KALADAN MULTI MODAL TRANSIT TRANSPORT INDIA CHÂTA RYUH SÔHPA

- Delson Nôtlia

Camp: New Delhi

Atahmâno he India nata China zy cha râhrina chôchâ vâta athata bua ei ta- India sawkhâ nata China sawkhâ zy chhao nawh viapa achhuah rairie vei ei. Media thokha ta ama report na dâh chhochhi cha he Doklam buana vâta India nata China cha dyuhthei awpa duahsu liata amâ duah ama tah. Anodeikuah atahmâ chhâ khizaw liata cha adyuhna he hmo pha chaipa châleipa ta, avaw dyuhpa châ ha ei sala, China chhao taoh aw ta, India chhaota ataoh hra aw. He vâta biechhona (Negotiations) hmâpata he buana he ama pathlâ awpata hnabeiseihpa a châ.

China nata India buana âthaona lâta ei vaw reina chhâpa cha, tavia he châpaw he za reih lai ei chita, Kaladan project zy nata âzaona dâh nama za pahno pathu via lai lymâ aw. India râh he, eima pahno awpa peimawh kawpa cha, Khizaw râh 7 zy nata International border ahneipa a châ. Cha râh zy cha Pakistan, Myanmar, Nepal, Sri Lanka, China, Bhutan nata Bangladesh zy ama châ. He a Opa zy tawhta râh-rina chôchâ liata ama bua ho chaipa cha Pakistan nata China zy he ama châ. Atahmâta China nata ama buana chhâpa chhao he Doklam Plateau vâta a châ. Doklam Plateau he India (Sikkim), Bhutan nata China râh-rina liata ypa a châ. Ama buana chhâpa cha China he Doklam râh-ri sianôpa y mâhleipa liata Lâpi lai kawpa a chhiah vâta a châ. He lâpi ama chhiahpa he Bhutan ta kholei kaw ta, China cha a lâpi chhiahpa chalihsa awpa ta âhaw. He lâpi chhiahpa he India chhaota kholei kaw hra, India ta cha he lâpi he India chadieh khona achâ hleikhô ta, China military lâpi pahyna na a châ tahpa ta, he ama raih hriapa chalihsa awpata Doklam su liana heta pheisaih atuah ei. China ta he buana chôchâ liata India âvaw chahraoh hrapa he, tah theilei law ta, India cha âchalih vei khia 1962 adyuhna liata ama taochhiepa hawta ama taochhie heih aw tahpa ta, apachhipary ngâ hai hra. He châpaw roh no chhao heta India nata China pheisaih zy cha hmiachhy pata ama y ngai hai.

KALADAN PROJECT INDIA CHÂTA APEIMAWHNA CHHÂPAZY

India map eima mo khiata cha, keimo Northeast States sâ 8 zy : Sikkim, Arunachal Pradesh, Nagaland, Manipur, Mizoram, Meghalaya, Assam nata Tripura zy ta India râh mainland eimâ pazaona râh y chhôpa cha Siliguri Corridor tataw ngâsâpa he a châ. A tataw tuhpa vâta, he râh apazaona he 'Chicken's Neck' (Awh Raohmi) tahpa ta pahnopa a châ. Siliguri corridor he atahmâ cha lâpi chohpa nata alei tlapahnaipazy vâta sievaw vâna liata rairuna hluhpi Northeast States zyta eimâ tyh ty. Tahmâ ta India ta Doklam liata China ta Lâpi achaopa akholeina chhâpa sâkha za y theipa chhao, keimo Northeast ta India eimâ pazaona Siliguri Corridor àzâhnia tu haw. India sawkhâ heta kô hluhpi chhôta Northeast India nata mainland India asiepahliena pha via n'awpa lâpi he avaw tlua tyh ta. Cha lâpi zydua liata âryhpaoh chaipa cha Chittagong, Bangladesh râh he a châ. Chittagong tawhta Kolkota cha âhnia ngâsâpa a châ. He vâta India sawkhâ ta atheina zydua papua pata Bangladesh cha apadiapalô ta Bangladesh sawkhâ nano nanopa cha âvaw daoh tyh. Anodeikuah Bangladesh ta atanoh taihta paryhsa vei. He aparyhsalei vâta atanoh taihta Siliguri Corridor âhla ngâsâpa he sôhdao hmo lapangiana châta eima hmâ ngâhlâ hapa avaw châ. Apakhopâ n'awpata India nata China he âvaw dyuhpa châ ha ei sala, China ta Siliguri Corridor he bomb chaimâ sala, he su tataw ngâsâpa he, la ha sala Northeast India States zydua cha India mainland nata eimâ pazaona y khaw aw vei. Cha vâta India râh châta cha Kaladan Project he sôhdaona châ ngâhlâta peimawhleipata, a râh pabohsa n'awpa châ chhaota, project peimawh ngâsâpa a châ.

KALADAN PROJECT ÂTHAO TUAHNA

Kô 1999 liata India râh liata Lok Sabha General Election hneipa a vaw châ. NDA ta a sawkhâna ama tao. Atal Bihari Vajpayee cha Prime Minister châta atlyhpa avaw châ. Prime Minister I.K. Gujral sawkhâ ta 'Look East Policy' he vaw pathaopatô tuah chaita. Kô 2003 liana khata Vajpayee nata India râh policy atao tuhpa zyta Kaladan River hmâpata Northeast India cha West Bengal âpazao thei tahpa cha a serious kawpata siekhei awpata hmalana ama vaw tao. Hmo sâkha ei vaw zie kho kawpa cha, eima Missionary RA. Lorrain khata, Beinô chavah hmâpata Kolkota âtlôtheina dâh lâpi kha, kô hluhpi asie hapa liata vaw pahno ta. Survey nata expedition taihta vaw hnei ta, project proposal chhao Chin Hills Superintendent hnota chhaota avaw pangia hapa a châ. He a proposal project original copy he Lorrain Bungalow, Saikao liata hmôtheipa ta a y. Kô 2004 liata Lok Sabha General Election hneipa vaw châ heih ta, NDA Vajpayee sawkhâ cha tla ta, he Project he vaw siekhei hmâvei ei. Sawkhâ thiehpa UPA, Congress chhithana ry liata avaw pih haw. Prime Minister châta, Dr. Manmohan Singh cha atlyhpatlohpa avaw châ. Vajpayee sawkhâ ta Look East Policy Kaladan Project avaw saduthliepa cha, UPA sawkhâ chhaota apha tah ta, ahmeiseihpa ta ama vaw siekhei haw. Kô 2008 liana khata a official kawpata India nata Myanmar Sawkhâ ta Kaladan Project Framework Agreement cha amâ vaw signed haw.

KALADAN MULTI MODAL TRANSIT TRANSPORT PROJECT CHÔCHÂ LIATA PAHNO AWPAZY

Kaladan Multi Modal Transit Transport tahpa ta a moh ama bina chhâpa cha - he transport heta lâpi kao thô a hmâ awhpa vâta. Cha zy cha: *Tilaipi (Sea) , Chavah (River) nata Lâlai Lâpi (Road)* zy a châ.

1. TILAIPI:

India nata Myanmar heta Tilaipi lai ngâsâpa Bay of Bengal ama hnei. India ta Balyh pahâna su nata sôhdaona su West Bengal, Kolkota liata Haldia Dock ahnei. Myanmar chhaota Balyh pahâna su nata sôhdaona su Sittwe Port, Rakhine State liata ahnei hra. Haldia Dock Kolkota nata Sittwe Port âhlana he 540 kms a châ.

2. KALADAN CHAVAH:

Kaladan chavah, keimo Mara nah pita Beinô chavah eima tahpa he, Chin State tawhta loh lymâ ta, aloh pasih ngâsâ. Alohna dâh he âlyu tlâleipa ta, keimo Maraland ôna chhô liata alohna dâh chhochhi cha Balyh laipa angiatheilei awpata aloh, eima vâ adua kaw. Beinô chavah liata Balyh laipa tlô theina su y chhôpa cha Paletwa -Chin State Burma he a châ. Cha vâta Kaladan Project ta âchhuah chaipa cha Sittwe Port tawhta Paletwa taihta balyh sie thei n'awpa River Port tao awpa he a châ.

3. Lâlai Lâpi (Road)

Eima reih chiehpa hawta keimo ôna chhôh Beinô taihta Balyh asie thei khaoleipa vâta Paletwa, tawhta cha lâlai lâpi chao awpa byuh hata, cha vâta Patetwa Beinô balyhpahâna su tawhta Myeikwa, Burma nata India râhrihna Zorinpuii, Lawngtlai District, Mizoram(109 kms) taihta lâpi chaopa a châ aw . Mizoram cha Northeast States zy châta sôhdaona supi chaipa a vaw châ bâ aw.

KALADAN PROJECT HMALANA

kô 2008 liata hmala pathaopa achâ taraw pata India he kao totie liata anainôsô kaw ta. China ta India râh Opa liata port zy sâno sâthô asa nota, India cha Kaladan Project chhao patlôthei mâhvei, anainôsô kaw. Manmohan Singh sawkhâ ta kô 2010 tawhta Kaladan Multi Modal Transit Transport Project cha vaw siekhei hmeiseih ta, kô 2015 liata patlô khai awpata agreement amâ vaw signed. Anodeikuah he kô 5 chhôh patlô khai awpa ama tahpa cha anainô sô tu hapa vâta patlôtheipa vaw châvei. He patlôtheileina chhâpa ta ama rei chaipa cha, sôh adaihleina nata planning âdolei vâta a châ ama tah.

HMAHLA PAZINA HMEISEIHPA CHHÂNA

Kô 2014 liata Lok Sabha General Election hneipa vaw châ heihta, Dr. Manmohan Singh Sawkhâna cha vaw tla ta, NDA ta a sawkhâna ama vaw tao. Narendra Modi BJP pa cha Prime Minister ta atlyhpatlohpa avaw châ. Narendra Modi ta 'Look East' ngâhlâ àdaih tah khaovei, a hneiseihpata taona 'Act East ' policy na eima hmâ bâ aw tahpata, Kaladan Multi Modal Transit Transport Project cha thlaita mo pathipa avaw châ. Manmohan Singh sawkhâ ta he project châta Rs 535 crore avaw allocate pa cha, Modi sawkhâ ta aliecharu daihmâ Rs 2,904 crore ta apapôh.

Consultant chhao Modi sawkhâ ta, thlai ta thla ta, State owned company Ircon Infrastructure and Services Ltd cha Consultant ta hmâpa a vaw châ , kô 2019 he Modi Sawkhâ ta deadline apie ei.

He project heta rairuna hluhpi âtyh ta. Contract awpa chhao thlaita hmôtheipa vaw châleipa ta, he vâta Tender chhao eino-2 tlai, tao chaneipa avaw châ. Atahmâ ta Contract ahria ngâpa cha Delhi liata firmed â based pa C & C Constructions ama châ.

Atahmâ cha India chhaota vâsâ ta Sittwe Port cha patlô hata, Kaladan chavah Balyh sie n'awpa nata pakawhna raihria chhao Paletwa taihta patlô daihmâpa châta, final stage liata a y ngâhai. Kô 2019 deadline he cha ama khô nata pangiasa âchhi khaovei.

BIETLÂH PAKYUNA:

China he sothai kawta, sôh ahneihluh vâ nata infrastructures liata amâ sâh vâ chhao châ awta. India chheipâ liata a y pa râh zy he athata syh pahniepa âchhuah ta, hlaotlohna chhao ahmô lymâ. Arabian Sea nata Indian Ocean zy liata biehneipa âchhuah ngâsâ. India châta hmm pachâchhie âchhi kawpa a châ. Atahmâ he Pakistan liata China ta Gwadar Port ama tao ngâhai. Sri Lanka liata chhaota Hambantota Port, US Dollar 1.5 Billion mâpa China ta apadua heih aw. India, Japan nata USA ta China âpielyuna dâh he amamaochhie kaw. Achhâpa cha he port apadua laina su he naval base ta ahmâ awpata khâchâ pangiasa ei ta, India châta chhochhi cha hmialâ liata China nata avaw dyuh ei sala, naval liata China ta nao kawpata achanaoh thei aw.

India he kô hluhpi foreign policy liata taochheina hluhpi ahnei. Achheihpâ liata a y pa Nepal nata Bangladesh dâhdeih hmata policy hmâpata pahnie theivei. He ziza a y nota India nata Myanmar sawkhâ ta Kaladan Multi Modal Transit Transport Project Agreement amâ vaw signed theipa he India châta cha lôsôh achâ hleikhôta Myanmar nata aviasana pha kawpa tao khona lâpi sâkha a châ. Atahmâ chhao he China ta India aly khona dâh cha India ta Sittwe liata Special Economic Zone apadua ngâhaipa laikathi ta liata, Myanmar Sawkhâ cha agreement â signed kheipata Kyaukphyu, Myanmar liata Special Economic Zone apadua kaw hei. Atahmâta Myanmar sawkhâ Aung San Suu Kyi, Myanmar State Counsellor chhithana Sawkhâ heta India khokhei kawta, Kaladan Multi Modal Transit Transport Project chhao he patlô parah awpa ta Myanmar Sawkhâ ta âhaw ngâhlâ ha.

Kaladan Multi Modal Transit Transport Project kô 2019 liata ahlao avaw tloh tita cha keimo Marasaw zy taihta chhaota hmâ pahnai pita, hmo phapa eima hmia liata vaw tlô awpa a y nota, hmo phaleipa chhao âvaw chakaih hra aw. Cha vâta eima Mara pho eimâ boh lymâ n'awpa ta eima Autonomous District Council, NGOs, Awnanopa nata Mara zawpi zydua sothai kawpa nata adyhryh kawpata eima sie khoh awpa apeimawh ngaita kaw. Paritheipa drugs, refugees nata hmophaleipa nano nanopa zy chhao sôhdaona apha khia, hmo âvaw ngiatheipa a châ hra. Apachyh chhielie n'awpata atahmâno tawhta policy pha ngâsâpa nata awareness zy ta eimâ vaw mâh chhielie awpa he apeimawh ngaita kaw.

He Kaladan Multi Modal Transit Transport Project heta Marasaw India nata Burma liata a y pazy châta apôkha vianapa vaw tlôkhei sala, Mara nation paduana liata Khazopa ta byhnâ maniah pie mawh sy.