KTP Mararâh liata âvaw duana dâh - By - Kristazi Hnaihly, Saikao

1.   Chhaoh-lei puapa nata ie hryta chi phapa a vaw rie:

     Kô 1946 Krisma daihti liana khata, awnanopa vâtlâhta Saikao khih liata kyhchhina tao ei ta, Awnano Hyutuhpa zy nata Satlia reingiah viapazy ta chôtla ei ta. O tota lao khei’pa vaw byuh ha ta. Lao khei awpa ta Laihsa zy chho ei ta, ama nô thokha ta, “Tlosaihpi nie awpa cha ma eima sawna nama vaw chho thlâh haw” ama vaw ta thlâh haw. Puhpa H.Zacho (L) cha ano-âh ngaita ta, Puhpa NT. Leipô (L) chhaota amâ chhyna dâh cha apathi vaw ia tu ha ta, a tunônô NGIAHCHI vaw papua ta, Puhpa SAIKUNGA chhaota a saw Laihsa 2 (Pano) NGUNIANGI nata JINZINGI zy vaw papua hra ta. He Laihsa pathôh penawh heta Krismas kyhchhina lao cha ama khei haw.

     He tawhna chhochhi heta cha  Puhpa H. Zacho (L) pathi palôh liata khahlâ tawhta a pathi palôh liata avaw veih kôzaw tyhpa Thyutliapa Py padua awpa ângiahna zie nata Thyutliapa ta Khihtlâh nata Awnanopa liata tovyuh nata maophaohna ama hnei sâhna zie a pathi palôh liata lai via rili ngâkaw ta.

2.  Tiamana Py padua abyuh thlyu na :

      Kô 1947 Kô thiehpa my liana cha Pihnô N.Chiapy (L) chata, Puhpa H.Zacho (L) lâ charei ta, “Napaw Paw, nâ kheihta ma na pachâ tly, atahmâ nota khihtlâh mohôh-na ama tahpa he y taraw ta, he he cha, ama hoh châhta tao ei ta, awnanopa lâ tawhta Py khâpa chhâ ma a y leipa la pha thai thlyu vei" tah ta.

      A bie reipa cha, Puhpa H.Zacho(L) nahkhaoh avaw ngia ngâsâ ha ta, “Chata a châ khiahta la Satlia Laihsa uhtheipa zydua awpakhy sih la, Py cha padua thlyu awpa na a châ” tahpa ta achhy ta. Cha hawhna hra chata Puhpa Zacho (L) chata a pachâna pasoh ngaitapa hmâpa ta eima khihtlâh nata Awnanopa ta ângiah ngaita kawpa ta a pahno tyhpa nata a palôh liata avaw veih kôzaw tyhpa hlao patloh awpa ta Satlia nata Laihsa zy pakhypa ta hmah athata  vaw la ta; anodeikuala Py moh awpa deikua a norai ngâsâ ta.

3. Py padua n’awpa Moh châta Puhpa H.Zacho (L) ano araih ngaita  :

        He Satlia Laihsapa Py paduapa châ sala Py moh awpa he thlaita ta Puhpa H.Zacho (L)chhaota pahno thei leipa ta, anoraih ngaita ta. Cha daihti nota a palôh liata avaw ypa cha ‘Scout nata Girl Auxiliary’ châ ta; anodeikua cha hawhpa cha awnanopa hlâta cha khizaw hmahsiena lâta ahlaohlipa châ ha ta. Eima kiapâh liata Baptist Church Hiakha liata Christian Endeavour (C.E) ‘Azaona Py’ tah ei ta. Mizorâh liata Thyutliapa Py rai ta aduah mâ hra leipa ta, a mopâ awpa avaw sôh ngaita kaw. 

       Chatanachata Uhthei via penawh zy asaohiah laihna chôta eima Missionary-nah Rev A.B.Lorrain Foxall nah nôvah o lâ chareipa châ ta, “Satlia Laihsa Py, padua khoh-na hnei pi ta, Py moh bi awpa eima pahno khao vei, ngiachhiepa ta mongyu râh lâ Pihnô Mrs.Ball lâta châ maniah paphaopa ula, âmo Satlia Laihsa ta ‘Py’ ama paduana Moh nata ama chakao zie hawhta hmâpa eima khoh hra na” tahpa biezy cha reithlu ei ta, ama Puhpa, Pihnô zy chhaota pachâ khei kaw hra ei ta, kô 1928 liata a laihsa nota a kaw tlôpa Miss.IRENE E. HADLEY (Mrs. Ball) lâ cha châ paphaopa ta ama hiahrihpa haw.

4. Mrs Ball tawhta châ avaw tlô:

        Puhpa H.Zacho (L) nata aviasazy hnabeidyna khô lâta Patô/May 2, 1947 liata ama bie pahiahrihsapa zydua cha a siapa ta  vaw chho khai ha ei ta, amâ ly ngaita kaw. Thyutliapa Py mo châta ‘Fellowship of Christian Youths and Girls’ tahpa a châ. Mara reih lâta paliepa ta ‘Satlia kaona, Laisa kaona’ (SK-LK) tahpa châ ta. ‘Office Bearer châta chyhsa pacharu, chapaw nata chanô pavialapa atlyhpa a châ aw’ tahpa ta pachâpa châ ta.

      He Office Bearer thota Member pacharu Chapaw nata Chanô atlyhpa a châ hra aw tahpa châ ta. He chhihthatuhpazy heta apakhyna, Committee-nazy pahrua tyh aw ei ta, ama Py hmahsiena kyh zydua ama pachâ pazi lymâ aw tahpa ta pathlupa avaw châ.

Chhiepa/ June 10, 1947 liana chata PY cha paduapa avaw châ haw. Chhihthatuhpa zy nata ama châna patupa moh ama bina dâh zy :

1. President. (Luhchaipa): ZACHO HNAIHLY
2. Vice President (Abaotuhpa):   CHIAPY NÔHRO
3. Secretary (Arotuhpa) :   SAWLAWMAW HNAIHLY
4. Assistant Secretary (Abaotuhpa) :  HRAMA HNAIHLY
5. Treasurer(Sôh avaotuhpa) : KHAILO HNAIHLY
6. Assistant Treasurer (Abaotuhpa) :  THLEIPY KHITHIE

PY BIEVAOPA : 

“Na ku ta hriapa ahmôpa maih cha, na hria theipa hawhta hria teh” (BIECHHOTUHPA 9:10)

PY MOTTO : “Krista vyuhpa ta lyuhchâpa eima châ” 

(2 Kawrini 5:20)