TISADÂH NAHTA KÔ 20 HLEI AMA PAHRÂKHOH!

Photos : Chito nata a tisadah 'Pocho'

Tisadâhzy heta ama pachâna liata nie awpa saheipa nata ama rih pabie thei awpa hmo deita mokhâhpa ta amâ byh tyhpa hawhta pachâna na hnei ma? Chyhsapa nata Tisadâh he amâ viasa thei na tan a pangiasa ma? He thâtih na rei khai tita la na pachâna na thla thlâh ha ngyu thei la y.

He thâtih he a hmeiseihpa, chyhsapa nata tisadâh a viasana, thina taihta a viasana no-âhchhih kawpa châ ta, tisadâh ta a lei khitlyna noh hmâh khaipa ta a thina taihta a viasana, chyhsapa nahta amâ viasana thâtih cha a châ.

Costa Rican ngapatutuhpa, Gilberto Shedden, ‘CHITO’ tahpa ta ama aw tyhpa heta he tisadâh, ‘Pocho the croc’ tahpa ta a moh a bipa he kô 1991 liana khata Parismina chavah ngiahkâ liata hmahphaohpa ta â hluah thlâh ha nota hmô ta. Tisadâh he a mokhaoh liata Meithei ta kapa châpa ta, he su liana heta thi awpa ta a katuhpazy ta ama siesai hapa a châ.

Chito ta a hmô nona heta Tisadâh he a sabia chhao chhi kaw bâ ta, kg 68 deita â hri. Chito heta a ngiachhietu hapa vâta ma a châ ma, tisadâh he mohôhpa ta, awhsa nata ngasa ta chyh ta, a châhta cha a kiah liata â ziahpâ thlâh ha tyh. Biezy a chho ta, chamao-chahlia ta, a châhta cha a sy (kiss)-pâ ngâkaw tyh hra.

 

Photos : Chito nata Pocho

Chito chata, “Pati a nie awpa piepa deita a daih vei tahpa pahno na ta; He tisadâh heta hrohpapua awpa ta ei kyhpachâna â ngiah tahpa ei pahno” tahpa ta a reih.

Thla charu tlai a mohôh tawhta Pocho (Tisadâh) he vaw pha papua heihpa ta, Chito heta ti liata a papua lilaw ha heih hra. A pachâdâhta cha râhsa, pachâna chhao a hnei leipa châ ei ta, a pathlie tawhta cha vaw kua khao leipa ta a lei pathlah laih ha awpa hawhta a pachâ. Châhrasala, tisadâh cha ti tawhta kaw pua ta, Chito pahrâna O kiah liata âvaw byuh thlâh ha heih!

He he ama likah liata azaona no-âhchhih kawpa, a viasana avaw thaotôna cha châ ta, tisadâh kiah liata a daihti hluh viapa a hmâh ha tawhta tly cha, Chito he a lahpinô ta âchhaihpâ ngâkawpa a châ.

Chito chata, “Tisadâh ta ei O lâ taihta na vaw pazi ta, a moh ta ei awna châhki ta âvaw luah ha chhyh tawhta cha pasopakâ theipa a châ tahpa pahnopâ ha na ta” tahpa ta, “Pocho (Tisadâh) hawhta a pielyupa tisadâh he la y thlyu vei ei, tisadâh thysâh hryta sâkha deita hawhpa na a châ” tahpa ta ama likah liata azaona no-âhchhih kawpa cha a reihpasia.

Photo : Tisadah a thi nota Chito ta a pathlie nopa

Tisadâh heta a heihzy pahrâna lâta kua heih awpa hlâta cha a hrona pachhatuhpa Chito kiah liata pahrâ awpa atlyh viapa ta, Chito kiah liata a noh nata daihti hmâh lymâ haw ta; Chito chhao chata lahpinô hropa thlai hnei heihpa ta, a lahpinô thiehpa nah chata sawchanô sa ei ta, a lahpinô hmiatuapa hlâta Chito a vâhnei viana cha, a lahpinô thiehpa heta cha Tisadâh he a daodo kaw hrapa he a châ. Thlaita Tisadâh cha ama chhôhkha manôh pakha hawhta pachâpâ haw ei ta; kyhpachâna chôta mohôhpa a châ ha bao cha hnaihta laipahly kaw ta, Feet 16 po ta laipa châpa ta, â hrina lâ chhao Kg 454 po a kaw châ ha hra!

Amâ viasana chata hmahsiena lâ ngai lymâpa ta, ama putu ta Costa Rica liata âmo a hmô awpa ta khi vaw tlyhpazy châta apalypa-uasana pamosa tyh ei ta, ama likah liata reihpasia thai lei awpa azaona cha khizaw ta chhao a pahnokhei thai ha hrapa a châ.

Kô 2011 avaw pahiehpapua ta, leilô dâhta avaw rao chhielie hapa hawhta tisadâh hro noh chhôh awpa ta bitaipa taihta a hroh tawhta pasana akhiakhipa vâta Chito viasa phapa, khizaw ta a pahno beih leipa a viasana no-âhchhihpa cha thina ta avaw pachhaih hapa a châ. Tisadâh a thi nona heta a ri chhao chyhsapa hawh tlai pabuna daihti hmâpa châ ta, a hneituhpa Chito heta tisadâh ri chô liana heta pathliena hla a sapâ ngâkawpa a châ!

Râhsazy chhao heta âmo kyhpachâtuhpazy he vaw my chahcheita vei ei!