SAKHI TAW AMA SÂHPI AMA PAZYSA TYH

Photo : Bishnoi no pakha ta sakhi taw nata a saw sahpi a pie nopa

Bishnoi chipho (tribe), Rajasthan-liatapazy heta kô 550 chhôh cha leilô liata hmo a ypa (Nature) âvaw chhy tyh ei ta; Na zo ma zo vei ma, Sakhi-zy he âmo châta cha râhsa pathaihpa (Sacred animals) châ ei ta, sakhi taw, a pinô ta a thi sai hapazy cha ama sawnah hawh tlai ta ama sâhpi pazysapa ta, ama sâhpiti ta ama chyh tyh cha maw!

Bishnoi chipho nôzy heta sakhi tawzy nata ama sawnahzy kyh ama pachâna dâh he â kho ta, ama sawnah sikhua ta sakhi tawzy he ama hmô thlâh ha ha hrapa hawhta reipa a châ. He hleikhôna heta Bishnoi-nônahzy heta he sakhi taw ama mohôhpazy nah heta bie achhopa ta, amâ pahnothai kaw, ama ta.

Bishnoi nôzy heta nohsahpa ry liata liahsa atyuhpa ta, ama sâhpi sâkhalâ cha ama sawnah pazysapa ta, sâkhalâ cha sakhi tawzy ama pazysa tyh.

Khôtholâ tawhta ama khih vaw tlytuhpazy châta cha he hawhta nôtlohpazy ta sakhi taw ama sâhpi ama pazysa tyhpa he ama no-âh kaw thei aw ta; anodeikua ‘Bishnoi’ chiphozy châta cha, he sakhi tawzy he ama sawnah hawh tlupo châ ei ta, ama sawzy hlâta hmahta kyh ama pachâ via thlyuna aw, tah thei awpa a châ hra.

Photo : Ama sawnah hawh tlupo ta kyh ama pacha

India Nochhi lâ liata a ypa, Rajasthan State liata a ypa, he Bishnoi chiphozy heta he sakhi taw, ama pinôzy ta ama thisai hapazy heta mohôh awpa ta la tyh ei ta, ama sawnah hawh tlaita chyhpa ta, ama mohôh tyh.

Bishnoi chiphozy he Odyh 2,000 deita châ ei ta, zyhna kyh liata cha kô zabi 15-na tawhta Hindu Guru Sri Jambeshwar Bhagwan azituhpa châ ei ta, zyh awpa dâh nata phôh 29 ama hnei.

Nô pakha, Mangi Devi Bishnoi ta sakhi taw sâhpi a pie tyhna chôchâh a reina liata, ‘He sakhi tawzy he ei hrona châ ei ta, keima châta cha ei sawzy nahta amâ nanona y vei’ a tah cha maw!.

Photo : Sakhi taw ama dao kaw

‘Sâhpiti nata nie awpa pie tyh ei na ta, ei chhôhkha manôh hropazy hawhta daodopa ama châ nahta châ lei mohpa ta, ei khâsia kaw tyh, tahpa ta, 'Keimo eima y chhôhta cha ama pinôzy ta ama thi sai hapa hawhta pachâ leipa pi ta, keimo he ama nô thiehpazy châ pi ta, amâ ngiahpa sâhpiti eima vaw pie tyhpa deita a châ.’a tah hra.

He hawhta sakhi tawzy mohôhpa ta, sâhpitizy ama pie tyhpa he chyhsa châta cha no-âh achhih ta, vaw pasi kawpa chhao ama y thei aw; châhrasala, Khazohpa ta râhsazy nata hmohrohneipa hropazy he eima nie awpa deita tao leipa ta, mohôh ta, khâsia awpa ta nata chyhsapazy nahta â ngiapâ rairiepa ta y awpa ta a taopa ama châna kao Bishnoi chanôzy heta ama palâsa.