhhrina apahlao-pacho khaipa chata a pachâna cha a sapa pôhpa tawhtapa a chhipapuapa ta, a hro parohpa khô ha chiepa lâna chata a chhipakhua  haw heih ta. Cha O yrupa cha puasaipa ta, a hlâta yru a chhi viapa su ngaipa ta a pachâna chata a zawkhei haw heih ta.

       Kha noh, Chasipaw zâlâ nohtla ngâpa ry liana khata a hro cha pananopa ta a y aw tahpa kha a pahno leipa cha rei lei, a pachâna lia raita za y vei. Thathyu kawpa ta ama chhôhkha ta, a lahpinô khochaipa nata ama sawna pano, a mo ai theileipazy chhao nata ‘Krismas’ hmâh awpa ta Bus ta ama khih lâ ama sie ngâpa kha. Kô hropa hawhta Krismas chyhsia nata hmo hropazy chaleipâna hawhta khihpi lâ siepa ta, ama chhôhkhata amâ thaopa kha châ ta. Chhôhkha pawhrâpa kalachhôh liata khihtlypa ama châpa vâta, a lahpinô nata a sawna pano chhao noh hro zydua hlâta ama thapaw pachai ta, kho a chhihpachai ei ta, vâ ama chhi pachaipa khata pahno ta. Ama sawna, Lily nata Ryulai chhochhi cha, cha hawhta ama nô nata paw, kyhpachâ ngaitatuhpazy kiah liata khih ama tly theipa vâta ama tha kha paw pachai ta, noh hro zydua hlâta amâ ly pachai heihpa kha châ ta. Nôhrâchaipa, Pihnô Nâdi chhao cha, noh hro zydua hlâta a thapaw pachai khiahma tah awpa ta ama Paw cha kaw pakie thlu heih tyh hra ta.  Amo chhôhkha kha ama kiana Bus liata a kia hrapa, mohropazy khata ama uava kawpa hawhta za pahno ta. Ama sawna chhao kha mo hropa sawzy hlâta ama tha apaw viapa ta pahno leithei vei. A lahpinô, ano a hniepa ta a mô ngâpa chhao cha, a heihzy lahpinô hlâta chhithai chai ta, kho a chhi chai ta; ama laihseina khih a ngai ngâpa ama châpa vâta nata cha hawhta Chhôhkha khochhipazy chhao nata khih atlypa ama châpa vâta a châ thlyu aw, lôhly kawpa ta Nohtla ngâpa charawpa ta thochiah avaw khaipahlie ngâpa saina chôta sasyhta pakie thlâh ha leipa cha taotheipa hropa rai hnei vei.

       Ama khih tlô chy, lôkâh asâhkawpa tlôh chy liana chata, a chhâ n’awpa ta Lyupâ pua awpa ta Bus tawhna chata a chhô hôlô heih ei ta. Cha su, amâ pahâhna su kiahta liata tlâhbyupa, thokô nata sibiepa ta a khu khai ha tyhpa su, ama khih laihsa nata satliazy ta, “Lôhliena Tlâh” tahpa ta ama vaw bipa, ama chareina tyhpa liana tlai chata, ‘Nohthlalana’ thiehpa a chaleipa cheingei khata ‘Khizaw liata Nôsaw kho a chhih chaipazy nohthlapa kha alapa kha châ ta. Chasipaw zâlâ nohtla ngâpa ry liata, Pawhrâchaipa ta a ‘Lei ryuhsôhpa’-zy nohthlapa a la ngâ nona khata a chhôhso lia thaphana nata thathyuna deileipa ta cha su to vei. Bus chhôh liata angia khai heih awpa ta Driver awna chhao kha ama vaw pahno lei daihmâ hapa kha châ ta. Chyhsapazy heta eima hmialâ daihti he pahno chhielie theina eima hnei vei tawh tly cha, kha daihti kha a lahpi nata sawzy chhaota ama y khona hnôhchaipa a châ aw tahpa pahno ha maw sala cha, ano tlai chhao kha nothla lana liata âvaw hlao heih awpa tlai. Châhrasala, cha cha saduthliena tlô beih lei awpa châ ha tlô ta!!

       Kha hawhta lyupâhzy ama pua khai tawhna khata cha lâpi ei kha a kei pako heih ta, ama khih cha ama tlôpâ ha aw tahpa ama pahno thlâh hapa vâta mo to kha y molo thai khao leipa ei ta. Ama kiahna Bus Driver chhao cha, khitlyna riethei chhipa nata pasipa apatlô h’awpa vâta ma a châ ma? bâhta cha a hmotaopa liata a palôh a sotu khao leipa ta pahno ta. Châhrasala, mo hropazy ta khâpa hmahta ama rei leipa vâta nata ama thapaw kaw saipa vâna khata khâpa hmah cha rei papua hrao leipa ta. Ama khih angia chyta liata lôkâh, “Sawvawh lôkâh” ama tahpa ama tlô chy taihna khata Bus chhôh pyury kha a pha kaw chyhpa kha châ ta. Khih tlôtuah lâta O-zy cha avaw lâ pathao haw ta. Hâtina chata, O avaw lâpazy cha dypa ta, “ Hu.., a uh Khai na O, hao hao a Uh Nono na o, Yess!! Eima tlô daihmâ haw..!!” tahpa ta thapaw ngaitapa ta awsâh hôlô ei ta. Puhpa Thalai pachâna liata deikua amâ râ pakhô haipa ‘Sawvawh Lôkâh” cha apalôh liata za y leithei vei. Driver cha kei mo heih ta, a diathlâ pathao kawpa heta pahno ta. A kiah liata Khichha sôhdaopa laihsa cha a kei veipâ tyh tahpa chhao cha hmô chhei vei; anodeikua, ei hluhpi a tlâh-bopa ta ama khih avaw tlôkheityhtuhpa chata khâpa hmah patlôsa bao vei tahpa ta âtyuhna tawhna chata zâlâ nohtla ngâpa sai awpa ta Bus opy lâ cha akaw heih ta. Nohtla ngâpa nohthla la awpa byuhna a hneipa vâta a nohthlalana cha za paza ta, cha nona tlai chata, “ Ei zavy!!” tahpa ta ama driver thlazohna ao kaw paropa nata nôsaw thlazohna ao hryta chapaw pitlopa ao, “E..khai!!” tahpa pyuhry cha a pyury thei hnôhchaipa a châ hapa kha châ ta.

       Thohna-O liata â kaw thei tuahchaino ta,a lahpi nata a sawna ama thi tahpa bie ama chho haino khata, “ Chyhsapa he la eima hna ta he tlâh ha tuah sala” tahpazy cha mo to saduthliena a châ tyhpa a châpa tlai, Puhpa Thalai châta deikua, bie lôhpahiachaipa deita na a châ!! Thaphapa nata alypa ta Khizaw liata lei peirâh a paduah haipa; ama chhôhkha châta a s aduthliena zydua , alahpinô nata asawna apaphasaipa ta a hropapuapa hry liata âhlao thlâh hapa kha a châta cha, “Chhôhkha apaphasaina pasichhihchaipa” a châ ngaita kaw dia!!

Apachâna cha vaw zoh ta, apalôh cha â vaw cha-ie chahmy pathaopa ta pahno ta. A palôh pasana, yruna nata lôhliena ta a palôh ataolana nata hmah apaphaona dâh cha tao thei rihmâ awpa châ khao vei!! Pawpipa kô 70 a hlei hapa châta chhao hro heta “châmaih” a chakaih ta, “hmah apaphao thei” thlâh ha chyh tlai na. A palôh akaw cha-ie chahmyh ngâpa chata alahpi nata a sawna ao apatheisapa ta pahno ta, a mothli tla ngâpa hry ta a ku liata nohthlapa vaw y thlâh hapa chata a pachâna khizaw tawhtapa cha hmeiseihna khizaw lâ kuah kheipa ta, Puhpa Thalai cha ao-tlilihta kaw cha papua haw ta. Atahmâ cha, cha O paroh kaw bâpa chhôh liana chata, cha pawpipa chana ao deileipa cha pyu hropa thei awpa rai y vei. Cha O chadôtuhpa râh chhao chata, cha pawpipa, ngiachhie a chhih kawpa taona nata vâsâna cha apahnokhei ha hrapa ma a châ ha ma? vatiehpa lo khôlôpa deileipa ta la pyury rai papua vei ei.

Mylâ vaw tlô heih aw ta, a ualuapa ta zâlâ noh chhao a tla heih tlai aw. Cha su nata chheipâ râh chhao cha nohtla ngâpa ry liata apawngiana zy chhaota âpakaih heih tlai aw, châhrasala, Puhpa Thalai châta cha, cha daihti vaw tlô awpa cha, “Ngiaroh a chhih” aw ta, tlô byuh âchhi lei kaw aw dia maw!!

Cha su, alahpi nata sawzy ta zâlâ nohtla ngiapa hnôhchhy ta, hrozô ama khôhsaina su liana cheingei chata “Lei Hro” hmiachhypa ta, a khizaw khophie “Saduthliena Khizaw”, Zâlâ nohtla ngiapa ta avaw paduah heih awpa cha, “Ngiarohna nata tlô ngiatiah leina” â kho thlâh hana chôta vaw hâ papua heih aw ta, cha cha a Khizaw châ ha tlô ta!!

Châhrasala, cha SU cha, a lahpi-sawzy chhao nata a khizaw, “A saduthliena Khizaw” liata amâ tyhna su y chhôhpa châ tlô ta; Cha ‘Lôhliena Tlâh’ cha kiah papua thei hrasala, chô sai thei khao tlô leikhâ ta.

- Robert B Syuhlo, Siaha