FIFA World Cup 2018 Qualifiers : Spain ta 8-0 ta Liechtenstein ama taola

Spain

Kô 4 chhôh eima hâ tawhta khizaw liata Football ataopasuana lai chaipa nata rônah chaipa, ‘The Greatest Show on Earth’ ama tahpa, FIFA World Cup chhao hâkô 2018 khita Russia liata akhaih heih awpa vaw châ ha bâ heih ta. Russia liata World Cup akhaih thei awpa ta khizaw râh nano nanopazy chhaota Qualifying round amâ khaih hai hra. 

Hâkô Russia liata World Cup akhaih thei awpa tluana akhaih haipa sai heih aw pi ta; Europe râhhlypi eima sai via aw.

Spain ta Group G liata hmia asah pazao lymâ awpa ta Alvaro Morata nata David Silva-zy ta Goal ama khôna akhaihna liata Liechtenstein cha 8-0 ta ama pahnie. Spain heta Italy chhao 3-0 ta hâta hmiatuapa pachyh noh khata vaw pahnie ha ei ta, Liechtenstein nahta amâ khaih nona heta minit 16 chhôhta si 3-0 ta hmia amâ sah hmâ ha.

Spain goal-zy he Ramos ta ei kha, Morata-ta ei 2, Isco ta ei kha, Silva ei kha, Iago Aspas ta ei no nata Liechtenstein Player Goppel ta ama kao lâta a pangia tlamawpazy a châ.

Spain heta Group G liata Point 3 ta hmia a sah hai ta; Italy cha 2-na liata ama y hai. 

Group I liata hmiasahtuhpa Croatia ta hmia amâ sahna pa-ipacha via heih n’awpa daihti ryhpaohpa pahleipa ta, Cenk Tosun-ta Minit 75-na liata goal a khôpa hmâpa ta Turkey ta 1-0 ta ama pahnie.

He pahniena vâna heta Croatia he Group liata Iceland nahta Point 16 rairie hmôpa ta hmiasahtuhpa châ ei ta; Iceland heta Ukraine cha 2-0 ta Gylfi Sigurdsson goal 2 khôpa hmâpa ta ama vaw pahnie hra.

Hetana heta Group liata Turkey nata Ukraine-zy heta Point 14 rairie hmôpa ta Croatia nata Iceland-zy he Point ta amâ chadai hai.

Serbia ta Republic of Ireland 1-0 ta pahniepa ta Point 18 hmôpa ta Group D liata hmia asah hai ei ta; World Cup akhaih thei awpa ta pangiasa chaipa ama châ lymâ chy.

Wales ta 2-0 ta Moldova pahniepa ta Group hmiasahtuhpa Serbia he Point 4 ta â chadai hai ei ta; Austria deikua 1-1 ta Georgia nahta amâ pahniethai tawhta 2-na duasu to awpa ta ama duasu a chhie kaw bâ.

Atahmâ duasu liata FIFA World Cup 2018, Russia liata akhaih thei awpa ta râh 8 tloh ha bâ ei ta. Russia cha a tlôtuh awpa a châpa vâta tloh pachie ha ta; Soth America tawhta Brazil  tloh ha ta; Asia tawhta Iran, Japan, South Korea nata Saudi Arabia zy ama tloh ha hra. North & Central America tawhta Mexico tloh ha ta; Europe tawhta Belgium ama tloh ha hra.