The Miller Of the Dee

- Robert B.Syuhlo, Siaha

‘Dee’ chavah chheipâ râh , lôhdiapa ta â mô haipa cha, noh vaw chhi ngâpa chata nochhi lâ tawhta vaw pathyu pathao hawh heih ta. Chavah chadôpa ta cha chheipâh, leilô âvaw padua tuah-no tawhta ahy ku pathla leipa ta khâ y thlâh ha ei sala â ngiapa, tuhpi thosôzy chhao chata,  chô noh-lynô, chô vânohpa hry liata raisâhsa pathao awpa ta pheiliah hai ngâpa hnôhpazipa ta, thlihua nai zualuahpa vaw pathli ngâpa zipa ta ama chiahzy cha vaw hiesaw ngâ hra ei ta. Leilô tao tua no tawhta sâhmia pathai angiah leipa nata viapathlalâ vâ hleileipa sopavawzy chhao chata hlato-hlazaw paryh awpa ta ama nohto taozie nôhchâ akaw châ papua pathao haw heih hra ei ta. ‘Chyhsa

deilei cha pachu ângiah vei ei’ tahpa chahnao pa-ih via heih awpa ta kheitarupa mathlaw chakhyhpa pyuh nata tâbalâpa mathlaw aripatlai ngâpazy, sakhi nôsaw sibie phapa tlua awpa ta pheiliah hai pathao ngâpazy nata ‘Noheihpawmaih’ ngaitapa ta chô noh-lynô a uahnao thlâh hapazy apielyuzie cha chô noh-lynô châta chhao vâ meido papaih ta, hmiasie paryh khao leipa ta noh-y kha sai tlâh  a châpa mophapa a châ hra thlyu aw. Leilô khochhina nata pawngiana apatuhpasia hapa châta cha, ‘Dee’ chavah chheipâ râh hrozie nôhchâ cha, ‘Vâ manôhzy chhao hmahta reithaina hla ama sapa a  chalihsai khaipa ta, za sai ha maw ei sala, reithaina hla thiehpa ama phi thlyu tlai aw’ tahpa ta angie raolao leithai awpa chi rihmâ za châ thlyu aw vei!! 

‘Dee’ chavah chheipâ râh chhôh liata apahrâpazy apielyuzie vaw sai ta, chhôhso lyna thaphana chhao ta khôphei tawhta chô haipa, Chhâmeicharietuhpa chhao cha, a lei hro noh kô nata khih ta liahsa vi ha hra sala, amopadei liata thapawna nata lôhratlôna avaw lâpa cha nyu thai apakhôsa tawhta thathyu ngaitapa ta ‘Dee’ chavah lohngâpa pyuh paro khôlô ngâpa hry ta  raisâhsa heih aw ta, thlaisâh baih-lia ti hawh asa ngâpa chhaota thaphana hla, ao tlilih ta sa heih aw ta, ‘Dee’ chheipâ sopavawzy chhao ano hlâta ama thapha via sala angia vei! A hla zôzaw a châpa, thathyu kawpa nata alyna aoki dopa chhaota a sah tyhpa deikua moto châta âdo hr’aw vâ tlyma? “ Ahy hropa rai uahvana hnei vana, ahy hropa ta na uahva chahcheita hra vei ei” tahpa ta raisâhsana chôta  a sa tyhpa cha.

There dwelt a miller, hale and bold,

Beside the river Dee;

He worked and sang from morn till night,

No lark more blithe than he;

And this the burden of his song

Forever used to be:

“I envy nobody-no, not I-

And nobody envies me!”

‘Dee’ chavah ngiahkâ tawhta su ahla leipa liana chata, Abei-O rônahpa, chyhsapa saduthliena mothlaw liata O rônahpa eima padua tyhpa hlâta chhaota rônah viapa châ sala angiapa,moto mozaw ta cha su liata zâkha mokuh ramâ khaih thei n’awpa a châ khiahta cha, ama hrona taihta ama hlâ ngâ n’awpa chhôhpadâh liah-maripa liana chata Abei rônahpa, akhopa nata ângiahpa maih dei châleipa ta ângiah leipa taihta a hnei thei awpa châ sala angiahpa, Abei phapa nata râhzawpizy lôhngâna chaipa Abei Hal chhao chata aseichanô nata seichapawzy ta my thopi ama vaw chalohpa cha pazapa ta, my noh vaw chhi ngâpa ta asadôh apathyu hai nopa cha Opy tawhta liahsa chai chahnaopa ta sai hai ta. A sei chanô nata chapawzy pachâna tawhta cha ano hlâta thapha viapa nata lôhratlô viapa cha y thei khao ei sala a ngia thlyu aw vei! Châhrasala, Dee chavah ngiakâh thothi hry tawhta chapaw pitlopa ao, thaphana nata thathyuna apahlaopa aoki dopa pyuh kaw puapa cha cha seichanôzy nata seichapawzy pachâna phie tuhpa châ lei thei vei!

Abei rônahpa Hal chata thothi hry tawhta ao kaw puapa cha pahno lei apachâsa hrasala, “cha hawh tlupo ta thaphapa nata alypa chyhsa cha ahy ma a châ?” tahpa pachâna chata a chhôh-maruhpa chahria leithei vei. Arâ-O pangaipa ta, arâ hry liata tlôchaipa chô kiahpa ta Dee chavah ngaipa ta, “Haipa bie” hlâta chatlie viapa ta arâ cha parâsa haw ta.  

       Châhrasala, Dee chavah a kei tlôna daihti liata deikua, ahnahbeiseipa nata saduthliepa hawhpa chyhsa hmô vei tahpa deikua a hmi liata hmôchhei thai rih-mâ awpa za châ vei. Dee chavah ngiakâh liata Chhâmeichariena chapu ngaipa ta paw pakha, lakhu chy ngaitapa a khupa ta, chôtho, apalaikhei a chhituh leipa a kyhpa ta thapaw kawpa ta chhâmei avaw phao ngâpa a kei hmôna ta cha norai nata bie leithei vei! Kheitazie e khi hawhpa chyhsa thlâhthlipa tlai khita, abei rônahpa hlâta paro viapa ta thaphana hla a sa thei tly i? ‘ Kaduah, na hlasapa kha ado chahcheita vei. Khâpa hmo rihmâ chata ma chhôhso thaphana nata thathyuna hla cha pa aw sa tly i? Rie na chho hra la, kei lôh-ly hra n’awpa ta. Chata ei rônahna lakho he cha hlâ la vana.” tahpa cha apakah tawhta bie pua tuachaipa châ lei thei vei!

Thou’rt wrong, my friend” said

Good king Hal,

“As wrong as wrong can be;

For Could my heart be light as thine

I’d gladly change with thee.

And tells me now, what makes thee sing,

With voice so loud and free,

While I am sad though I am king,

Beside the River Dee?”

Pachâ pahria leipa pi ta ama bei rônahpa, a biechhopa cha rei lei, mazaw-marâpa châta hmô thei awpa a châ bobi leipa tawhta hiahrina adao thlâh hapa cha Chhâmeicharietuhpa châta cha mâ khochhipa khiahma ei sa tahpâ ngâ awpa châ leithei leipa aw ta, a no chhao a rai kaw thei hra thlyu tlai aw. Châhrasala, a hmiakô liata ama beipaw, ama mothai kawpa nata ama uahva kaw tyhpa, ano pôpa tlai ta adua thlâ hapa hiahrina cha, âmo zy hawhpa thlaisâh hi leipa ta nie atlua tyhtuhpazy châta achhy palie ngâ lei thai rih-mâ awpa châ vei. Zana palâsa n’awpa ta alakhu chy kaw bâpa cha pahlupa ta, “ Thlaisâh palopa ta ei nie awpa hria papua na ta, ei lahpinô nata ei nawhlyzy kyh ei pachâ. Ei thô theilei awpa leibâ hnei lei awpa ta byhnâ na pietuhpa nata ei chhôhkha aphahla leipa ta ei so thei n’awpa ta na pa y satuhpa, Dee chavah chôta ei lyna he hla ta phuah leithei va na” tahpa ta a hmiachhy haipa rônahzie pahnopa ta chipa nata achalyupa ta achhy leithei vei.

“The Miller smiled and doffed his Cap,

“I earn my bread,” quoth he,

“I love my wife, I love my friend,

“ I love my children three;

I owe no penny I cannot pay,

I thank the river Dee,

That turns the mill that grinds the corn,

That feeds my babes and me.

Alyna bieru thiehpa ahmôpapua hapa vâta thadâhna hu kaw sopa , beirônahpa chata, a hmiakô liata a râh chyhsa hry liata hmi nata sâ liata nawh chaipa châ sala angiapa, chhâmeicharietuhpa chhôhso pachâna dopa nata thaphana bieru cha, abeina râh chhôh chyhsazy palôh phaozie châ ha hra maw sala tahpa pachâna za hnei lei thei aw vei. Châhrasala, arônahna nata hneirôna zydua chhaota abei dyuchhai âtyuhniepa chhaota, cha chhâmeichrietuhpa alyna nata thaphana suhraw pachhai ta, su khophie chhao cha hnei beih aw vei tahpa a pahno ha tawh tly cha, “ Kaduah, nâ lyna nata thaphana cha vaw zawh lymâ la, châhrasala, ‘ahy hmahta na uahva chacheita hr’aw vei ei’ tahpa deikua rie vaw reih khao kha y. Ei bei, lakho rônahpa he na lakhu chy kawpa  hlâta sôh lei via hlei vei mâ my. Na raisâhsana Chapu chhao kha, ei beina râh hneirôhna a khupa a châ tahpa vaw pahno ha bâ la, nâmo hawhpa tlai henah, eima liahritlona râh ta ângiahpa chyhsa cha, mâpha sapa ta vaw hro parei tlai ma y”  tahpa ta uahvana nata rohpadyna chôta abei O pangaipa ta Chhâmeicharietuhpa cha hnôhchhypa ta, cha su cha puasai haw ta. 

‘Good friend’ said Hal, and,

Sighed the while,

“Farewell and happy be;

But say no more, if thou’dst be

True

That no one envies thee;

Thy mealy cap is worth my crown,

Thy mill my kingdom’s fee;

Such men as thou are England’s boast,

O miller of the Dee’

A châ tlai na, khizaw liata eima uahva kaw tyhpazy chhao heta tlâh a châ leipa, nâ nata kei nairu bao tlaizy na he maniah ama vaw uahva kaw thei hra mâ my? Na mo padei la, mohmia pasaih la, na vâhnei zie kha khâ pachâ la; Na râh ta âpalaikhei tlâhpa chyhsa ma na châ ma? tahpa nata na liah-ritlona râh châta tlâh a châpa nata na râh ta ângiahpa chyhsa na châ ma? tahpa chhao khâ pachâ tyh hra ma y.

‘Such men as thou are Maraland’s boast, O son of Maraland’ tah tlâh eima châ hr’aw vâ mah i?

(The Miller of the Dee hlaphôh he British Poet, Charles Mackay ta a vaw rohpa châ ta, Poem siezie miakha, Ballad-ta rohpa a châ. Ballad Poem liata cha phôhpa hawhta hlaphôh phihpa châ ta, English Literature liata su a to sâh kawpa miakha a châ. He hlaphôh Miller of the Dee liana heta Chyhsa cha a hmo hneipa vâta thaphapa nata alypa châ leipa ta, a tovyuh liata a palôhtlâhna reizie hawhta thaphapa nata alypa a châ tahpa he a châ)