Friendship day special : ET TU BRUTE!

~ FC. Chhuasa.

William Shakespeare Drama ropa miakha ‘Julius Caesar’ tahpa kha eima reih khiahta cha, he reikah he eima hmô aw. Na châbu reipa kha phahnaingiah kawpa ta hmialâ a sie ngâhaipa hawhta apachâ la, he reikah na theina daihti liana he cha, nâ duah leipa chhaota na phei hypa chhâ la a cha palâlao aw!

He he a phôhpa siezie cha a châ. Rome pheisaih beipa General Gaeser (Kaisara) cha a riahphana, a sona nata thatlôna, adyuh a thainazy vâta BEILAKHO akho cheingei awpa hawhta pachâpa a châ. Ahy hmahta achhuhrao awpa tlyma, beilakho chôchâh a reih ngâh awpa tlyma rai y chachei ta veih ei. Beilakho cha a kho mâh vei hra sala, ryureina nata biehneina cha a ku liata a y khai rô haw. Ano ta â ryh a tahna daihti lia maihta beilakho cha akho awpa deita tlâ a châ.

 Châhrasala, he khizaw he ‘Châhrasala’ tah awpa a byuh thlâh ha tyhna khizaw châ ha tlôh ta. Cha khizaw liana tlai cha vei ma ‘hiatliana´ta su a paryh hra vei kha??

Chatawhcha, hiatliana tlai chata Casca nata a viasazy pahmaohpakhy ta. Âmo sahlao chata Caesar viasa pha chaipa nata charoh avaihtuh chaipa Brutus pathipalôh cha pahnie ei ta, beilakho cha Caeser luh patlôsa leipa ta Brutus luh lâta pasie awpa bie tlao hraih ei ta, adyuhna chichhihpa cha phuah haw ei ta.

Brutus nata a sahlaozy cha pua ei ta, Caesar ryureina liata a y thlâh hapa cha ama chariah chhaichhizy chhaota tlahnao ei ta, thlai chadô ei ta. Ama chaizôhzy ta avie chhiechhu chaimâh ei ta, a hnôh chaipa liana chata Brutus cheingei chhaota a chô lia ku pathla ha hra ta.

 Cha cha Caesar ta a vaw hmôna daihti liana cha a thatlôna zydua syhpakhypa ta, thina ochhi pakah tawhta thei nata thei leina chôta, “Et Tu Brute?” (You too Brutus?) tahpa ta ao cha-â ngâna chôta awhpapua ta, cha cha he khizaw liata a reikah hnôh chaipa a vaw châ haw.

“Brutus, nâma chhao taihta ma?/ Brutus nâma dâhdeipa chhao taihta ma?.” Palôh keichheih ta, saihei â chhih rimâ bao cha!

 Brutus chaizôh rarôh-y ngaitapa ta a sapa cha a hriechheih haw tahpa cha moh ta, a mokhaoh tlaita hmô hrasala, zo vei!! Khazia maw? Brutus ku na a châ ha. A viasa a kyhpachâpa ku kha na a châ haw!! Pahnothai vei. Hiahrina no-âh tahna, palôh pasana nata pachârôhna meihdozy ta thlai vaw khu ta, Zawdâh chavah tilyzy ta thlai vaopakhô pâ ha ei ta.Tlai chuh, he khizaw he pahnothai leina nata hiahrina khizaw deita vaw châ tlôh ta.

Eima khitlyna khizaw liana heta kyhpachâpa hnei pi ta, lôhkhy hnei pi ta, viasa chhao eima hnei tyh. Eimâ lyna, eima thaphana, eimâ pahniehna nata eimâ pahâna thobuh nohpahlipa cha ama châ. Amâ hlao leipa ta eima yru ta, eima palôh â lie. Hmo sâkha/miakha no-âhchhih ngaitapa cha, he eima viasa, eima kyhpachâpa sahlaozy he sia leina thisaih ta sapa ama châ tahpa pahno thlâh ha hra ei sih la, a chhiena lâchhâh duasu lia rai ta padua khoh tyh ma pi. He kyh liata chyhsapa palôh phazie he rei thai rimâ’pa châ vei. 

Eimâ pyh nata pyh lei châ leipa ta, pahnothai a ru eima tah vâta tlyma châ hra vei. Biedopa, chhâzaw biedopa, ado ngâthlâh h’awpa cha naw, apaphasaina nata aheisainazy he ahy hropa hmia pahno leipa tawhta tlyma châ leipa ta, eima kyhpachâpazy nah heta khâchâ â pazao thlâh ha cha maw!! Rei via awpa y vei. He he khizaw pikheipa a vaw châ!

Kheihtazie e na hmia pahno beih leipa hnohta, “Einâ paphasai chi?," na tah thei aw? He khizaw lia a y hra tahpa chhao ei pahno beih leipa hnohta ei palôh phaozie â lyu leipa vâta, “Einâ heisai chi," ei tah thei aw? Daihti khachâ rakha tlyma lôh miakha phaoh ta, a kyhpachâ na ta, ei kyh na pachâpa, ei phiathla nâ hly ta, a dawrâ ei hly tyhpazy chôta deita ta he reikah he ei vaw hmâh thei tahna a vaw châ.

Kheihtazie ta e, cha hawhta hla nata bie chhaota reipasia thei leina khôlâ taihta ama kyh eima pachâpazy ta miah apaphasaipa ta, miah amâ heisai thei thlâh ha aw tly? No-âh â chhih rimâ bao cha!

 Châhrasala, he khizaw liata hmo avaw tlô tyhpa deita a châ! Ei hluhpi achho chhieliepa ta reih chhielie hra ei sih la, he hmo nâ tyhna daihti liata no-âh na tah thlâh ha pyly aw. Yzie hnei hlei aw vei.

Hmia pahnopa hnei pi ta, viasa hluhpi eima hnei. Lôhkhy hluhpi hnei pi ta, kyhpachâpa eima hnei. Âmo hnohta nie pi ta, keimo hnohta amâ rie. Ama khokheina dao pi ta, eima hmosaipiepa ama dao tyh. “Nâma chhao taihta ma…?," tahpa reikah nata chhôhkha ahnia kawpa sai ama châ khaw.

He khizaw rairuna nata chhiesana râh liata khohleikhoh kawpa ta lynapawti eima zylâh tyhpazy châ tlôh ei ta, khatita ma he reikah he eima likah liata hmâ awpa â ngiah aw?

 Pahnothei’pa châ vei. Hrochhôh noh he lâthlôh chhutla-chakhâ ngaitapa liana heta he hmo/he reikah ngâsâ he la hmâ awpa byuh leipa sala, atyh hraoh leipa ta khôkhâh theipa châ sala….vâhneipa cha eima châ ngaita aw dia!!

Caesar kha Casca nata a viasazy ta ku ama pathla nota cha, chapawsaw kawpa ta chaizôh hmiachhy ta, Brutus chaihzôh deikua la tao thei khao ngâsâ vei. Pahnothai ru tah ta, zo leipa ta a lôh hra vei. A hmo hmôpa cha a sia ngaita kaw. Brutus tlaina a châ. 

Pheisaih General châ ta, ei hluhpi adyuhna rarôh-y ngaitapa hmiachhy tyh cheingei aw ta, ei hluhpi cha thisaih hry liata a duah aw ta, thina ku chakuapa ta a cha-ao daihmâna daihti y aw ta, thlâkhaoh nata amâ hlana sâhchi tie deita a châna daihti chhao a hluh kaw tlai aw. Rome thisaih ta sapa a châ. Thisaih ta apalypa-uasa tyhpa chi nata pho ama châ.

 Châhrasala, Brutas chaizôh kha la â ngiaroh kaw! Ano liata thlalôhna a ychhôhpa zydua hruapakhy ta, kawhkha chhâ reihpapuapa kha a hmo khoh chaipa a vaw châ haw! General chata chariah chhaichhi khoh leipa ta, râh la awpa thâtih châ hra leipa ta, ngôh nata lôsôhpa châ hra vei. Lôhiah bie kawhkha ngâlâh reih awpa a khoh!!

Apaphasaina he pasa ta, zoh ta, a pyu angia leipa ta, a thâpha leipa ta, ngiakhoh a chhih hra vei. Chhiesana chhaichhi hry liata moka achhih chaipa miakha cha, apaphasaina he a châ.

Cha hawhta eima kyhpachâ chaipazy tawhta apaphasaina nata aheisaina adao theipa nata atyh theipa eima châ vâna chata, lôkhyh viasa hnei lei awpa tahna châ vei lah y. He khizaw liana he dawh khophie chhôh chhao kyhpachâtuh hneipa a sôh! Viasa tawhta kyhpachâna, thlalôhna, huhiehna, alyna nata thaphana na dao tyhpazy kha, mâ ta chaleipa châ mawh sala khizaw hro he chhiesana ta a pahly chanei cheingei heih aw.