Atahmâhlâ hmo yzie

~ FC. Chhuasa.

Kelkang nata N. Vanlaiphai, a khih yna dâhdei chhao ei patua-palua thai leipa liata ahrana atlô ngâhaipa thâtih zy, Tipa liata ahrana thâtih zy he ei pangiasa leipa pi heta thei chanei ngâthlâh ha na ta. A pha nata phalei tlyma, â do nata do lei tlyma rei awpa sâkha hmahta ei khoh vei tlyma, Facebook, T.V. News Paper nata khiliah bielôhawhpa reina suzy liata hmô na ta, ei thei chanei ngâthlâh ha tawh cha, palôh liata hmo a vaw lâpa y hra ta, (Chyhsazy chhao Khazohpa bie khâpa ta tlyma ama rei khohna maih ta, ei palôh liata a vaw lâ ta ama tah tyh hra vei ma?) ei vaw reih chakhyh hra aw.

Eima hro a vaw rua kaw sai

He ahrana thâ ei theipazy tawhta ta ei hmo hmôpapuapa cha, Mawrâh nata Mara râh Krizyhpa pi he eima hro vaw rua kaw sai ta, eima yru kaw sai ta, keimo liata bie hmeiseih hla hmeiseihpa y tlâ leipa ta, yna su a-ipa hnei leipa pi ta, â zawvo chakhyh thlâh ha pi ta, a pahlawpahlô thlâh ha pi ta, eih-uh eima tah chakhyh thlâh hapa ta ei pahno.

Eima thlahpa/palôh heta Krista tlua leipa ta, hmo no-âhpa nata y patluapa tlao tlua ta, Thlahpa Pathaihpa cha eima thlah miah palôh awpa ta eima hnohta tuapa a châ nota keimo cha a pachhipary n’awpa ta hmâh pi ta, Paw Khazohpa ngiachhiena nata Kyhpachâna a chhâ thai leipa cha, pachhâ s’awpa eimâ chhuah tyh! Zisu bietana hnôh chaipa, ‘Khizaw zydua liata sie ta, Thâtihpha chho awpa’ hlâta cha, hmo hropa eima vaw buakhei via ha tyhpa ta ei pahno hra cha maw!!

He hawhta eima yna chhâpa

He hawhta vaw y pi ta, phôhpa lahpa lâta tlei khai ha pi ta, ‘Zisu ta a reih’ tahpa hlâta cha, ‘Ano ta a tah’ tahpa liata a pahnieh via ha pi ta, a ziza hiahza liata eimâ zawvi zawvâ thlâh hana chhâpa cha BIBLE na eima vaw reih hoh tyh vei. Hmeiseihta ta la, keima chhao, mo hropa chhao, eima râh Krizyhpa pi he BIBLE na eima reih chyh tu ha! Lâthlôh miah chhotuh chaipa, eima sie n’awpa dâh, eimâ chapia-chapô thei awpa hmozy miah chhotuh chaipa BIBLE eima uasa lei tawh cha, riari ngâthlâh ha pi ta, eima no vaw raih tyh ta, eimâ palâ-palao ngâthlâh ha tyh he zaw?

Chatawh cha, pyury pha viana lâ maih ngai pi ta, cha lia deita cha khiah ma Thlahpa Pathaihpa a y eima vaw tah ha heih tyh. Cha hmo chata eimâ Achhyna-O zy miah pasiesaisa ta, su hropa miah a pangaisa tyh.

Ahrana eima khoh

Eima râh Awnanopa he ahrana a khoh leipa châ hraoh ma pi. Tlâh to nata su to tawhta ahrana he hiah chyu tyh pi ta, â raohpa ta la châ thlyu’ vei, nodeikua la, Maraland nata Mizoram tawhta ahrana eima hiana ao he chhô nata zâ ta vârâh a tlô pazao ngâthlâh ha nahta ei pangiasa cha maw!

Khazohpa he keimo hlâta A Awnanopazy amâ hra awpa a khoh via heih nahta ei pangiasa cha maw! Cha khiah khazia e tahmâ taihta ahrana cha a tlô mâh leipa hawhta eima pachâ ngâthlâh ha tly? Eima mokhâh dâh, eimâ hnabeiseih dâh nata a tlô n’awpa su hawhta eima pachâpazy he â su tlah maw? Biehrai lia kha la, tilaipi kiah lia zy, Jail liata zy lah ahrana kha tlâ a tlô lah khâ!

 “AHRANA” yzie chhao he miah hiahri chyu ei sala, eimâ chhyna dâh chhao â lyu khai tlah maw? Ahrana yzie he eima pahno tlâ leipa tlao vaw châ khia maw?

 Kei ei pyna dâh ta la, chyhsa ta Khazohpa bie hawhta a noh to hro a hmâh lymâ khiahta la, cha chyhsa cha ahrapa hawhta tlâ ei pachâ!!!

Moleina to thabypa

Moleina thabypa eima pahno leina he eimâ hra thai leina châ khiah ma i? ei tah pâ kaw tyh. Thokha ta, Eden sahdô liata theilâpa khiah ma tah pi ta, thokha ta Ada nata Ivy paraona kha khiah ma eima tah thei aw. A vaw châ tlâ bao vei! 1Timothy 6;10 liana cha, “Tâkâ sôh tlaichhaina he moleina to thabypa châ tlôh ta……..” tahpa â roh cha maw.

 ‘Moleina thabypa’ chhao tah vei “to” tahpa a pahlao pâ cheingei cha maw! Khaih aw…. Heta a châ khiahta la, Maw râh nata Mara râh Krizyhpazy pi he ahra thei rimâ’pa châ ma pi. Tâkâ sôh tlaichhaina mokuhti hiepa ta y khai ha pi ta, Krista buakhei leipa ta tâkâ buakhei khai ha pi ta, a thâtihpha buakhei leipa ta, sôh tlao eima buakhei khai ha he zaw! Mathlai chhaota nie a hmô awpa tahpa eima châ nota, thadâh kawpa ta nie pahâh chaipa sai nie awpa khoh ha pi ta, tâkâ ta eima mo miah a pazoh khai haw. Ahra thei rimâ’pa châ ma pi. ‘Moleina to’ tah ha tlôh ta, Tâkâ tlaichhaina liata eimâ ao ha khiahta la, moleina to liata eimâ ao khai ha tahna a châ.

Atahmâhlâ hmo yziezy he BIBLE tawhta a chu via ei suh u.