Literature : Chi nata Pho abohna hleidy

- Robert B Syuhlo, Siaha

Indian Sociologist mohpathâh kawpa, MN Srinivas ta mohchho sâkha, ‘Westernisation’ tahpa vaw papua ta, a chhopasiana dâh ta cha, ‘Westernisation cha British ta India kô 150 hlei âvao chhôhta India Chyhsa a thaiso viapazy ta British hrozie kyh totie liata amâ mopâna khana a châ e’ vaw tah ta. Cha notla Phopi hrozie hâ alana chata India râh,  zohna ta a khu haipa cha aphana lâta chhihthapa ta, ama nôchâ hrozie atobina dâh deita a mopâ leipa ta, ama hmo pasôpa (Value System)-zy cha ama hro liata vaw la pangia ei ta. Notla Phopi Literature liata pasaiphapa - William Shakespeare, Rousseau, Machiavelli nata Russian Literature Khizaw liata pasaiphapa Leo Tolstoy-zy nata mo hropazy bie ropa ama reipazy nata ama theipazy chata âmo liata athata raihriapa ta, ahrana (Enlightenment) vaw tlôkhei ta. Notla Phopizy hmo pasô chaipa, ama Literature liata a liahlôh chaina su atotuhpa, Khotalaina (Liberty), Chyhsa zydua he araohâh khai awpa ta taopa eima châ (All men are created equal) tahpa sypahmaohtuhpa ‘Equality’ nata adyhryh kawpa ta laizaolaona (Fraternity) chata ama palôhrupa pahnie ta, a chhihtha ngaita kaw.

India râh liata Taopathina (Reformation), India khotalai n’awpa ta zawpi hriaparaohna (National Movement), Râh kyhpachâna (Patriotism) nata Pachâna thiehpa (New Intellectual Thinking) thlihpipa kô zabi 19-na liata vaw pathlipa zydua kha notla phopi Literature ti pasohpa ama dopa tawhta vaw y pathaopa sai a châ tah ei sih la reichhei aw ma pi.

Europe râhhlypi liata a hrana rônahpa nata khizaw panano khai hatuhpa, ‘Rennaissance’, ‘Europe Pihpathina/Pih chaneina’ ama vaw tah tyhpazy chhao kha Literature tawhta avaw thaotôpa na a châ tah leithei aw ma pi. Thaina, pahnona nata sona, chi nata pho kyhpachâna liata Europe râhhlypi liata pho to chi tozy cha avaw hra chaimâh ei ta, pho rônahpa nata hmotaotheipa lâta amâ vaw lie haw!

He Rennaissance he kheita avaw thaopa  ma a châ tly i? Kô zabi 15-na rachhôh liana khata, hlâno chi so pho sopa, Greek nata Latin-zy ta ama bie nata hla (Literature) ama vaw ropa, chati-kôsy palâhâh leipa ta a ypa cha, Europe râh liata pasôpa ta achu chaimâh ei ta; Chi nata pho thapasana, chyhsapa zachhihna nata hmahsiena cha Chi nata Pho thapasana dopa tawhta a kaw thaotôpa na a châ, tahpa Greek nata Latin Literature tawhta amâ vaw chu na daihti nata pahnona daihti liata la, ‘A hrana’ (Awakening/Enlightenment) âmo liata patlôsapa ta, Khizaw liata pho rônahpa nata hmotaotheipa lâta amâ vaw duahpapua hapa a châ.

British ta India râh rônahpa âvao nona khata, India râh liata sôh nata thih, chyhsapa apahrâpa zydua khata, British sawhkhâ châbu sona byh liata Châbuzy kha a vaw kho chahcheita vei ama vaw tah tyh cha maw! English Bie nata Hla liata pawhrâchaipa hry liatapa, Geofrey Chaucer, William Shakespeare, Rudyard Kipling nata mo hropazy cha British sawhkhâ ta notla tiah leina râh liata ama Beina râh (Empire) hlâta ama sôh via vaw tah tyh ei ta. Ama râh avaopa hry liata amâ palaina chaipa nata Britons hmotao theizie palâsatuh chaipa ta ama vaw rei tyhpa, India tlai chhao he hmahta, ‘William Shakespeare nata a ri awpa châ ha mawh sala, Shakespeare eimâ tlyh via aw’ ama vaw tah tyh cha maw! Literature hmotaotheina ama vaw pahnopasia ngaita kaw tlai na!

Khâpa vâta he tlupo ta ama bie nata hla a thaipazy avaw pasôpa ma ama châ tly? Literature hmotaotheizie la ama vaw pahnopasiatu ha. Khizaw tyhreihna nata nôpo pachârôhna hry tawhta amâ nyuna cha, ama bie nata hla vaw châ ta. Adyuhna liata tiahpa ta ama y nota nata daihnypa ta ama y no chhaota, thathiehpa nata hnabeiseihna thiehpa chhaota amâ kaw duah papua heih theina cha, ama Literature pyly a châ. Khotalaina ama tlaichhai nota Literature liata hmô ei ta, ama ti nata râh hneirôna nata ama râh ta â vaopa râhzy tawhta sôh nata thih ama la pangiapazy chata thlalôhna pie thei leipa ta; ama bie nata hla liata pylyna amâ chhai ha heih tyh.

PB Shelley, Bie nata hla khizaw liata Awhsi khaih ngaitapa pakha khata, “Hlaphôhtuthaipazy (Poets) he â lâ theileipa liata khizaw dâh nata phôh a taotuhpa ama châ” vaw tah ta. Ama bie nata hla,  ama châ ropazy chata a râh zawpi hro taopathi ta, ama chi nata pho laiseihna kyh liata chhâhchabi hmiatuachaipa - reih pabohsa ta, ama pachârôh nôpona daihti liata amâ chhai n’awpa ta ama bie nata hlazy cha hmâh tyh ei ta. Cha chata thathyuna, tiamana, riahphana, adona nata ngâchhihna chhaota râh chakao khohna a sapapua tyhpa a châ. Chi nata Pho ngâchhih leipa nata riahchhiepazy ta Bie nata hla phapa hnei beih vei ei.

Marasawzy chhao eima pihkheipa Reih cheingei ta ‘Châhnawh’ eima vaw hneina chhao tahmâ cha kô 100 hlei tlai avaw pha ha bâ hra. Châhrasala, khâpa duahmo liata e eimâ dua tly ? Bie nata hla, châ ta ropa eima hnei hluh leipa vâta vei mâ atahmâ taihta zyhna kyh liata chhao rai châ sala, âphawhlawpa ta eima y thlâh ha chy vei ? Bie nata hla phapa rei awpa eima hnei leipa vâta vei mâ chi nata pho liata eima sia thei mâh vei ? Literature liata eima sipasa kawpa vâta vei mâ pitloh thlâh ha tlô ta, hawtipa reih a cheihpa eima châ vei i? He vâna heta vei mâ eima reih he a leidia hai vei tly i?

Chi hro pho hropa Literature ahlyna chôta la, râh rônahpa tlô leipa aw pi ta, chi nata pho liata sia aw mah pi.

Eima reih a leidia ngâhaipa chôchâh liata, “Chata vâ, khata vâ” tahpa ta a ei ngâ hra ei sih la, a liahmaripa deikua cha, “Literature liata na eimâ vaw hnai tu ha” tahpa pyly he a châ ha tyh. Khatita ma eima reih cheingei ta ropa, Marapa pachâna tawhta puapa bie nata hla, Marapa saina tawhta ropa nata Marapa chhôhso liahmaripa tawhta a puapa pachâna aphuahluahpa bie nata hla eima rei thei hra aw tly? Reih liana heta pho laiseihna nata hnatlâhna a y tahpa pahnopasia ei suh u.