Frank Lampard : Chelsea mohôhna rai he keima châta cha pahaona lai chaipa a châ

Chelsea Manager thiehpa, Frank Lampard chata â vaw khaih tyhna Club liata Coach raihria heih awpa ta a kua heihpa cha, football khizaw liata pahaona â tyhpa hryta lai chaipa a châ, a ta.

Image Credit : Skysports.com

Kô 41-ta uhtheipa, England midfielder parohpa he Pohbienoh khata kô 13 chhôh player hawhta â vaw khaihna Club, Chelsea ta ama Manager châta biehraina ama vaw rokhei hapa kha a châ.

Frank Lampard heta Manager rai a hria tawhta thla 14 chhôh cha Championship club Derby vaw mohôh lymâ ta. Chelsea Boss châta biehraina a ro tawhna heta Lampard chata, "Khâpa hmahta pahnothai leipa la châ vana. Chelsea fans zy ta nyungiapa ama khoh tahpa ei pahno. He he ama khona vâna heta ei duasu he duasu pha leipa hawhta hmô hra vana. Hmialâ daihti liata khâpa ma vaw tlô aw tahpa china hnei vana," a ta.

Thâtihbu chyhsazy ta amâ pakyhna liata, kô hluhpi chhôh a rônah kawpa ta â vaw khaihna nata, Club châta goal khô hluh chaipa a vaw châna Stamford Bridge, lâta a kua heihpa cha, a football khitlyna liata pahaona lai chaipa a châ ma, tahpa ta ama hiahrihna cha "Uh, a châ" tahpa ta â chhy.

Lampard chata, "Kô 19 a khô hapa liata he su ei vaw pangai nona chhao khata pahaona pyly a châ hra. Kha daihti nona khata chyhsa thokha ta cha ei mâ £11m kha ei phuh tlai ma?tahpa hiarihna chhao ama hnei hra” tahpa ta â chhy.

Lampard raohpa heta Derby liata Assistant Coach, Jody Morris, Chelsea player parohpa pyly chata Stamford Bridge he avaw ngai pâ hra.

Chelsea Coach thiehpa Frank Lampard, heta ‘Blues’ châta ei 649 akhaih hmâ ta, Hmypi 2017 khata akhaihna apahâsaipa ta, Patô 2018 khata Derby mohôhna rai a hria pathaopâ hapa a châ.

Derby he Premier League kia khei daihmâ ha ta. Season a khô hapa liana khata Championship liata Derby he 6-na liata kaw ykheipa ta, Premier akhaih thei awpa tluana, ‘Play-off’ liata Aston Villa ta 2-1 ta ama pahniepa vâta, Premier League kha ama kaw kiah thei khao mâh leipa kha a châ.