MARA REIH!

- B.Caleba, New Colony, Siaha

Ei pachâ tyh, he eima reihhlypa Mara reih tlai hih! Acheihtuhpa nata ahmáhtuhpa chyh tlôh pi ta, eima hmâna dâh aony nata reikah rozie, siekheizie zy chhao rai châ sala alyu lei kaw ta, thokha ta Mara reih he Tlôsaih reih ngâlâh khiah maw tah pi ta, reih hropazy khâsaw reih ma pi.

       Mara reih he Tlôsaih reih ngâlâh chá vei. Marapa chi ta eima hmâpa Chapi, Hawthai, Zyhno nata Vyhtu reih zy chhao Mara reih a châ hra tahpa he sia ei suh u. Reih hropa (Kalâ reih) lapangia (adopt)-pa he byuh hlei vei. Tlôsaih reih  ta â khi vei eima tah khiahta la Mara reih hropa Vyhtu, Chapi, Hawthai nata Zyhno reih zy he tlao hmâh hri ei suh u.

American-zy reih he reih pahlaopahlipa a châ tahpa eima pahno khai khaw. Mara reih chhao he Mara reih tota lapakhy hra ei suh u. Chata leipa ta cha Tlôsaih chi a châ leipa Chi hropazy ta âmo reih chyuta Hlabie ama vaw hnei lymâ hra aw. Thokha cha âmo reih tlaita Hlabie ama vaw hnei pathao ha, Mara reih taopathi (reform) eimâ chhuah tuna liata reih taochhyhpa hmâh hluh tu pi ta, he heta Mara reih dopa nata a sôhna tlao a pahleipa ta ei pahno.

Chavâta, Marapa reih maih he cha Mara reih a châ hra tahpa ta eimâ pyh chyu awpa he a peimawh kaw. R.A.Lorrain ta ‘Reihhly (Common Language) awpa ta Tlôsaih reih âvaw tlyh hapa vâta Tlôsaih reih he Mara reih châ via pachaih hlei vei la y, eima Dictionary tua chaipa kha moh ula, Mara Reih kha liata  a hmâpa kha a hluh via kha la nama pahnothai nah ta cha pangiasa vei ei na. 

Kha Dictionary liana khata Siata (Vyhtu) reih ahlao ta, eima Châhnawh (Alphabet) liana tlai khata ‘F’ pahlaopa châ ta,  ‘F’ (Efih) he Chapi reih a hmâhpazy ta ama hmá tyhpa chá via ta, Mara reih pahneirôsatuh chaipa sákha a châ hra. He hawhta eima Biemarih (Grammar) a châ hapa vâta Mara reih heta cha Marapa reih zydua he apahly khai tahpa he sia ei suh u.

Paw Pakha, “Khápa e nâ châh via?” tahpa ta Football  amâ khaihpa eima mona liata hiahrih na ta, “Mara Reih thai na” tahpa ta nâ chhy ta; anodeikua, Vyhtu reih cheih thlâh pyly tlôh ta, Vyhtu reih cha ano pachâna liata Mara Reih ta pachâ leipa hawhta pachâna zy eima vaw hnei tlamaw aw.

Ei chi heihpazy saih u, Marapa pho ta eima puakheipa, pikheipa reih (Mahnô nata mahpawzy) ta ama hmâpa reih zydua he Mara reih a châ tahpa he liahsa sia ei suh u. Anodeikuala, Tlôsaih reih he Mara reihhlypa a châ tahpa deikua my kha ei suh u.