HMIAKHUTI

~ FC. Chhuasa.

Kôzy a vaw chhâ haw’pa vâta pati dôh pahmaohna hnei pi ta. Chô ei tlalâhpa ei viasazy hnohta Hmiakhuti pa-eih awpa ta pahrua ei na ta, â ryh vaw tah thlâh ha hra ei ta. Zâlâ nie daihti liata cha thopi nyu ta raih pi ta, bie ei baichha thaipa vâta châ vei, a vaw dao chanei leipa rai y veih ei. Eima Principal nata Warden-zy kha a chanei tuapa ama châ.

North-east India liata eima Tribal heihzy cha rei lei, Tlaikaopazy hry liata a hluh via syulyu heta Hmiakhuti bieru he ama vaw pahno mâh leipa vaw châ ta, Lakher Anthur tahpa ta tlâ vaw pahno ei ta, a nie dâh nata raokhaoh palôh a patlâh theizie rai he vaw pahno veih ei! A kô heihpa a pathliena kyhchhina lia chhaota Hmiakhuti eima pa-eih chanei heih.

Training-na moh aphaohpa sukha liata ei y no heta, zâlâ niepahmaohna hnei heih pi ta, eima Lecturer ta, “Puhpa Chhuasa cha hmiakhuti y ta, a palôh a tlâh kaw' na”, na tah ta, “Kei chhaota atahmâ tawhta la ei khoh kaw bâ hra na”, na tah ta. Cha bie chata ei chhôhso palôh he na za patlâh ngaita ta. Tlaikao râh liata y pi ta, âhmie zuahtuhpazy ta, “Lakher Anthur ei hnei thlâh ha hi," tahpa ta ama ku ta einâ keina châhzy heta kei lômaoh he a ru lâta apalaina ei za hnei tyh cha maw! 

Nôvah ahneina kyhchhi awpa he y ei ta, maniah ama vaw hrua hrapa he a châ (Thotlâh lâ cha pakahpaleih ta tlâ ahrua tyh ei ta, he daihti he Thotlâh liata ei y daihti a châ). “Mylâ khi eima uhta nô hmiakhu tihâh sap’awpa achhuah pi ta, bâh maniah avaw hlao hra muh vy," ahyzy ma ahnei aw ei tahpa pachâpazi khao va na. Ei bie theipa chata ei pachâna pathipalôh ochhi cha eikhapi ta pahy ta, cha pataw nahta ei pathipalôh cha a zaw papua ta, pahrâ beih leipa râh hryhpa ta bua chhiesaih ta bua ta. 

Eikhapi ta ei pachâna a vaw thla heih ta. Pho nano nanopa nata chi nano nanopa hmiakô liata aduah aw sala, “Marapa tihâh ahnai chaipa nata asâh chaipa cha hmiakhuti he a châ," tahpa he Sermon chaimâh aw sala, âmo chata pahnothai leina mopadei chhaota na moh thlâh ha ei sala, keima ta phahnaingiah ngaitapa reihpasia sala tahpa he vaw byuchhiah ngaita kaw na ta. 

Chata tly, Marapasaw dyhchhie-dyhru chaipa nata riethei-sipasa chaipa, opazu a pachasa thlâhpazy pi ta nodi dâhphi apapai n’awpa nata lôh pangâh n’awpa ta eima hmâ chaipa he, he hmiakhuti he a vaw châ. Khihsa thei viapazy nata nie nata do asosâh chaipa nata atahmâhlâ chaipa nie ta adoh paphapazy chhaota he hmiakhuti ahlao leipa heta cha ama raokhaoh palôh za tlâh khai thei tyh vei! Eima ryureituhpa nata molaipa, eima nôpawpa nata theihthaipazy kyhchhina nata niepahmaohna dawkâh lia chhaota su peimawhpa a to pha thlâh ha pyly! Zawpi vâtlâh kyhchhina nata alyna, khokheina pati dôh pahmaohna lia chhao rai châ sala, niedo awpa eima pachhuapanohpa hry liata asâh chaipa cha he hmiakhuti pathaihpa he a châ. Â vaw hlao leipa chhaota hmiakhuti moh eima paphaosa thlâh ha pyly!

Marasawzy eima zydua ta alei beih eima hmâ khaina daihtizy ta lytlâh vaw khô ha ta. Atahmâ cha kyhto liata eima duasu â lyu thai tlâ khao vei. Ramawh nata chhobuh rahvopazy hmâpa ta O moh aphaohpa su liata apahrâpa eima y thlâh chy nota, thua nata alôzy ta sapa Babel O chhâh sâhpa chhâzaw adaih thlâh ha awpa alyupa liata apahrâpazy chhao eima vaw y pathao haw. Phei thadâh via n’awpa ta poh pheiky kykha chhao ahnei thei leipa eima y thlâh ha chy nota, a hlaihlâ n’awpa châ deita ta awhtachhi pasy ta Motor apasy thlâh hapazy chhao eima vaw y haw! Rei via ngâkaw byuh vei.

 Marasawzy he, he khizaw he ei sâh hluhpi chhao apahieh papua heih hra sala, a kho angâh kawpa ta eima chareikhohna nohzy kha vaw chhi thai khao thlyu aw vei.

Cha hawhta a châ nona chata, Marasawzy heta palôraohna, apôhkhana nata chôhnai-chôsâh y leipa ta lôh miakha eima phaoh theina y ta, cha cha hmiakhuti lia he a vaw châ. Apasipasawhna nata saisona, areisina nata apanawhna reikah châta tlâ vaw hmâh tyh pi ta, he eima reikahzy he chi hro pho hropazy ta maniah avaw hlykhei thei rai rai veih ei.

 Apamosana vaw palâsa tua' sih la:

1). “My nata zâ ta hmiakhuti pahrao thlâhpa saw rai lyu va chi."

2). “Hmiakhu tihâh chhâ sapa tua ei si, eima vao kha thie thlâh ha tua u."

A sia thlâh ha vei ma? Moh la mohpasia via tua. He bie mianopazy he hmô ta eima thei pataw nahta Bengali nata English chyhsa reikah puapa châ vei tahpa â hno thlâh ha. Chadei châ vei, he reikah he a Mara ngaita kaw. Cha yzie cha Marapa nata hmiakhuti he khâchâ apazao hapa, apachhaih thai lei awpa a vaw châ. Moh chanei via heih tua rai la, a chô liata reikah no-âhchhih zie na hmô aw. Vao thie thlâh ha tlôh ta, hmiakhuti moh paphaosa thlâh hapa cha! Mara thisaih ta sapa a châ leipa khiahtala a yzie pahno chacheita aw vei.

He vâna heta eima khihpizy he avaw sosâh via lymâpa ta, Five* Hotel taihta avaw duah ha hra sala, Hmiakhuti â hlao leipa ta cha Marapazy palôh liata Five * za tloh pha thei thlyu' vei. Cha Hotel liata nie nata do a ypazy chata Marapazy palôh liata hmiakhuti sôna he a kho thei rimâ hra aw vei.

Khatlu hmahta asosâh hra ei sih la, nie nata do angiah khao leina taihta asosâhna noh la chhi beih thlyu aw vei. Keimo chhao eima khihsa tôhtu â sâh via lymâpa hawhta eima niedo awpazy â sosâh via lymâ hra aw. Anodeikua, chhâ khazie chhôh tlyma cha eima nie nata do pha chaipazy heta hmiakhuti moh a phaoh ngâthlâh ha chy aw.

 Marapazy palôh liata hmiakhuti a leina noh cha eima chi nata pho leidiana noh tlâ châ' khiah maw tahpa pachânazy ei hnei. Chi hro pho hropazy ta pahno beih leipa ei ta, niedoh beih veih ei, ei tahna châ vei. Marapazy palôh liata a chhiena lâ nata phana lâta yzie hnei chai ta, a sôh patlua chai tlao ei tah hri.

Eima chichei bialopazy chhao a nano via lymâ ta, Bia hlâta Carrot khoh via bâ pi ta, Âvi hlâta Tomato pachâ peimawh viapazy eima y pathao ha bâ, hmiakhu deikua eima pachâ peimawh chaipa hry liata â hlao ngâthlâh ha chy. Chi hro pho hropazy ta ama chi nata pho ta âhmie ama pasâhsa chaipa nata amâ palaikhei chaipa (Cultural Food Item) cha pho hropazy paniesa hr’awpa a chhuah tyh ei ta, khokheina asâh chaipa hawhta pachâ ei ta, zakhei beih veih ei. Keimo chhao hmiakhuti he kaokih chhâna taihta apalaikhei lymâ hr’aw ma pi ma?

Marapazy palôh liata hmiakhuti â nano patluana he za mohpazi via heih tua ei si.

 Tihâh zydua hry liata a chhona dâh a naosia chaipa nata chho pasu leipa a y sasaw thai leipa, tihâh mohnasakia achhih chaipa nata nohlao chaipa, ahaochhih chaipa nata kho-iahchhih chaipa, reikah a thai chaipa nata hmotaothei chaipa, apalai thai chaipa nata apanawh thai chaipa, o chaki-chabapa saw hnohta khihsa dâh thai ta, dyhphapa sawzy hnohta apielyuzie thai kawpa, riethei chaipazy lôh pangâ dâh thai ta, hneirôh chaipazy palôh patlâh dâh athaipa, apakaoh thei leipa hnei leipa nata, pavyh to aryh thei thlâh hapa, paleih to adyh thei ta a nie thei leipa ahnei chyh chaipa, akho angâhna biepipa avaopa, tihâh châ thlâh ha tlôh ta ku si n’awpa châ taihta phapa a chânazie he patuapalua hra tua? Na no a âh leipa chhaota na pahnei chhâ a chhi thlâh pyly aw. He hmo zydua he chi hro pho hropa ta pahnothaina noh hnei beih leipa aw ei ta, Marapa, Lakher-pa, Kaliahpa deita ta a pahnothai aw.

(Mara Book of the Year hmiatua chaipa Hmiakhuti châbu phaohtuhpa Châpaw kha a châ).