KÔ 14 A KHÔ HAPA LIATA KRISMAS HMOSAIPIEPA AVAW PAPHAOTUHPA NAHTA AMÂ HNEI!

©Facebook | Joana Marchan-Wolfe

Henah nôvah thâtih khochhih kawpa nata palôh pahnie kawpa tawhna heta ‘Hiahvâ sâhmia patipatyhpa/chôhsu’ tahpa reikah he â do hmeiseih tlai khiah maw?tahpa pachâna athata na za hnei thei aw. Ama likah cha Km sâh hluhpi ta pachhaih ta, kheita rimâ ma United States liata a ypa chapaw hawtipa khata Phillippines liata hmosaipiepa a paphao tawhta kô 14 a khô tawhta a hmosaipiepa khata lahpinô awpa âvaw chhipa thei tly i?

United States he Miles 8,222 (13,232 km) ta Philippines tawhta cha â hla ta; châhrasala hia leipa byhnâ ta Tyrel Wolfe, Idaho, US liatapa nata Joana Marchan, Quezon City liatapazy apatipatyh hapa ei a châ.

Kô 14 a khô hapa liana khata Tyrel Wolfe he kô 7 ta uhtheipa deita châ chy ta, khizaw su nano nanopa liata hawti rietheipazy baotuhpa py, Samaritan’s Purse-zy siepahliepa ta pheiky byh liata achuna châta pha awpa nano nanopa, hawtipazy ta hmo ama hmâh phahnai awpazy nata Krismas hmosaipiepa khôpa ta paphao hra ta. Krismas hmosaipiepa a paphao papuapa liana heta Ano nohthlahpa chhao a paphaopâ hra. Cha hmo a paphaopa cha khizaw su hropa liata hawtipa thysâh hluhpi hryta Phillippines liata chanô hawti pakha, Joana Marchan ama tahpa ku liata kei tlô ta! He tawhna heta ama khitlyna âvaw thao hapa a châ.

©Facebook | Joana Marchan-Wolfe

Joana heta hmosaipiepa a daopa paphaotuhpa, a hmia pahno beih leipa nata mâlâ ta chhao a hmô beih leipa Tyrel cha alynabie reina paphao ta, châhrasala he alynabie a reina châhna heta Tyrel kô deikua tlô beih vei. Kô 10 hlei a khô tawhta chhao he chanô hawtipa Joana heta hmosaipiepa vaw paphao tyhpa, a nohthlahpa khâ a sai tyhpa Tyrel Wolfe cha a palôh liata thi thei leipa ta, ano châta cha ângiah chaina daihti liata hmosaipiepa a daopa cha a châta yzie hnei chaipa châ tlô ta;avaw paphaotuhpa hnazô â tyh n’awpa noh rai a ngiahtiah vei!

Kô 2011 avaw pahieh papua ta, Joana ta hmosaipiepa a dao tawhta kô 14 avaw khô ha hra. Nohkha cha Joana chata Facebook liata Tyrel cha tlua papua haw ta, Facebook hmâpa ta sâhmia amâ tyh haw!

A viasa â khy kawpa, kô hluhpi chhôh â hmô khao leipa hawh tlaita Joana nata Tyrel chata Facebook tawhna chata apakyh ei ta. Ama pahâhna kao chhao âlyu kaw, tahpa ama pahno lymâ ha hra. Reithaina hla (Gospel Song) nahthlie paphasa kawpa rairie ama châ hleikhôta, zyhna kyh liata a icha kawpa ama châ rairie tahpa taihta amâ pahno ha hra.

©Facebook | Joana Marchan-Wolfe

Cha hawhna chata kô 14 a khô tawhta facebook liata â tyhpa ta, kô kha hlei tlai facebook tawhta amâ pakyh tawhta Tyrel chata US puasaipa ta Joana a hmô awpa ta Philippines liata Quezon City, Manila cha phusâ âvaw pachô tlakaihpazy hmâpa ta a ngai lymâ haw. Tyrel châta cha he a khitlyna he a hronoh chhôhta a kyhpachâ chaipa hnazô âtyhna noh hmeiseihpa avaw châ hapa a châ.

A hmeiseihpa ta amâ hmôna su nata dawh liana chata, “hiahvâ sâhmia patipatyhpa ama châ” tahpa pahnopâ ha ei ta; cha su, dawh, noh liana chata Kyhpachâna ta khâchâ amâ patupâ hapa a châ.

Joana ta amâ tyh tua chaina a reina dâhta cha, “A hmi ei hmô patawnah khata, ei palôh liata reipasia thai rimâ lei awpa hmo vaw tlôpâ ha ta,thaphana ta vaw bie na ta, alyna vâta angiahmapa ta raithlih palosa leithei va na!” a ta.

Tyrel chhao ânano hlei hra vei, “Joana he keima châta avaw pihpa a châ, tahpa deita khan a ei pachâna liata a ypa cha a châ” tahpa ta amâ tyh tua chaina noh ta a yna dâh he a reihpasia hra.

 

©Facebook | Joana Marchan-Wolfe

He tawhna heta cha Tyrel he US lâ kua heihpa ta, lahpinô châta Joana hiah awpa ta Phillippines lâ he vaw kua heih ta. Rairuna nata atymâna khâpa hmahta y leipa ta kô 2014, Phiata noh 5 liana khata ‘Thina dei leipa ta cha miah pachhaih kha se’ tahpa ta ‘hrochhôh a kao khoh awpa ta’ bietaina ama vaw hnei hapa a châ.

Hmopiepa ta chakaona ta yzie a hneizie nata byhnâ â keizie ama pahnopasia tu ha bâpa vâta, ama heihnawhzy nata ama viasanahzy cha ‘Hmopiena kyh liata a pasaih via awpa nata hmopie chakaona raihria via awpa ta pasyutuhpa’ ama vaw châ haw!

Atanoh taihta ama nôvah ta khizaw su nano nanopa liata hmosaipiepa, Samaritan’s Purse siepahliepa ta ama paphao papua pazao lymâ hapa a châ!