MARAREIH KÔPIPA HE KHATAI LIA A Y?

~ Beihrua Lodua

Atahmâ eima râh duasu sai pata marareih he kô khazie tlai maw â boh thei aw va tly?tahpa he pathlao padi leipa ta thata pachâ  â daih kaw ba thlyu na.

Board of Mara Literature pachhuapanohpa ta Mara reih chôchâh seminar hneipa a châ. Ei pachâ chhei haw vâ tly ma, Marareih hlãta Mizotawng a chupazy tlao ei vaw palyusa pâh kaw tyh. Mizotawng word a roh ta, cha cha marareih ta eima chho pasia, a phana hluhpi deikua a y aw. He liata ei pachâna deikua la, Marareih tlai ta Mizotawng tawhta a chu a byuhpa duasu liata a vaw dua ha bapa kha Marareih liata eima vaw pata khao lei zie a chho pasia kaw pata ei pahno.

Khizaw liata chyhsa palô a panano thei tuhpa nata a pahmoh theituhpa he sano y ta, cha cha ZYHNA nata RYUREINA he a châ. He sanopazy ta ama heihna lâ nata ama siekheina lâ maih ta a râh zawpi zy ta tla ama zi laih tyh. Eima râh chhôh liana heta eima sai khiatala KRIZYNA he miah a vao pahnie chai aw ta, a sanona cha ryureina POLITICAL PARTY he a châ tah sa la ei rei chhei tu vâ tlyma? 

Mara reih nata Awnanopa

Cha khiahta la eima râh liata Awnano laichaipa ECM he dua moh tuah ei sih la, Siaha liata MARA nata MIZOTAWNG service he a pahlie tu hlei ma pi. He hleikhô heta ECM Awnano a chã leipa hluhpi y ei ta, amo zy rei pahlaopa chhochhi ta la Siaha liata MIZOTAWNG Service Achhyna O he a hluh via syulyu. Cha hleikhô ta, Mara Awnano laichaipa ECM Assembly ryureina, KTP, KNP, KHP, KPP, ahropazy Pakhypi liana heta Marareih ngâlâ ta Pakhypi a hmâh thei khao vei. Cha khiahtala a thaipazy a laichadaina mokhao tawhta la Awnanopa liata Marareih he a boh ama tah thei khao sualua va tlyma?

Mara reih nata Politics

 Political Party nano nanopazy duahmo he duah sai tuah ei sih la, Siaha liana heta Marareih ngâlâ ta Party Office lia  programme ama hmâh thei sualua vâ tlyma? He dei châ heih vei, party conference nata election campaign daihti liata Siaha khichhôh lia cheingei hela marareih ngâlâ ta siekhei awpa rairu ama tah pathao ha khiah ma i? tah thei awpa a za lyu kaw ba. Achhâpa la, political party ta election campaign ama hneina daihti liata Marareih hlâta Mizotawng ta biereipa papeimawsa viana a y pathao ha, tlao a vaw rei kaw ba ngyu thei hra. He hawhta a châ khiatala, a thaipazy mokhao tawhta cha Political Party lia chhaota Marareih he a boh tah thei khao thlyu vei ei.

Mara nata Lai duasu

LAI nah he thotlâh lâta LAI REIH a hmâhpa y hra ei sala, ama khihpi chaipa LAWNGTLAI liata MIZOTAWNG sai ta ama hmâh hapa vâta Mawrâh zawpi palôh liata LAI nah cha ama rei a thai khao leipa hawh ama vaw châ ha ba. Cha hawh pyly chata Mara khihpi Siaha khichhôh liata Mizotawng papeimawsana a lai kaw bahpa vâta Marareih cha a lei pathao hai eima tah aw ma? Siaha khih liata Mizotawng hmana rakha hela chi a chhih mah vei eima tah aw? Thotlâh la Marareih sai hmâh hra ei sala Siaha khihpi chaipa ta Mizotawng a tlai kaw khiatala LAI nah duasu liata eima ngia daihmâ ha ba hra thlyu na aw...!

Marareih nata nama zaw?

1. Khazia, thlahpa leidia pazy pachha pâhna chôta Mara kawpata KRIZYH thei thlah vei ma?

2. Mararâh a châna hawhta MARA kawpata Politics he a khaih thei thlah hra vei ma?

Hmialána kha cha, "Chipho châna he thisai liata a baipa châ ta, lei thai vei" maniah ama ta tyh. Atahmâ deikua la, "eima pôhpa nata sapa liata Mara thisaih he bie pata  khô pathla ngâ hra sala, Marareih eima thai tlô leipa khiatala Mara châna he eima pahlei pyly aw" tah bah ei su.

Marareih Kôpipa cha nama nata keima he châ ma pi ma? Khazia atahmâ tawhna heta

Mara chi nata pho pabohsa awpata MARAREIH he eima cheih hluh via lymâ thla vei? 

Marareih Kôpipa he khatai lia a y? Vaw tlua hra mah y..