PASÔ VIA MA Y

- Robert B Syuhlo

Ei kha cha paw pakha heta a Car he daodo kawpa ta vaw pasi ngâkaw ta. Cha nona chata a sawchapawpa heta alô heta a paw ta Car,daodo kawpa ta a pasi ngâpa nata a chamaochahlia ngâpa liana tlai chata khâpa tlyma he roh ngâkaw. A paw chata a sawchapaw ta hmo a ro ngâpa a hmô patawnah chata hiehâh hmiasaih a chalyu ngâna chôta a sawchapaw cha ngai para ta, a sawchapaw ku liata alô cha chhupa ta pazaw ta, a kuparo cha thua ta athata pazeipa ta, a kuparo thihnia chhaota a y ngâna taihta pazei ta..a sawchapawpa cha a paw ta a kuparo a chheina vâna chata athata chapa ta sâh ngâkaw ta. A paw apielyuzie nata hiehâhna hmi chata a thlahpazoh via ngâkaw ta, hawti lôhâhleipa bao cha hnaihta a kuparo thihnia chhaota a y thlâh hapa chata sapa chieh leina piepa ta, buakha chhôhta atheihlô leipa ta ypa ta, a paw phei thaby liana chata pao haw ta.

A phei thaby liata thihnia chhaota a thy thlâh hapa chata a paw, hiehâna vâta a mo a zoh hapa mo pavâsa heihpa ta thlahzohpa ta thohna-O ngaipa ta â râkhei lymâ haw ta.

Thohna-O liana chata dawhtynah ta vaw mohôhpa ta ama vaw mohpasiapa cha, bie vâduachhihpa nata lôhpahiahsapa dei leipa cha thei awpa y vei! A sawchapaw kuparo cha a paw ta thua ta a chheina vâ chata raokei khai ha ta, patlâh thei awpa rimâ châ khao leipa ta, "Tai awpa" tahpa a châ haw!! A paw cha angiapachhipa ta nata lôhiahna vâta raithlih dei a palo thlâh ha bâ! Hiehâ a ngiapachhipa ta a sawchapaw kuparo pazeisatuhpa Car yna lâ cha a kei râ ta, a sawchapawpa ta hmo a ropa cha kei mopasia ta, Car hmia lâ O chhi liana chata, lôhâleipa kuzô tahpa â hno thlâh hapa heta *EI PÂ KYH EI CHA PACHÂ* tahpa he avaw roh thlâh ha ta!

A mohmia vaw zoh ta, a lytha vaw nai ta, a luh vaw pahiah ta, a mokhaoh tawhta a ngiapachhina raithli za zôpa cha pakhâ thei rimâ awpa châ vei! Car la a thiehpa a hnei heih thei aw..a sawchapaw kuparo deikua hnei beih khao aw vei..

Chata tly, khizaw chhaichhi, sôhthih nata hmohrohriapazy he eima hnei tlai awpa châ ta, cha cha chyhsa hrohpapuana awpa châta chhao a peimawh tlai hra. Chyhsapa he hria ta, hlao ta, nie awpa châ pi ta; cha nota, Khazohpa lyupa nata kakuapa ta taopa eima châ. Chavâta, khizaw hmozy hlâta sôh via pi ta, thlahpa ahneipa, thi khô lâta thlahpa pahrâna ahnabeiseihpa eima châ hra. Eima thlahpa cha pachha a châ nata châ leina liata thlahpa pahâna râh eima tlô nata tlô leipa deikua â pahnieh.

Khazohpa lyupa ta taopa, ano kakuapa ta taopa nata paduapa châ pi ta; eima sôna he khizaw hmo zydua pahlypakhypa hlâta chhao hmahta eima sôh via. Khazohpa hmiakô liata eima sôh zie cha, a sawchapaw hneichhôhpa - Zisu Krista hrona hmâpa taihta pachhapa eima châna tawhna heta â lâ. Khizaw hmo hropa - Chhaichhi hmobaoh, sahroh nata O nata lyuzy he ama sôh kaw. Châhrasala,chysapa hrona hmiakô liata la 'khâpa hmah' châ vei. Khazohpa sawchapaw hneichhôhpa thisaih ta pachhapa chyhsapazy heta khizaw hmobaoh hlâta eimâ pasô khao lei via ha khiah maw?

Sóh nata thih hlâta chyhsapa he eima sôh lei via ha bâpa ta â lâ ta; thlahpa pachhana hlâta khizaw hneirônah leidia tlamaw awpa eima chi via ha bâpa ta â lâ. Chyhsapa hlâta a sôh nata thih hneipa ta yzie hnei via ha ta; a sôh nata thih ta a chyhsa châna awpa taopa ha ta, a thlahpa hro tawhta a tovyuh awpa chhao a sôhthih ta a chaleipa thei hapa hawhta pachâna taihta a za y ha bâ!!

Atahmâhlâ duasu ta alyu chaipa cha Kô 1500 rachhôh liata Roman Catholic khizaw tlai khaw. Roman Catholic theihthaipazy chata sôh nata thih athata a chadaipa ta, "Moleina vâta chyhsapa ta hriena âtyh awpa" zy cha Sôh nata thih piepa ta "Pazie-ysa" theipa hawhta pachu ei ta, chyhsa hluhpi ta phusâ ta pachhana ama chalei tyh. Sôh nata thih hmâpa ta moleina vâta hriena atyh awpa tawhta pachha theipa a châpa hawhta pachuna nata cha hawhpa hmâpa ta sôhpaliena "Sale of Indulgences" chata Awnanopa a padâhsa ngaita kaw. He hmophalei ngaita kawpa he Martin Luther (1483-1546)chata adyuhpa ta, Catholic puasaina 'Protestant' ama vaw y hapa a châ.

He hawhpa duasu he eima tlô pathao ha hrapa ta â lâ. Sôhthih ta chyhsa sôhna pho pathao ha ta, chyhsa pakha thlahpa leidia awpa hlâta sôhthih siesai leipa ta khizaw a puasai awpa cha tlao pei eima tah via ha bâpa ta â lâ. Chyhsapa cha hmotaopa hryta sôh chaipa, â sâh chaipa a châna hlâta Sôh hnawh a châna chata eima palôh la via ha ta; a sôhna chhao cha tawhna chata eima panua ha bâ.

Na sawchapaw, na unawhpa, na sietanô, na nô nata paw, viasa nata maniahpa tlyma ta na phusâ pahlei sala, na Bike, Car, Phone, Computer kha vaw parao khai ha sala, thyuhnao chi ta, kupathla ta athata tlahnao awpa na khoh tlai aw. Bike, Computer, Phone etc zy la khizaw ta taochhy ta, na tlâh pha khiah na hnei heih aw; châhrasala, na nô nata paw, unawh sietanôzy la naw, ámo hawhpa khizaw lia hmô khao va chi..khizaw ta taopapua thei hra vei. Ama thlahpa leidiana liata maoh na phaoh. Hrona leidiapa hlâta pei via heihpa cha Thlahpa leidia awpa he a châ.

Khizaw sôhthih na vaw tlaichhai tu saw hapa chhaota - chyhsapa hlâta la rie pasôh kha y.