Thohna-o liata amâ mohôhna mâ pie awpa a hnei leipa vâta amâ mohôhna mâ pie n’awpa ta a sawchanô hawsaihpa tlaw 7,500 ta zuah awpa ta tah raruahpa a châ!

Photo Credits : thehindu.com

India râh he heta mopa ta cha râh hneirôh kawpa lyu taraw hrasala, chyhsa riethei hmeiseihpazy châta deikua râh hneirôhpa tah thai awpa châ thlyu aw vei!

Rietheipazy heta ama chhôhkhazy pabohsa n’awpa nata ama khihsatôhtuna padua n’awpa ta tao awpa nata tao lei awpa chhao pahnothai khao tyh leipa ei ta; khizaw chyhsa thokha ta ama pachâ pha leipa hmo no-âhchhihpa ama taona daihti taihta avaw tlô heih tyh!

Tehsil, Odisha State, India liata a ypa Nirakar Moharana cha a sawchanô pathôhna a pih khai dyuta tahpa liata Thohna-O liata amâ mohôhna mâ a pie thei khao leipa vâta a sawchanô zuah awpa ta tahpa châ ta, thohna-O tawhta ama pua thei khao lei awpa hlâta la tahpa ta a sawchanô hawsaihpa cha tlaw 7,500 ta a zuah haw! Hawsaihpa nô, a lahpinô châta eichhia thai’pa rai châ khao vei!

Photo credits : thehindu.com

Gitanjaali, Nirakar lahpinô he a sawchanô pathôhna sa awpa ta District headquarters thohna-O liata a ngiakhei achhuah ei ta; châhrasala ama khih liata ASHA liata ahriapa pakha Private Hospital lâ tlao a ngia awpa ta chhosie ta, Nirakar chhao heta ‘Hawsaihpa nata a nô châta a pha via thlyu bao na’ tahpa ta eichhia leipa ta Private thohna-O liata nawh hnei awpa ta amâ ngia ha hra!

Ama nô ta nawh vaw hnei ta, amâ mohôhnamâ pie awpa ta ama vaw dycharaona noh liata deikua, a byhchhôh liata tlaw 1000 deita avaotuhpa Nirakar chata a sawchanô hawsaihpa cha a zuah awpa âvaw ngiah haw! A sawchanô he tlaw 7500 ta nôvah pakha ta chalei ei ta; anodeikua he hmo tlôpa âvaw lâluah tawhta hawsaihpa chaleituhpa nôvahzy he Police zy ta ama patu ha. Private Thohna-O liata a ngia awpa ta chhotuhpa ASHA liata ahriatuhpa chôta FIR pangia ei ta, he chyhsa he sawta rai vaw sa vei!