Article : US nata Iran likah ziza vâta India Economy ta kheita rairuna â tyh aw?

Khizaw râh nano nanopa lâta tikâtheipa paphaona lâthlôh lai kawpa, khizaw ta â ngiahpa zakha liata syno (20%) paphaona lâthlôh, ‘Strait of Hormuz’ chaby liata US nata Iran likah ziza a sâh lymâpa heta India sawhkhâ ta India Economy duasu hmah pasiesa chatlie via awpa ta ateikhâna liata rairuna lai kawpa a tlôkhei thei, tahpa cha India Economist-zy saina dâh nata, hmôna dâh a châ. Kheita ma US nata Iran likah liata buana ziza a y haipa heta India Economy châta rairuna a tlôkhei thei aw? Duah vaw moh tua ei suh u.

image credit : rigzone.com

Atahmâ duasu liata cha tikâtheipa (Oil) nata Fuel chaleina mâ cha âdaih thaina rakha liata y chy ta. He heta India sawhkhâ cha a sôhthih hneipazy, râh zawpi châta hmahlana hropa – Pathaihna (cleanliness), rietheipazy châta O nata lyu paduana (housing), Hnatlâna (health) nata India râh liata rietheipa Odyh zy lâta dôhlatha nata LPG piena châta a pahmâhsa thei chy.

Châhrasala he zydua he tikâtheipa mâ a nano ngâthlâh hapa nata, tikâtheipa mâ kaw rupa ta a panano khai thei. Tikâtheipa mâ he atahmâ duasu hlâta a kaw ru via tlai khiahta cha, sawhkhâ ta râh hropa tawhta tikâtheipa a chaleina liata phusâ a hmâh hluh via awpa a ngiah ha bâ aw ta; cha chata India zawpi lâta rairuna lai kawpa a tlôkhei aw. Tikâtheipa barrel sâkha lymâ he $10 ta â kaw sâhna châhki heta, India GDP che 0.4% ta tla pahnai lymâpa ta, he heta India ta sôh â phahlana cha $12 billion tlyma he hlâta hluh viapa tlyma ta a papôh lymâ tahna a châ.

Tikâtheipa thli pasoh mâh leipa mâ a kaw runa châhki heta, India sawhkhâ ta sôhdaohpa py tlyma, mopakha tlyma châta baona a pie tyhpazie pôh lymâ ta; he hleikhôta, India ta hmo a lapangiapa mâ papôh ta, cha chata India ta Foreign Exchange liata sôhthih â sopa athata lapapuapa ta, cha chata India phusâ sôhna a pahleisa lymâ hra. He zydua heta sawhkhâ ta râh zawpi châta hmahlana nano nanopa (Social Sector Scheme) a siekhei awpa zy cha athata a pazeipalie tyh.

He vâna tlai heta Union Oil Minister Dharmendra Pradhan chata hmo yzie thlai patupa ta, Abu Dhabi nata Saudi Arabia sawhkhâ liata Oil Minister-zy cha Iran liata Tikâtheipa a phaohpa Tanker sâno, Bomb ta tlahnaopa thâtih avaw pathâh patawnah khata Phone siepahliepa ta a daohpâ lymâpa ta, tikâtheipa mâ kaw ru awpa cha khôkhâh â chhuahpa ta a tei hnolo ngâkaw hrapa a châ.

India Oil Minister Pradhan heta Saudi oil minister Khalid Al-Falih cha OPEC chhihthatuhpazy hnohta tikâtheipa mâ paru lei awpa nata, a mâ tyhpa hawhta khâchâ pa-ysa awpa ta tei awpa ta âhaw ngâpa châ ta. He hlâna heta UAE Oil Minister Sultan Ahmed Al Jaber cha ‘Strait of Hormuz’ liata buana a vaw y hapa chhaota chiepadâh leipa ta India hnohta tikâtheipa nata LPG paphao awpa ta âvaw haw chhielie ha hra.

‘Strait of Hormuz’ he Iran nata UAE (United Arab Emirates) likah liata ti lâthlôh lai tu leipa châ ta, he ti lâthlôh he khizaw ta tikâtheipa â ngiahpa 20% paphaona nata India ta LPG â ngiahpa 25% paphaona lâthlôh a châ. India, heta tikâtheipa â ngiahpa 83% he râh hropa tawhta lapangia ta, he vâna heta he ti lâthlôh liana heta â pahniehna a lai kaw hrapa a châ.

Atahmâ duasu liata cha US nata Iran likah ziza vâta Persian Gulf rachhôh liata ziza â sâh lymâpa heta tikâtheipa mâ chhao a kaw pasâh lymâ awpa lyu ta, atliata tikâtheipa a phaohpa Tanker laipa sâno ama tlahnao tawhna chhochhi khata cha India châta chihuna a lai kaw bâ. Atliata Iran ta US Drone ama ka pathlah tahpa biethâh a vaw y patawnah khata tikâtheipa zuahtuhpa Company laipa, Brent chata tikâtheipa thli pasoh leipa cha Barrel kha lymâ liata a mâ 5% ta kaw pasâhpâ ha ta, he he atakô 2019 Nawh thlâpâ tawhta â sâh chaina daihti a châ. US president Donald Trump ta ziza tawhta Iran tlahnao awpa ta biepiepa papua ta, a biepiepa a supakhua heih nona chhochhi khata cha tikâtheipa mâ kha barrel sâkha liata $65 ta â kaw sâh hmâ hapa kha a châ.

India he tikâtheipa mâ chôchâh liata â duana a ichapa nata Oil Market ngâtlâh a châpa hneina kyh liata khâchâ a pachâna liata a ichapa châ ta. India nata US heta khizaw liata tikâtheipa zuahtuhpazy cha tikâtheipa mâ a thla para ngâthlâh hapa kohki ngâthlâh ha awpa ta dycharaotuhpa râh laipa châ ei ta; tikâtheipa mâ ama panano ngâthlâh hapa vâta khizaw economy ta a tao kaw, tahpa ta khâchâ amâ duana pa-ipachapa châ ei ta – anodeikua he heta râh nano nanopa tawhta tikâtheipa chaleipazie pachyhsa ta, cha chata Tikâtheipa zuahtuhpazy châta rairuna a tlôkhei ha heih tyh hrapa a châ.

He zydua vâna heta, US nata Iran likah ziza he a sâh viana lâ ngai lymâpa ta, amâ dyuh chhochhi tlai khiahta cha – India sôhbyh cha râh zawpi châta hmâpa hlâta, tikâtheipa chaleina liata hmâh hluh via awpa avaw ngiah lymâ aw ta; cha chata India GDP cha athata parai heih aw ta, India economy ta a tao ngâsâ heih aw.