KÔ 50 CHÂ HA TA INCHES 29 DEITA Â SÂH HRASALA, CHYHSA HROPA ZYDUA HLÂTA A PÔH A PAHREIH VIA!

Photos : Basori Lal

Kô 5 deita a châ no tawhta lai thai khao leipa ta, chyhsa pasipasawhpa nata mohnaona reikah deita hlaopa ta a hro noh a kaw hmâh lymâ hra. Châhrasala cha hawhpa zydua chata a hro hnabeipadysa leipa ta, hro lyna a hneipa nata a chôta Khazohpa ta ryraona a piepa kyh liata palôhtlâhleina tlyma hiehâhna tlyma hnei beih vei; cha hawhta palôh chhyu kawpa a hneipa chata deichhy lymâpa ta, ama khih liata chyhsa alâluah chaipa nata za a hlao chaipa chyhsa lâta a kaw pua hapa a châ.

He chyhsa Basori Lal, kô 50-ta uhtheipa he Madhya Pradesh he a hawti nota cha hawti hropa hawhpa pyly châ ta. A pih nota cha hawsaihpa hropa hawhpa pyly châ ta, a laisaih thei lei n’awpa chhâ rai a pilâ nata pizie liata â lâ tlâ hra vei. Cha hawhta daihti khachâ rakha ma a kaw hmâh tawhta kô 5 ta uhtheipa kaw châ ta, cha liana chata a chhôhkhazy ta ano liata pihpasina, lai thei khao leina pasana a hnei, tahpa ama pahno papua hapa a châ.

Atahmâ cha pitlohpa tah thei awpa châ ha ta, anodeikua, Inches 29 hlâta â sâh via thei khao vei.

Basori châta cha a hawti chhôh zydua cha hrophapa nata daihti phasa kawpa châ leipa ta, pasipasawhna nata pahnei saisona châta taolana torai tao ta, cha hawhta ama pasipasawhna zydua nata taolana zydua cha a palôh chhôh liata khâchâ âvaopa ta reihpapua beih leipa ta, achhypalie beih hra vei. A pihpasina cha thatlôna châta hmâhpa ta, atahmâ cha ama khih liata chyhsazy ta ama za kawpa nata mopasâh kawpa avaw châ haw.

 

Photo : A unawhpaw Gopi-zy nahta

Basori heta, “Chyhsa ta athata na pasipasawh tyh ei ta. Khizaw khôtho lâ tawhta a vypa (Alien) hawhtazy eina reih tyh ei. Atahmâla cha hawhpa daihti zydua cha liahsa khô ha ta. Eima khihsawzy ta ama tlaichhaipa nata mothai chaipa tlao ei vaw châ haw,” tahpa ta UK thâtihbu Daily Mail ta amâ pakyhna liata a rei.

A pihpasina pamosa ta thohna phapa pado awpa ta a chhôhkhazy cha riethei sipasa kawpa châ ei ta, âmo châta cha ama sawchapaw pasana no-âh a chhih kawpa cha thohna thaina ta patlâh awpa cha vâ liata awhsi chakheipa hawhta tlupo ta rairupa nata hmo a thei leipa a châ; he vâna heta atahmâ taihta he hawhta a lai thai khao leina chhâpa he reih awpa rai pahno vei ei.

Basori he a unawhpa Gopi Lal nata a lahpinô Satia Bai hnohta pahrâ ta. A unawhpa Gopi heta, “Dawhty hnohta ngaikhei thei awpa châ ma pi. Eima riethei tlôh ta, keima hra he nohchareih kuraihriapa ta nie atluapa deita châ na ta. Khataih râh rimâ cha ma ei ngaikhei aw?”tahpa ta a unawhpaw châta a pasana patlâh awpa ta hnabeiseihna ama hnei leizie a reih.

Basori he kô 50 a tloh ha tarawpa ta lahpinô hnei mâh leipa ta, hnei awpa achhuah hra vei. Hmotaopapuana su liata raihria ta, a chhôhkhazy kiah liata pahrâ ta, ano kyhpachâ hmeiseihtuhpazy kiah liata a hro noh a hmâhpa tluta a palôhpatlâhtuhpa rai y vei.

Basori hawhna heta, eimâ lâna dâhzy, eima pihpasinazy, eima rietheinazy nata heihzy hlâta eimâ hnai viana hawhta eimâ pachâna zydua he Palôhru dopa eima phaoh khiahta la, eima pahnie lymâ aw, tahpa khâ athei chyu ei suh u.