Mara châbu thiehpa : Eima Thâtih Thokhazy

Châbu Saichhieliena (Book Preview)

Châbu moh : ‘Eima Thâtih Thokhazy’

Arohtuhpa : L.Pakhô (L)

Papuatuhpa (Publisher) : TA Chhôhu

Châbu tho zie : Tho 180

A mâ : Rs 150/-

Saichhielietuhpa – Robert B.Syuhlô

‘Father of English Essay’ ama tahpa, Francis Bacon khata, châbu he chi nano nanopa ta vaw pachhaih ta, thokha cha a chy ta tlâ padipa chi y ta, thokha cha cha-eih hlei leipa ta tlâ palâpâ thlâh ha awpa chi y heih ta, châbu thokha heih cha a di kawpa ta cha-eih ta, ano liata thatlôna lapapua awpa chi a y heih,  a ta. Châbu thokha cha a chhôh bie thokha tlâ reih ta, a chakhiehcharieh kawpa ta mopazi angiah leipa chi y ta, châbu thokha cha a bu pôhpalôhpa eima rei papua tawh chhaota pachâpazi awpa chi nata, reih chanei ngâthlâh ha heih awpa chi a ypa ta a rei. He hawhta châbu, pachâna zydua hmâpa ta, a chakhiecharieh kawpa ta nata, pachâpazi ta, reih chanei leithei lei awpa châbu hawhpa hry liata he ‘Eima Thâtih Thokhazy’ tahpa chhao he â hlaopa a châ.

He châbu moh ‘Eima Thâth Thokhazy’ tahpa he ei za reih tua chai nota cha, he châbu pachhuahpanohtuhpa, Puhpa TA Chhôhu nata arohtuhpa Puhpa L.Pakhô zy ta daihti ama vaw hmâhkhoh laihna dâh, lôhlie achhih kawpazy rona a châ na ta pangiasana za hnei tua na ta; anodeikua, a bu chhôh ei zâ ngiahnao hmeiseihpa deikua, he châbu moh tluta ama bi pasupa nata a chhôhbie nahta a hmiepa he y thlyu aw vei, ei za tah ha heih. Marapazy – sapa nata thlahpa liata eima vaw laiseihna dâh thâtih rona, chyusia kaw tlôh ta, akichochâ kaw tlôpa, he châbu liata patlôhsapa a châ khai thlâh hapa he tlao no-âh a chhih ta, a rohtuhpa thaizie nata a tiamazie â lâpasia kaw. A bu moh liata ‘Eima thâtih thokhazy’ a tahpa chhao he â vaw hmie pachaih heih. He châbu he ‘HISTORY’ châbu eima tah thei hra aw.

He châbu, “Eima thâtih thokhazy” tahpa he tho 180-ta â chhapa, atahmâhlâ châbu a puapa hry liata cha â chhana lâ he “â daih kaw” tah thei awpa châ ta, avaw reihtuh awpazy ta châbu â chhana rakha awpa ta ama saduthliepa hawh sikhuata a chhapa a châpa vâta chyhsa a sydie chhielie kaw . Arohtuhpa he Puhpa L.Pakhô (L) châ ta, pachhuahpanohtuhpa he Puhpa TA Chhôhu a châ. Copy 500 taopa châ ta, Publication Board, Art & Culture Department, MADC ta ama finance-pa a châ. Bu kha he Rs 150/-a châ.

A chôkyh phorâ (Design) a ngia kaw ta, he he Satlia HC Malsawmthanga kupuapa châ ta, mo la ta, a chôkyh eikha eima hmôpa deita hmahta a chhôhbie ta miah awsaopâ ha tah thei awpa a châ.

A bu chhôh he Bo pipa, Bo 5 lâta pachhaihpa châ ta, A Bo to liana heta biepipa eihhrâhpa hneipa ta pachhaih pachhuah khai heih ta – Bo 1-na he ‘Mara History – Ancient Period to Modern Period’ tahpa ta rei theipa châ ta. He liana heta Marapa chipho eimâ vaw thaona dâh zy, eima phôhryhpazy, eima khihtlâh nata amohôhna dâh zy, eima nohto khihsana dâh zy achyusia kawpa nata â kichochâ kawpa ta palâsapa a châ hleikhôta, British sawhkhâ ta Mararâh âvaw vao tuana dâh nata, Mararâh liata Political Movement, Marapazy ta khizaw hmahsie lymâpa liata Mara chipho abohna pachâpa ta ryureina ama vaw tei pathaona dâhzy chhao â kichochâ kaw tlôh, chyusia kaw tlôhpa ta palâsapa a châ hra.

Bo 2-na he ‘Mararâh liata Thâtihpha avaw tlôna nata Awnanopa a kaw laiseihna dâh’ ‘Awnanopa History’ rona châ ta.

He Bo liana heta London liata Rev RA Lorrain zy ta Lakher Pioneer Mission ama vaw paduana tawhta, Missionary zy chakaona ry liata Mararâh liata Krizyhpa ama kaw y laihna liata chhaichhi peimawh chaipa miakha ‘Christian Literature’ kaw laiseihna dâh zy, Krizyhna kyh liata Marasawzy hmah ama kaw sie laihna dâh zy, eima Missionary zy ta Mara chipho kyh ama vaw pachâzie zy za palâsa ta; he Bo 2-na he ‘Missionary Pabâna’ tahpa biepipa hmâpa ta za khawpa ta, Assam Chief Minister hnohta Mara Awnanopa vyuhpa ta Missionary pabâna kyh liata châpaphaopa, Document sôh kawpa, zawmarâpa ta eima hmô chakhyh thei lei awpa a za ypazy heta he châbu sôhna nata, he châbu ta pachâna nano nanopa a kaw sapapua awpa zy kaw saipa ta, châbu ryutlohpa tah leithei’pa châ vei.

Bo 3-na liana heta atanoh taihta Marasawzy palôh pa-ysa molo thai leipa, Mara History liata ngiatlâhpa - ‘Pâkao by’ liata Nochhi nata Notla Mara eimâ pachhaih tawhta achhaihna a tlô heihpa, sapa nata thlahpa liata Marasawzy atanoh taihta mia hria chaituhpa tah thei awpa – Mara Awnanopa achhaihna chôchâh palâsapa châ ta. He liana heta Awnanopa avaw mohôhna dâh tawhta kô 1989 liata Marapa Awnanopa achhaihna vaw tlôna dâh zy, Apôhkha heih awpa ta ama vaw teina dâhzy cha ‘Document/Châ peimawhpa’ nano nanopa chhaota palâsapa a châpa vâta he châbu he sôh pachaih ta; reih byuh â chhih pachaih heih. He châbu heta areihtuhpa Marasaw zydua palôh liata sapa nata thlahpa liata apôhkhana sôhzie a tu chanei heih tlai hra aw.

Bo-4-na liana heta Awnanopa ku nata phei chaipa Krizyhpa Nô Py (KNP) avaw duana dâh zy nata KTP avaw duana dâh zy palâsapa châ ta. KNP nata KTP paduana chhâpa nata kheihawhpa pachâna tawhta paduapa ma a châ? Tahpa athei ngâthlâh ha n’awpa ta chhao document peimawh kawpa nata achhihthana peimawh kawpa he châbu heta miah a pie hra.

He châburohtuhpa he chyhsa riahphapa, hmo a châna dâh hawhta palâsa ngâhpa, hmodopa nata a châpa ta a pahnopa cha khâchâ a duakhei ngâhpa a châpa ta ei pahno.  

He châbu rohtuhpa heta ‘Marasawzy sapa nata thlahpa’ liata apôhkhana he a palôh zydua ta paveih ta, khoh ta, awnanopa achhaihna heta pa ysa molo thei vei tahpa a châ ropa tawhna heta a sia kaw. Marapazy he Chi nata pho ta miah paduatuhpa, Khazohpa heta sapa nata thlahpa liata apôhkhapa ta, chipho thatlôpa châ awpa ta miah âchhuahnohnazie cha a châbu siepahliepa heta miah pahnosa awpa khoh ta; a khohpasana nata he châbu siepahliepa ta bie miah tana he Marasawzy châta cha pasyuna, zyh hialia awpa chi a châ hra.

A chhâ chaina liata cha, Marapazy châta Pahnona nata novâhna bie sôhpa, chyhsapa lathli liata a ypa, he eima lei sapa a thi raohpa ta leidia thlâh ha hra awpa kha Puhpa L.Pakhô khata he châbu hmâpa heta khâchâ vaw patupa ta, chhâ vaw y lymâ awpa châta vaw paso ta, cha pahnona nata novâhna cha atanoh keimo hnohta he châbu siepahliepa heta hlâ pachhuahpa ta a za y ha bâ heih aw. Puhpa L.Pakhô ta he châbu chhôh liata ryusôhpa, Marasawzy châta a pasopa he pakhâta ta reih ta, achu ta, eima pahnona opyh pakawh via awpa ta he châbu he chalei chyu ei sihla, reih chyu ei sihla, pahnona cha â hlâ pachhuah lymâ ei suh u.

Ei châ ly kaw ei