EI THLAHCHHÂNA

- Robert B Syuhlo

Ei palóh cha a iekhyna liata pao ha ta,
Ei pakah hra seisiana a hlao leipa ta â thei khao va na;
Phana hlâta chhiena atlyh via ha na ta, 
Mohropazy chhiena tei n'awpa kyh liata ei chahra ngaita kaw.

Ei mokhaoh ta maitôpaw hlâta chhôtlôpaw hmô thei via ta;
Taotuhpa kuzôthaina hlâta a taopasu leina ei tlua thomo tyh;
Phana ta ei mo vo a pahri kaw tyh.

Ei ku cha daotuhpa châ awpa ta a thapha ta;
Pietuhpa châ awpa ta deikua asy ha tyh;
Thazâh rai ta a hnei leipa hawhta,
Pietuhpa châna kyh lia a thanai ha tyh.

Ei lytha cha mohnaona kyhta arâpasuana lia chatlie ta;
Noh nata tlâhta zawna kyh liata a tato ngaita kaw;
Chhutla chakhâ nah dokâh chhao châ hrasa;
Sawzaw lochono lytha hawhta a châ tyh.

Ei zyh thei lei awpa pachuna pie paphasa na ta;
Ei zyh thei awpa pachuna nahthlie hoh va na;
Maniah ataopathi n'awpa kyh liata ei lathli pasoh ta;
Keima ataopathina kyhta deikua ei chhôhso chhikao pahy thei vei.

Sôhthih vâta khâpa hmo rai tao awpa â ngâcho na ta;
Lohpapua leipa ta ei pa-ona awpa a châ khiah;
Adona nah ngâchhihnazy cha hmia pahnolei pachâsa ha tyh na ta;
Zâkha dâhdei chhao a rielâh thei va na.

Kyh a pachâ awpa ta pachu na ta,
Keima lia kyhpachâna y tlôh vâ!
Taotuhpa ta a khongaitapa ta ataopa hry liata;
A taochhei hapa ei tlua thomo tyh!

He hawh chhôhso he,

"Mei ta mei ta kâ ha sala"
"Ti ta ti ta phaoh ha se"

Ei pachu hlâta keima ta zyh tuatuhpa châ a chhuah ha bâ aw na ta;
Ei hro ta a piepapua thei leipa cha,
Mohropazy piepapua awpa ta ahnaw khao aw va na.

Ei hmô theipa ei unawhpa hmahta,
"Kyh ei pachâ thei leipa tlai"
"Kheitazie kyhpachâna ei pachu hra tly?"

Hrozô lôbô awpa heta;
Bie a ngiapa pachhaopa dâhdei he a daih leipa ta,
Hrokhei ha tua sala; ei hro lia hmô awpa y ha tua sala...
Cha cha pachuna dopa nata bie â ngia chaipa tlao avaw châ aw!

Hrokhei ha tua la,
Pachu ma y..

Pahmôsa ha tua la,
Ama cha vaw pazi aw..

Cha cha pachuna dopa,
Yzie hnei chaipa cha châ tlôh ta!