Rev C.Thâlai hnohta châpaphao lâhâhpa (Open Letter to Rev C.Thâlai)

- Laicho Notlia

Krista châta sei ngâchhihpa,

Na Zi Beipa Zisu Krista O lâ nâ di hlâta na sapa mo cheingei ta he châpaphaopa he na rei awpa ei khoh tu hapa vâta bâh vaw reih papua tua ma y. Thi tawhta thâchhie-thâpha â reipa hlâta cha hro noh chhôh cheingei ta reippa he a phapa ta ei pahnopa vâ a châ.

Na châbu ropa, ‘Ka Khualzinna ram’ eina present-pa chi kha vaw reih papua na ta, ei palôh eina hria kawpa vâta reih papua chanei heih na ta, khatita ma cha ei reihpapua chanei heih thlyu aw. Khizaw he â duah chy awpa a châ khiahta la Marasaw thyutlia avaw y lymâ awpazy ta reih chyu ei sala ei tah kaw. Na chakaona kyh liata ngâchhihna hro, reingiahna hro, nawhna hro, kyhpachâna hro nata Pastor châna a pahnopasiana hro zydua he nâ chakaih tahpa hmô na ta, rônah ei cha tah hmeiseih. Krista thâtihpha nahthlie awpa ta, a reithaina hla sa awpa ta nata ano lâta thlahchhâ awpa zy ta hruatuhpa (Dawhparotuhpa) rai tawhta avaw thao chi ta, S.K (Satlia-Kaona) py vaw chhihtha chi ta, Khihchhôh Machâ tawhta Village Pastor kaw châ lymâ chi ta, Kraws pheisaih na châ tawhta a rei leipa liata thâtihpha chho awpa ta Burma râh lâ thlai tuapa châ chi ta. Reingiah ngâsâpa ta nâma deita chhao châ leipa ta, na pôhpa tlawrakhapa (lahpinô) chhaota na khih nata râh puasaipa ta sie papua chi ta; Palôh liata Abara nata Sarai-zy amâ vaw lâpâ ngâkaw. Na sie chyta pasyuna bie a reituhpa Rev. Chhôhlei ta Biehrai bie a reipa, “Na râh tawhta nata na heih-nawh tawhta nata na paw O tawhtapa pua la, râh ei cha pamosa awpa lâna chata sie teh” (Âthaona 12:1) tahpa bie he nâ hmie ngâsâpa ta ei cha pahno.

Kô 1955 tawhta Pastor ta chahnao pa-ipa (Ordained) vaw châ chi ta, kô 49 chhôh Pastor rain a hria tawhta kô 2002 liana khata vaw pisih (Pension) chi ta. Atanoh taihta miah na hrolâh chypa he keima heta la ei ly ngâsâ. Na vaw chakaolâh penawh Reverend 24-zy ta Krista O lâ châ di sai khai ha ei ta, nâma deita ta he lei chhiesapa râh liata na charei chypa he na y ru aw ta, na palôh chhao â lie kaw na ta ei cha pangiasa.

‘Ei hmia lia haosâ khih ngiapa a y,

Tlô ngiatiah va khihpi ngia cha;

Lôhkhy zydua a kina su,

Hmô byuhpa ta sai na ai vei’ tahpa hla he a ru lâta raithlih chhaota na sa ngâ tyh aw na ta ei cha pangiasa.

Lyuhchâpa Pawla ta, “Thâtihpha he a daihti liata chhao; a daihti leipa liata chhao chho ngâthlâh ha awpa a châ” a tahpa hawhta, na Pastor daihti chhôh lia dei châ leipa ta Pastor tawhta na pisih (pension) hana taih chhao ta thâtihpha chhona rai a chalihsai leipa ta Sermon khazie lei châ ma roh chi ta, raihpâ chi ta, thâtihpha chhona rai dei he thikhei hrokhei tlâ nâ chhuah bao. Vârâh khihnarâh liata ryu nâ pachôpa he khazie lei châ ma châ aw bao vâ he! He lei râh liata luh nyuna awpa O nata lyu, sôh nata thih kyh liata Pastor hropazy hawhta hnei hra vei la, chô lâ tawhta châ saituhpa vârâh zawpi reitiahleizy ta la, hneirô chaipa tlao ama cha tah thlyu aw. Râh kyhpachâna hmeiseihpa a hnei leipa, ahlaopa Politician thokhazy yzie nata siezie hâ â lapa ta Pastor thokhazy ta cha awnanopa mietakuzy chakaochahlâh awpa hlâta cha, atahmâhlâ khizaw tlaichhaina ta ama palôhzy bie khai ha ei ta. Dema chhao kha khizaw a tlaichhaina vâta a chakaolâhpa Pawla cha Thysalawnika khih lâ a siesai hapa kha eima pahno. (2 Timawthy 4:10).

Nâma deikua cha, châ awtuhpa pahnopasia chi ta. He vâta 3^rd April, 1955 liata Rev.AB Lorrain Foxall ta Lorrainville Achhyna-O liata Pastor châta a cha chahnao pa-i (Ordained) nota bieryu a cha hihpa, “Atanoh tawhta cha Pastor ei châ haw, tahpa he my kha y!” tahpa ta ei no (2) lâta a cha chho chaneipa khata kô 49 chhôh Pastor rain a hriapa nata atanoh taihta na HRO châ chhituhpa a châ, tahpa na reipa he a rônah ei tah ngai ta.

Kô 49 chhôh phei sai tan a bia chahlô chi ta, ei khan â thaopa he thla kha thla no hlei zy ryu tyh chi ta. Sao nata chhiah, vâsua-nohsa, tilai-thopawpazy a pakhâsa leipa chi ta. A châhta nodi dâhphipa ta, thachhâ panaopa tan a y tyhpazy, china thlahzohna chôta a leithei leipa vâta ti laipa chaka chi ta, tily ta cha phaoh ta; châhrasala châ tuahtuhpa ku thatlôpa ta a cha patupa vâta thina khôkhâh chi ta. Chano-chahaw chopa tawhta khôkhâh hmâ awpa ta y hmo cha paryhpa ta. Sahrâpa pakah tawhta cha pachha ta, he châ vaihtuhpa he Dania nata a viasazy meipi nata chakeihbarôhneipa pakah tawhta a pabohsatuhpa pyly kha a châ tahpa eina patheisa chanei heih chi. Kô 1968 liata thâtihpha na chhopa vâta Burma sawhkhâ ta lô-O liata cha patâh ta; châhrasala no-âhchhih kawpa ta lô-O tawhta na pua heihpa chhao he, Abeipa vâlyuhchâpa ta Pity lô-O tawhta a papuapa (Hmotaopazy 12:4-11) nata ânanona a ypa ta pahno hra va na. Na chakaona thâtih kichopa ei vaw reih nota ei ngia na chhie ngâsâ chi ta, na heihvi-heihvâna thâtih na reipa heih hra ei pahnei chhi ngâsâ heih tlô. Rev.Liangkhaia ta, “Khazohpa awna pahnopasia leipa ta Pastor rai hriapa cha rai khochhih lei chaipa na a châ” a tahpa he â do ei tah ngâsâ hra. Na biereipa sâkha, “Pastor rai he sei rai châ ta, Pawla chhaota, ‘Krista sei’ â tah ta, Pity chhaota, ‘Saimaw Pity, Zisu Krista Sei’ â tah hra” tahpa na reipa he Pastor zydua ta ama pahno chanei hr’awpa kho â chhih ngâsâ.   

Atanoh eima Pastor sahlaozy, nâma hawhpa he pakhazie tlaima y aw vâ ei he? Na hro liata reihchhona (Comment) a pietuhpa hluhpi hry liata thokha biereipa he rônah ei tahpa vâta ei vaw roh chanei tua aw. Machâ C.Zohupa ta, “Kan Kohhran Pastor zingah chuan inngaitlawm ber leh thawkrim ber a ni hial awm e” tah ta. Rev.C.Rosiama, Sr.Executive Secretary, Mizoram Presbyterian, Synod ta, “Mizoram Pastor-te zingah chuan Isua Krista chhiahlawh tia koh tura zahpui awm lo pawl tak a ni awm e” a cha tah hra. Rev.Dr.HS Luaia ta, “Amah ang hlir hi Kohhran hruaitute hi n ila” tahpa ta a cha reihchho (Comment) hra. Rev.Dr.T.Laikai ta, “Kan ECM Pastor tha be rte zinga mi a ni” a cha tah hra. Rev.K.Lianzuala ta, “Pastor ka hria tawh zingah inngaitlawmna lama Lal Isua a ang teuh berin ka hria” a cha tah hra chuh. Synod nata Baptist Pastor hluhpi Comment-na tlâhpipa cha, ‘Pastor hry liata a reisi chaipa, tiama chaipa nata rei angiah chaipa’tahpa ‘Title’ sâthôh (3) lakho he ama cha pakho khai ei. Keima tlai chhao heta, he Title he nâ phuh (deserved)-pa ta ei pahno hra.

Atanoh cha eima râh liata chhao byhnâ athata to pi ta, thyutlia châthaipa hluhpi hnei pi ta, sawhkhâ rai hra hmô thei’pa avaw châ khao leipa vâta chyhsa hluhpi cha râh kyhpachâna vâta chhao châ hlei leipa ta Politics Field â ngiapa nata Rev Liangkhaia reipa hawhta Khazohpa awna pahnopasiana hnei tlô leipa ta Pastor rai liata â ngiapa ama vaw y hôlô. Cha hawhpa chyhsazy cha Politics nata awnanopa liata tiamana hnei leipa ei ta, ngâchhihna nata reingiahna hnei leipa ei ta. Pastor thokha cha siku hyutuhpa thokhazy hawhta ama bia lia chhao y hoh leipa ei ta, ama bia buah karie hapa chhao chahlô-cha-ei hoh leipa ei ta, Headquarter liata nata khihpi viapa liata y awpazy tlâ amâ chhu. Krista Awnanopa mietaku sahlaozy kyhpachâna hnei khao leipa ei ta, âmo chhôhkha O nata lyu, khihsâtôhtuna deita tlâ a pachâ ei ta, siku hyutuhpa thokha, ama yna su liata y hoh leipa ta, Siaha khihpi liata saita a y penawh hawhta Siaha lia saita tlâ a y khohpa ama pôh via ngâkaw.

Nâma deikua cha, na chhôhkha, O nata lyu, hneirôna nata nohâh ynazy cha khâpa sisawta rao leipa chi ta. Chôlâ tawhta na awna ao na pahnopasiapa vâna chata Krista pachhana thâtihpha deita he thikhei-hrokhei awpa ta hro nâ vaw pie bao! Châ awtuhpa palôh cha a tlâh muarua chaimâh tlai aw. Khizaw puasaipa tan a chakao Krista O lâ nâ di tita vâsu hawka liata Krista thisaih vâta pachhapa saw hluhpi nata vâmo sahlao reitiahlei ta dyna Prokre ama tao n’awpa dâh kaw rohpady chaimâh na ta, ei cha uahva chaimâh. Banner lai ngâsâpa liata, “Rev.C.Thâlai, Krista Sei ngâchhihpa, tiamapa nata reingiahpa, eimâ châ vaw ly na, na paw lyna liata a ngia teh” tahpa he ngôh pahupa ta vaw roh aw ei ta, nah la taopa rônah ngâsâpa, hla nuhby 339 na, tlâh chhânapa,

“Chakaona rai rônah chaipa cha,

O nah lyu nah chhôhkhazy siesai ta,

Khizaw liata tovyuh â pakypazy,

Bei Zisu zituh hmeiseih châ ei” tahpa hle he vâ hlapy reitiahlei ta ch’aw paryh p’aw ei ta, lakho hneituhpa Krista tan a luh lia lakho aw ta, aw....a rônah awpa zie cha chyhsapa paleih ta la reih thai awpa châ vei.

Nâma ta hla na sa awpa ei pangiasapa cha,

‘Topa Bei lakho hlâta,

Ei pasô pietuhpa (Krista)

Khih parônahsatuhpa,

Mietaku (Zisu Krista) a châ’ tahpa he a reisi kawna chôta nâ chhyna a châ thlyu hra aw. Tlâh parei chy ma y....!