Palôhrupa Miano

- Robert B Syuhlo, Siaha

He hawhna heta vaw châ ta, chyhsa hropazy ta Malaysia, London, USA ama ‘Phone’ ngâno ta zy; facebook, gmail, ipad, iphone nata mawtaw pua thieh chaipa chôchâhzy ama rei ngâ nona chata, keimo sahlao, thotlâhpaw lia chhaota heih alyu lei viapa, Mawrâh liata Tipo laichaipa cha Rih Tipo a châ tahpa liata a tlaitlaoh ngâpazy châta cha khizaw he buah chaimâh ta. Globalisation nata NLUP-zy hlâta thapaw kawpa ta eima chhâmei cheingei lômathu liata liahsa kei chakawh khaipa ta eima raopa zy chata eima tha papaw via ta. Ngiadih-O, Nôhmeinô chapu tieta liata lômathu a tlychakapa ta, eima râh châta saduthliena eima hneipazy reipa ta, eima tha vaw pasa kaw tyh hra ta. Opa paw ta, “facebook ama tahpa chhao he keimo rietheipazy châta a thôkheina châ hmeiseih heih bao vei” tahpa a rei ngânona khata khâpa ma ‘facebook’ cha pahno pyly hra mah pi. Sawhkhâ hmahlana thiehpa khiahma a châ heih tahpa cha eima palôh liata lai chai ta, âdo eima vaw ta kaw tyh hrapa kha châ ta. Riethei chiehpa nata hmo pahno chyh chiehpa ta vaw pih pi ta, rietheina a baichha lymâna chôta vaw laiseihpa ta, hneina a baichha leipa ta daihti ta maniah a khôsai lymâpa hawhta khâchâ pachâna eima za hnei tyh.

Râh hmahsiena thâtih ama reipazy chata eima tha papawh ngaita tyh ta. Anodeikua hmahsiena âzaw ta âzaw tyhpa deikua hawsaihpa hawhta aly hrih sala tahpa cha eima khona dâh za châ ha tyh ta. A chhâpa chhao khâ hropa vâta châ leipa ta, âzaw ta âzaw nahta cha miah âzaw pakhô ha tyhpa vâta a châ. Baonazy chhâ a hnabeiseih hra tuah ei si tahpa ta saduthlienazy cha ramâ hawh dei za châ khai ha tyh ta. Vaozy leipa ta lyuzy tao tyh hr’ei sih la, eima kô kha hriapapuapa ta eima khih liata Ruling Party Unit liata manôh thlâhthlipa hlaopapuapa zie chhao hria papua tlô pi vâ! Chavâta Politics a zawthlupa ei châ.

Ei chhôhkha sanaw-rinôzy ta hnabeiseihna lai kawpa hneipa ta Pawlitiks ei khaihpa cha na khokhei kaw ei ta. Anodeikua, ‘Opposition’ liata kô hrawh hlei ei y tawhta deikua eima hnabei a dy ngaita kaw bâpa kha za châ ta. Chhôhkha, lahpi nata saw, pôhpa pachiahpa a hnei khai thlâh ha hrapa, heihzy hawhta hmo khopa a hnei khai thlâh ha hrapazy hmiakha leina kha a vaw pasa kaw tlai na! Noh zakha ahlaohna a vaw pua nota eima thapaw dâh rimâ kha, eima khih KNP ta Pachhana Camp liata Speaker awpa ta Dr.Manmohan Singh hrua awpa ama kho kawna bie ama reipa chhao kha mao veih ei; ano tluta pachhana bie rei thaipa y ei sala angia vei. Châhsala, he hawhpa ahlaohna avaw pua tawhta eima khihtlâh hro anano pathao hapa deikua hmopha chaipa za châ pyly vei. Thotlâh pawzy chhao he Khihpi pawzy hawhta hrophana a tlaichhai hrapa châ pi ta, lyu tao eima bâsai thlâh hapa chhao kha mao ma pi.

A châ tlai na, eima khih Awhby tiepa tawhna khata khizaw he vaw sai tyh hra pi ta. Eima khih zawpi pazakha dâhdeipa hry tawhta so atah patluapa keimo sahlaozy pi khata eima râh hro cha a siechhei hapa ta pahno pi ta, eima râh chhithatuhpazy chhaota eima râh ryureina Opipa liata ama chhôhkha beina râh ama paduah haipa ta hmô pi ta, eima râh Py nata Awnanopa chhôh lia taihta chhaota Adona nata ngâchhihna a châhkhei ngâpa ama y khaoleipa ta eima za hmô tyh. Eima khihpi liata Concrete-O eima hmôpazy chhao cha Nieparuna tawhta sapa nata paduahpa hawhta eima za hmô tyh.

Vâhneichhih kawpa ta, kô hrawhhleikha tlai Opposition liata riethei eima tao tawhta Sawhkhâna cha keimo Party ku liata vaw y haw hra ta. Ngiadih O puasaipa ta khihpi liata eima O-hmo thiehpa liana chata Concrete-O lai katôpa vaw paduah haw hra na ta. Eima Party zawh a zipa ta Contract chhiehrupa nata ei sawnah amâ phuphia leipa pita sawhkhâ rai ama hriana hlao tawhna chata ahy thângiah leipa ta khihsana khochhihpa cha vaw paduah haw hra na ta. Nie tiah lei baw tiah lei Khazohpa ngiachhiena vâta ei vaw hnei ha bâ hra. Hmo no-âh a chhih kawpa deikua cha he hawhpa duahmo liata ei vaw duah tawhna heta ngiadih O tawhta pachâna khizaw eima vaw paduah tyhpa nata hmo eima vaw sai dâhzy kha âvaw dolei kawpa ta ei pahno haw.

Eima râh cha a siechhei hleileipa ta pahno haw nah ta. Concrete O-zy chhao nieparuna tawhta sapa châ vei tahpazy taihta ei pachâna liata â zâ rie pathao haw. He Concrete O lai katôpa tawhta ei za rohpadyna liata cha thotlâhpaw ta Khihpawzy amâ kho thei leina chhâpa cha ama thathipa vâta a châ tahpa za châ ta. Keimo Chhôhkha kô kha chhôhta âhrâ eima niepa chhao he hmahta laina khi a phapa châ ta, thotlâh pawzy heta tiama kawpa ta hria mawh ei sala cha daihti rei leipa liata amâ duah papua hôlô aw tahpa zy, sawhkhâ baona amâ hnabeiseih khao lei awpa ziezy nata ama hria papuapa tawhta O nata lyu phapazy hnei thei aw ei ta, mo hropa nieparunazy reih hoh khao aw vei ei; cha hawhpa duahmo liata amâ vaw duah khai tita cha ahy saw he hmahta hmo doleipa tao kho khao leip’aw ei ta, chyhsa hropazy hmo doleipa taopa chhao reih hoh khao aw veih  haei tahpazy cha ei pachâna za châ ha ta. He zydua he khazia ngiadi-O liata ei pahrâ nona khata ei pachâ pha vei tly i? Ei hru parei dâh rihmâ cha! Eima opa paw ta kô khophie chhôhta Awnanopa tlôh a kia pakhôpazy kha vaw uahva kaw tyh na ta, atahmâ deikua kei khichhaipa tlaina he ei tloleina mypa ta ei yna Vaih liata alâluah chaipa pakha ei vaw châ haw. Khâpa byhnâ rihmâ chata ma miah vaw tlôthlu ha tly keimo chhôhkha hi?

Anodeikuala tahpa he y leipa châ ha mawh sala hmo phapa nata hmo dopa vaw tlôpa thokha he la hmô thlyu aw ma pi. Karl Marx khata ngiadih-O palôhrupa vaw phao vei mawh sala, raihriatuhpazy chhâ a châpatuhpa, ‘Labour Law’ he vaw y leipa aw ta. MK Gandhi chhao khata ngiadih-O palôhrupa vaw phao vei mawh sala, South Africa lâ sie leipa aw ta, Champaran lyutaopazy bao hra leipa aw ta, India ta khotalaina chhao hmô ngyu aw vei. Abraham Lincoln kha ngiadih-O liata vaw laiseihpa châ vei mawh sala cha, Usain Bolt-zy, Barack Obama nata Beyonce Knowles-zy sahlaopa he Pâpuh Tom Chapu (Uncle Tom’s Cabin) liata hazoh mokuh chhao khaih leipa ta nohlychhiki thlaisâh chhaota morâpaw châta raisâhsapa ta ama leidia thlâh ha thei mâh my! Maniah Pachhatuhpa, eima Beipa Zisu Krista tlai chhao kha Ngiadih-O pachâna ahly kheipa ta vei mâ Bethlehem Viachao-O lia avaw pih vei tly? Ngiadih-O pachâna chata Byhnâ vaw tlôkhei ta, hmo to âvaw thla khaipa a châ.

“Kheikhaw!! Ei hra haw..” kei he liata so âtah kawpa ta dyuchhai naipa chô tawhta ei laiseihna mypa ta, rietheipa duahmo liata ei duah nota ei tao theilei awpa hmozy chyhsa hropa pa taosa awpa ei chhuah tly? Khâpa ma châ ha na ta ? Ahy vâta he hawhpa duahmo liata a duah theipa ma ei châ ha tly? Cha ei vaw palai patoh dâh rihmâ cha i! Ngiadih O liata ei kei liahsa pakaipa ta, lômathu tlychakana chôta râh kyhpachâna ei hnei tyhpa nata tha ei vaw pasa tyhna khata hro taopathi via ta. Hmo dopa nata do leipa chhao ei pahrua thai viapa syulyu tlai na.

He Concrete-O tawhna heta la Opa sawzy nodi dâhphi chana ao chhao thei khao leipa pi ta. He dyuchhai naipa chô tawhna heta la byhnâ to avaw nao tu ha na. Eima laikathi liata hnaihny eima pachôpazy cha paphôhna chôta laikathipaw ta vaw pathai chhy ha hrasala, uasa khao leipa pi ta, eima ie-O khôpathlapa roh chhie ngaitapa zy, eima I laikatôpa, zâchota ngâ thai kawpazy , eima satliapa, ahy saw za leipa ta buabâna a tao tyhpazy nata eima laihsa, zâcho aw khota avaw di tyhpa pathlietuhpazy pyu nata ry palopasa zie zy chhao vaw pahno khao ma pi. Ti nata râh tha apasa kaw tyhpa kha khataihlia e a y haw?

Ei vaw puana a mohnao thlâh hapa he ahy ma ei châ? Ngiadih-O liata ei pahrâ nota ei tao kho leipazy vaw tao ha na ta, ei chô liata hmo a vaw tlôpazy cha Byhnâ tahna ta. Anodeikua ei thlapa avaw leidia daihmâ ha he zaw! Kha he ei vaw puana su lâ kua bâ heih tuah sâh. Hmotao awpa hnei hluh tlô na ta, Ei râh châta adona poh a saipa ta, ngiadih-O palôhrupa, apanawhna hro hneipa ta thotlâh lâ kua heih tuah sâh tahpa ta ei palôh kuchhapa cha pachhuahpanoh haw na ta.