US dollar 407 million hlâta kyhpachâna âtlyh viatuhpa Malaysian hneirô patluapa sawchanô Angelina Francis Khoo

Na paw ta US Dollar 407 Million ryu cha siesai awpa châ ha sa la kheita na y vâ he? Chanô na châ khiahta Abeinô hawhta na hro hmâh aw chi ta, khizaw phasana zydua hneipa ta hrozô na pakhôsa tlai aw..Châhrasala, he he Angelina Francis Khoo, Malaysian Tycoon (Hneirô patluapa) Khoo Kay Peng sawchanô châta cha hraoleipa deita châ ta, sôhthih reihtiahleipa hlâta a kyhpachâpa nahta hrochhôh hmâh khoh awpa â tlyh via cha maw! Kyhpachâna heta khizaw hmo hropa zydua hlâta hmotaotheina a hnei hluh via tahpa Angelina heta a pasia kaw chhao eima tah thei aw..

Angelina heta khopa, Jedidiah Francis hnei ta. He satliapa he Angelina heta a paw ta ryusôh $407 Million po a pie awpa hlâta âtlyh via ha. Angelina paw heta a khopaw nahta amâ pazi tyhpa he pakhâ tyh ta; khoh khao lei awpa nata thlai siesai awpa ta a chhorei tyh hra. Châhrasala, khizaw sôhthih hlâta kyhpachâna âtlyh via tuhpa, Angelina châta cha $407Million hlâta cha a kyhpachâpa, Jedidiah Francis kiah liata pahrâ ta, riethei rairuna zydua kyhpachâna chhaota chatôh papua awpa âtlyh via haw!

Angelina nô he chanô sia kawpa, sawzy mohôh pahnie kawpa châ ta; a paw deikua he a chhôhkhazy hlâta sôhthih pachâ viapa, kô kha ta a sawnah kiah liata noh 2/noh 3 deita daihti a hmâh tyhpa,  a sôhdaohna lia sai ta a bua tyhpa a châpa vâta a sawnah ta a kyhpachâna ama hmô chyh kaw..

Angelina chata, “Ei pâ heta lahpinô pha patlua kawpa, sia patlua kawpa hleikhôta sawchanô ano kyhpachâtuhpa hnei ta; anodeikua sôhthih âtlyh via ha tlôh ta. A kô nata khih hluh liahsa ha ta, daihti rei chhao hnei khao vei tahpa â pahnona chôta a chhôhkha hlâta sôthih a buakhei via thlâh hapa he a pei kaw. A hronoh hluh viapa sôhthih buakheina ta a hmâh tawhta a daihti hnôh lâchhâ he cha a chhôhkhazy kyhpachâna châta hmâh hra sala aw!” tahpa ta a paw ta “kyhpachâna hlâta sôhthih âtlyh via hapa pei a tahzie a reih”.

Angelina heta sôhthih ta cha khizaw hmo deita chalei thei ta, Jedidiah Francis nahta kyhpachâna amâ hlypa deikua ta hrochhôhta pasô awpa hmo a pie, tahpa reih ta; a hrozô chhâkha liata a my beih eli awpa khitlyna khochhihpa â chhih hai, a tah hra...