Aolainô Meithei a chaba bâ suh vy

- Judson KT Zephatha

Atahmâ nota Social Media liata Mara pho zy cha chyhsa hrupa; pho chyh-nawhpa hawhta reina a hluh hleikhôta Mizo eima châ leizie nata Chakma pho nahta miah ama pakhopâ ngâkaw. 

He he hmo pha kawpa a châ.  Ei thyutlia lâhpa zy sai u,  he hmo heta Mara pho thapasana cha pahneisatuhpa tlao vaw châ sa la,  Mizo nata Mara he hmo alyu leipa a châ zie vaw pahnopasia via muh vy.  He tlupo ta miah ama disao/mohnaopa chhao ta eimâ hra kho leipa khiahta cha nâma nata keima thaileipa a châ aw. 

Marasaw Achuhaipa zy keimo hlâta pho lai viapa zy he tharôpa ta la pahnie ngyu ma pi,  anodeikua Puhpa J. Vialua ta Aolainô Meithei a tahpa hmãpa ta la eima pahnie thei.  Khâpa ma Aolainô cha a châ eima ta khiahta cha, atanoh duahmo liata Aolainô cha eima Châbu nata Kawlaw (Pen)  he a châ.   Chakmanahzy mohnao kaw hra eisala, thaina  sona liata amâ pha khao lei tawhta cha tharôpa ta yzie hnei khao vei.  

Cha hawhta MPSC exam lia zy ta Marasaw moh â vaw lâ hluh via sala, Central service zy hleikhôta rai chi nano-nanopa liata Marasaw eimâ ngia lymâ khiahta la miah mohnaotuhpa zy ta Pihnô/Papuh miah ama tah pyly aw. 

Hy Mara thyutlia, nâ chuna liata na râh chãta tiama papua la, na raihria liata râh kypachâna chôta hria ma y.  

Khati ma cha Khazohpa bie ta miah a chhopa hawhta mohnaotuhpa zy, apalaipa zy cha tlybaipa ta ama y pyly aw