“VEINA HMEISEIHPA TA SY!”

-          J.B. Khaisia, New Colony III, Siaha.

            Marâ reih râh thapasatuhpa eima pôh via lymâpa ta a lâ ta, aly â chhih kawpa ta ei pahno. Marâ chi nata reih a pasâhsapa nata pabohsa awpa khoh vâta a vei kawpa chhao eima pôh via lymâpa ta â lâ. Marâ reih N.G.O (ie. MTP, MCHP & MSO) zy chhao ama vei kawnazie cha, hmotaopa ta ama palâsa lymâ hrapa ta pahnopa  a châ. MADC, Board of Mara Literature nata MADC, Art & Culture Dept. zy chhaota, Marâ reih ama veina cha Thâtihbu (Magazie) hmâpa ta nata Seminar-zy hmâpa ta hmahlana athata ama hneitahpa eima pahno chyu nata ei pangiasa.

            Cha tlai chuh, Mopathaihpa Pawla ta, Ngiapâna cha hmotaopa a hlao awpa a châ, atahpazy, Zami, châpaphaopa liata, hmotaopa ahlao leipa ngiapâna cha, ngiapâna thipa a châzie miah a pachupazy, Mopathaihpa Zawhana ta, kyhpachâna cha, hmotaopa nata hmeiseihpa châ mawh sy, a tahpazy a pahnotuhpa sai eima châ. ECM Pastor Rev. N. Beihrokhei, Vahia Biatuhpa ta, “tahmâ tawhta la, Khazohpa bie eima reihpa he, Thlahpa nata hmeiseihpa ta reih bâ suh vy,” tahpa ta, a reipazy heta pachâna thata na pie ta, ei ly kawpa a châ.

            Â do kaw tlai, eima khihpi Siaha liana heta, Marâ reih Seminar chhao eima hnei ngâ tyh hra. Eima no avâ kaw sai nata ei pangiasa. Anodeikua, eima reih â boh nawpa chôchâh Seminar eima hneipa nata Thâtihbu liata eima papuapa rakha lia heta eima palôh eima patlâhsa thlâh hapa ta ei pahno cha maw ! Chavâta, Marâ râh, Marâ reih nata Marâ Cultural, eima veinazu he Thlahpa nata hmeiseihpa ta eima vei tlamaw tah theipa a châpa ta ei pahno. Eima khihpi, chhôh bawlawpa chhao he, nohto, hâta to, thlato bata kôto ta, hmiathiehpa (chyhsa thiehpa) hmia hmôpa ama y ngâ thlâh haw. He hawhnahrata, Siaha khôtho lâ, chhao khito, râhto liata, chyhsa thiehpa chi hro, reih hropa a baichhipa ama y lymâ hrapa ta pahnopa a châ. Khâpa vâ tlyma, eima dao (pasô) kaw sai cha maw ! He heta azyh zyta, chi nata reih padisaona su lâ miah apangai khei laih ngâpa ta ei pahno. Tahmâ eima unawh sietanô khoh kawpazy heta miah disai (assireilate) tuhpazy lâta a vaw lie (châ) aw ei ta, ngiapachhina phahnai khao leina daihti a tlô aw tahpa pachâna ta, palôh pasa a chhih kawpa ta ei pahno.

            Chavâta tahmâ bawlaw ta eima hria awpa a byuh hmeiseihpa ta ei pahno. Marâ râh thapasa ta a veituhpa eima hluhna thita cha, eima hriana hniehnôh a hnoh lalih leipa a châ. A reihta reih cha a nao kaw, a tao ta tao deikua a ru tyh tahpa eima hro tawhta sia thlâh ha tlai vei ma ? Marâ sawzy hryta ngâ viapazy chhao pi he, eima ochhôh nata Seminar su liata eima pahâkhei kawpa hawhta, eima râh chhôh khi hro, su hrola siehnaoh awpa ta cha eima choh eima nyu khai thlâh hapa châ vei ma ? Khazia na reih na pahlei aw, chô Khazoh a cha piepa che ? Eima pahlei nawpa (padisao ta eima châ nawpa) chhâpa cha eima hria lei vâta nata chi hro reih hropa eima hrialâhpazy vâta a châ. Chi hro reih hropazy a hao leipa pi ta, anodeikua eima reih (Marâ reih) a chu khohna nata thai achhuahna rai hnei hra vei ei. Cha hawhta a châ haino ta, keimo (Marâpa) ta, ama reih a hly pi ta eima cheihnaoh hripa a châ. He vâta amo tlai chata, Awnanopa ryureina liata zy, Public Meeting liata zy, Politics lâta, Party Office liazy ta reih hropa cheipa (hmâhpa) a vaw châ tyh. He zydua he Reih padisaona su lâta miah a ngiakhei awpa sai a vaw châ.

            Cha khiahla, Reih hropa a cheihpazy ta, Marâ reih pasôh ta, ama pasâhsa vâta Marâ hla achu awpa châ ta, maniah a hiahpa pakhazie a pha ei. Chavei ta, Marâ reih thai khoh vâta Marâ reih châbu miah a hiahpa khazie tlaima a y (pha) ei tly ? Tlaikaopa ta, Mara reih bietlohpa (sentence) miakha vâ-ia hlâta a hnei chhôhpa ta ei pahnopa cha; “Maphasy” tahpa kha a châpa ta ei pahno cha maw ! Viahpa (Kalasapa) chhao châ sala, he hawhpa pyly ama châ hrapa châ ta, chi hro, reih hropa eima pahrâhlâh hropazy chhao ama châ saipa ta ei pahno. Keimo, nochhi, Marâ nata notla Marâpazy pi he eima hiahôh a a vaw paphasatuhpâ ha pi ta, chavâta, chi hro , reih hropa ta miah ama disao dhâ dei aw tahpa ei chi kaw. Chyhsa thokha ta, Feeling kawpa ta eina pachâ thei ngyu ei chi. Anodeikua kei hlâta cha, eima y tahpa viapa, tlaikaopa nata chi hropazy he, a feeling via syulyu tahpa pahno ei suh u. Keimo cha eima râh chhôh liata a châ vâta â lâhâh tlaita reih pi ta, chi hro reih hropazy deikua ta cha aru lâta ama ochhôh tawhta ama pathaopa a châ.

            Chavâta eima chi nata reih nata Culture – zy pabohsa a khohpa nata a veituh hmeiseihpa eima châ tlôh khiahta cha, eima ochhôh tawhta pathao awpa a byuh. Chahawhna hrata, Seminar a hluhvia hnei sih la, Shillong, Aizawl, Lôlei nata Lytai liazy chhao hnei awpa a byuh. He heta zawpi palôh hria pathie) aw ta, Marâ sawzy a pahra awpa ei hnebeiseih kaw.

            Chavâta, rei no reih lâlao, tao no tao lâlao tahpa ta, Râh chi nata Reih a vaw boh lymâ sala, hmahsie via ltmâ sala, a râh kawh via lymâ sala tahpa eima khohpa nata pachâpa tlaita a châ khiahta cha, Râh veina hnei hmeiseihtuhpazy châta cha, y molo thlâh ha theipa rih châ leipa ta, hriapâ lymâ a byuhpa a châ. Pachâ pasi via tua si, eima khihpi Siaha he, mylâ hâno liata cha, Marâ saw hlâta chi hro reih hropa sôhdaopa (shop Keeper) ama hluh via heih aw. Village Council Member chhao he hawh pyly he châ aw ei ta, MDC Constituency hluhpi chhao he, chi hro, reih hropazy eih (biehneina) ta a vaw châ nawpa a hla khao leipa a châ. Marâpazy pi he, tahmâ hawh lymâ ta eima kaw sie laih thlâh hapa a châ khiahta cha, eimâ pho patoh nawpa a nao kaw.

            Chavâta, eima râh nôpawpazy nata eima râh Awnanopa lâta nôpawpazy chhaota, Marâ reih a boh sala, a kawh via lymâ nawpa he, N.G.O. (MTP, MCHP, MSO) zy hriapa tao awpa khiahma tah leipa ta, eima duasu chyu tawhta eima hria chyu awpa a peimawh kaw. Cha hawhnahra chata, Board of Mara Literature nata Arts and Culture MADC zy nata Mara Hlasa Py zy chhao a pielyu para a byuh tahpa pahno awpa ei khoh kawpa a châ. Marâ reih thâtih bu (News paper) he hluh via papuapa châ sala a pha kaw. Political Party Marâsaw yna su chyu liata Marâ reih hmâh hluh viapa châ sala khoh a chhih kaw. He hawhta eima hriaparaoh theipa nata eima hria tiamapa ta a châ khiahta cha, eima reih (Marâ reih) he tlâh aw ta, a boh thlyu lymâ thei awpa ei hnabeiseih kaw. Marâ sawzy thyu tlai sihla, Padua Pathi tlai ei suh vy.