NOH HNÔHPA LIATA HMO TLÔ AWPAZY NATA TAHMÂHLÂ KHIZAW

~ Abie Nôtlia, Siaha Vaihpi.

Krizyhpazy ta eima daihti hâ chaipa, Zisu Krista avy heihna daihti a vaw tlô chy ta, hmo atlô awpazy nata noh chhâna daihti a vaw tlô chy ta Khizaw ydâh n’awpa Bible ta a reipazy pachâpa ta cha, atahmâta eima daihti hmâ ngâpa he a vaw reih chhielie tahna chhao a châ thei aw. Noh chhâna daihti vaw tlô awpa chhochhieliena achupasiatuhpazy he Theology pachiahpa sâkha Eschatology tah ei ta, âmo heta he hawhpa lâchhâh hmozy he alaichadaipa ta amâ chupasia tyh. No hchhâna noh a vaw tlô chy ta hmo avaw tlô awpazy nata hmo nanopa avaw y awpa Bible ta a reipazy he kao thôh ta vaw pachhaih tua ei sih la.

1). Chyhsapa hrozie nata khisa n’awpa dâh â nano awpa zie:

 Moleina â pôh awpa zie Mathai 24:12 liata hmô pi ta. Tahmâhlâ eima râh liata chhao kao hluhpi liata moleina he â pôh ngâhai tahpa, nohcharei ta eima hmo hmôpa nata nahkhaoh ta eima thei tyhpazy tawhta eima pahno chyu.

 Khizaw pôhpalôhpa saipa ta chhochhi cha moleina pôh zie he rei tiah awpa chhao châ vei. II Timawthy 3:1-3 liana khata daihti chhâna avaw tlô awpa chy ta chyhsapazy molei dâh n,awpa zie vaw reih ta. Ama y dâh n’awpa taihta a vaw reih chhielie ha hra. Sasyh kyh â pachâpa (Khohlei khohpa, piehpie aohraohpa etc) zy, Sôh nata thih tlaichhaipa (nieparu bawparu hmâhpa etc) zy, Apalaipa zy, Khazohpa reipachhie hmâhpa zy, nô nata paw reingiah leipa zy, alyna châh pahno leipa zy, pathaih leipa zy, pikheipa kyhpachâna hnei leipa zy etc.

Hrohso pakheipa zy, pachutuh pakheipa zy ama vaw pua awpa zie II Pity 2:1 na liata hmô pi ta.

 Atahmâhlâ eima râh liata Awnano nano nanopa, py nano nanopazy vaw y hôlôpa he a vaw reih chhieliena a châ thei ma? II Timawthy 3:5 liana khata, “Khazohpa uasa kawpa lyu aw ei ta, châhrasala a hmotaotheina cha zo aw veih ei”, tahpa eima hmô. Khazohpa a y awpa pangiasa leipazy ta Khazohpa a y lei zie thai kawpa ta ama rei tyhpa zy, ngiapâtuhpa châ tlôh ta chhômarupa liata Khazohpa y hmeiseih nahta pangiasa leipa, Khazohpa liata ngâna pahnieh leipazy reina châ thlâh ha vei ma? He hawhpa hmozy he kha hlâ tawhta vaw tlô tyhpa nata y tyhpa châ hrasala, Noh chhâna daihti a vaw tlô chyta a pôh/hluh via awpa zie a vaw reih chhielie ha cha maw!

2). Hmo tlô tyhpa, noh chhâna daihti atlô chy ta eima thei ngâthlâh ha awpazy:

i). Losihpa

Zisu Krista avy chy, daihti hnôhpa liata cha losihpa a tlô awpa zie Mathai 24:7 liata hmô pi ta, losihpa he hlâno chhao tlô tyh ta. Anodeikua he liata a rona dâh heta cha losihpa he paruna lâ a pangai via lymâ awpa zie reina hawhta pachâ theipa a châ. Losihpa he tlô hluh via laih lymâ ta, cha raohpa ta Khizaw ta losihpa he a tao pasa via laih lymâ hra. Losihpa pasa viapa nata eima pahno phapa dâh tlâhpipa 7.0 magnitude (or above) ama record pa tawhna heta eima pahno thei thlyu aw.

15th century liata 2 earthquakes

16th century liata 3 earthquakes

17th century liata 7 earthquakes

18th century liata 13 earthquakes

19th century liata 29 earthquakes

20th century liata 33 earthquakes (source: Wikipedia)

21st century liata cha pahno theipa rakha liata ei 145 tlô ha ta, tlô via lymâ awpa a lyu kaw. He tawhna chhao heta losihpa he a tlô hluh via laih lymâ tahpa â hno thei.

ii). Adyuhna :

 History eima reih khiata cha adyuhna he alâluah kaw ta. Khizaw liana heta adyuhna he nohto ta tlô ngâthlâh hapa hawhta rei theipa a châ. Kha hlâ daihti liana chhao khata adyuhna he tlô tyh ta. Anodeikua noh nata daihtizy sie via laih lymâ ta adyuhnazy he a hluh via laih lymâ. Mathai 24:6-7 liana khata adyuhna thata atlô awpa zie hmô pi ta, Chi nata chi, Râh nata Râh, akana, âthietuna etc. hawhpazy News liata eima hmô hluh kaw tyh. Century hro hropa liata adyuhna atlôpa zie vaw moh heih tua ei sih la.

15th century liata 29 wars

16th century liata 59 wars

17th century liata 75 wars

18th century lita 69 wars

19th century ah 294 wars

20th century liata 278 wars (source:Wikipedia)

21st century liata adyuhna ei 50 rô tlai a tlô hmâ! Pôhna lâ a pangai via laih lymâ nahta â lâ (21st Century he eima hmâ haipa kô zabi châ ta, kô 15 ngâlâh eima hmâh hai hi!).

iii). Chakâhna(famine): 

Râh buapa ta â chakaihpa cha Chakâhna (famine) he châ ta, hmo hropa nohkhih ananopa vâta zy, natural disaster vâta zy tlô ngâthlâh ha tyh ta. Daihti hnôhpa liata cha Chakâhna thata a tlô awpa zie Mathai 24:7 liata eima hmô.

15th century liata chakâhna ei-6 tlô ta,

16th century liata ei-10

17th century liata ei-24

18th century liata ei-28

19th century liata ei- 30

20th century liata ei- 44 (source:wikipedia)

Khizaw liata chyhsapa zy pi he pôh via laih lymâ pi ta, he vâna heta chakâhna tao awpa chhao eima hluh kaw aw. Rome daihti; Zisu Krista he Khizaw liata a charei daihti nona khata Khizaw pôhpalôhpa liata chyhsa thyza 55 rachhôh ypa hawhta pachâpa châ ta. Kô 1921-1947 chhôh liana khata Chakâhna he tlô hluh chai ta, a zydua ta ei 7 {*famine in Russia (1921), China (1928-1928), Ukraine (1932-1933) , Kazakhstan (1932-1933), China (1936), China (1942-1943), Soviet Union (1946-1947)} tlôpa liata chyhsa thyza 18.8 – 26.5 rachhôh thipa hawhta alaichadaipa châ ta, 1959-1961 chakâhna Great Chinese Famine liana khata chyhsa thyza 36 rachhôh thipa hawhta ropa a châ hra.

3). Khizaw liata hmo ananopa avaw y awpa zie reina: 

Israel nahzy cha daihti reipi sei châna liata a tâh ei ta, Hitler daihti no taih khata sei châna lia ama y tah thei’pa a châ aw. Daihti khachâ rakha ma bei hneipa ta vaw y tyh hra ei sala, daihti chhâna noh a vaw tlô chyta cha Israel paduapathi heih awpa a châ zie nata Zerusalem cha buana (turmoil) liah-marih, a chheipâh râhzy nata Khizaw châta a châ awpa zie Zakaria bo 12 na liata hmô pi ta, Khizaw râh nano nanopazy ta Israel chi nata pho amâ bai/la awpa zie chhao eima hmô. Daihti hnôhpa; Zisu Krista avy chy ta sona nata novâhna a pôh awpa zie chhao Dania 12:4 liata hmôpa châ ta, athmâhlâ Khizaw thaina nata sona liata hmahsie zie he rei tiah awpa chhao châ vei. Â zaw ta maniah â zaw pakhô ngâhai. Novâhna nata sona pôh lymâ ta, achuna su hluhpi a pôh laih lymâ hra. Pôh viana lâ pangai via lymâ awpa chhao ta â lâ. He hmo heta Khizaw hmia thata panano ta, cha raohpa ta hmahsiena chhao thata a tlô lymâ hra. 

Mathai 24:5 eima reih khiata cha Zisu/Mesia hawhta areihpa chyhsa hluhpi ama vaw pua awpa zie a roh ta. Atahmâ eima duasu liata Zisu hawhta areihpa, Zisu hawhta amâ chhypa chyhsa he khazie tlaima ama y ha. 18th Century rachhôh liana khata Ann Lee (1736-1784) cha Zisu, Chanô hawhta vaw pih chanei heihpa hawhta areih ta, pazituhpa chhao chyhsa hluhpi a hnei. 19th Century rachhôh liata chhochhi cha Zisu hawhta areihpa, Khizaw pahnopa ta aphuahluahpa chyhsa pasari tlai ama y. Cha nawhzy cha John Nichols Thom (1799-1838) zy, Arnold Potter (1804-1872) zy, Jones Very (1898-1968) zy, Bahaullah (1817-1892) zy, William W.Davies (1833-1906) ano chhochhi he cha Khazohpa hawhta areihpa ta, a sawchapaw vaw pihpa chhao cha Zisu avaw pih chanei heihpa (reincarnate) tahpa ta a reih. Mizra Ghulam Ahmed (1835-1908) he Islam chyhsa Mesia hawhta areihpa châ hra ta, Lou De Palingboer (1898-1968) chhao kha a châ hra. 20th Century liana chhochhi cha chyhsa syno nata pakha (21) rachhôh ama y ha! Tahmâta duahmo lia chhochhi cha ama hluh chaimâh bâ. Khizaw liata alâluah viapa cha Brazil liata Inri Cristo atahpa khi châ ta, Pazituhpa nata achhytuhpa chhao a hnei hluh kaw hra.

Gog/Magog:

 Gog/Magog chôchâh he Biehrai parohpa Ezekiel bu nata Biephuahpa liata zy nata Quran liatazy hmôpa châ ta. Daihti hnôhpa liata sawkhâ nata sawkhâ apakaohpa adyuh awpazy châ ei ta. Biephuahpa 20:7 liata cha râh hro hropa apazaopakhy awpa zie nata goga nata magog cha dôveipa ta adyuhna lâ liata achhipa ta ama y awpa zie, chyhsa hluhpi ama châ awpa zie hmôpa a châ. Gog/Magog he Etymylogy (study of origin words) lâchhâh deikua pahnopasiapa châ leipa ta, Bible ta râh moh a ro dâh nata tahmâhlâ ta râh mohzy he a lyu hra vei sala râh location tawhta khei hawhpa râh ma châ ei ta, apazaopakhy awpazy cha tahpa he athaisohpazy ta amâ laichadai ngâthlâh ha tyhpa a châ.

Ezekiel liata eima hmôpa hawhta râh a reipazy nata tahmâ ta râh mohzy cha; Meshech nata Tubal cha Russia. Persia cha Iran, Cush cha Ethiopia, Put cha Libya, Gomer cha Turkey, Beth-Togarmath cha Armenia nata Turkish reih ahmâhpa Asia Middle East liata râh thokhazy he châ ei ta, he nazy hleikhô ta Khizaw râh hro hropazy cha khachâ rakha ma apazao pakhy ha bâ ei ta, Ryureina sâkha, ryureituhpa pakha ry liata eima y lei chyu chyuhpa a châ bâ. He zydua he Zisu Krista ta nawh azeih pathaona a tahpazy kha châ ta, Â vy heihna daihti he â hnia kaw bâ tahpa â lâ. Nawh â zeih ha khiata cha tâtâh (hawsaih) pih mâh lei hrasala thlaita a pih aw tahna châ ta, cha hawhna chata âvyheihna daihti vaw tlô awpa liata hmo atlô awpazy cha a tlô pathao laih ngâkaw bâ.