Khizaw Muslim râhzy ta Rohingya Muslim-zy chôchâh liata Aungsan Suu Kyi reikah pathlie awpa ta amâ haw

Nobel Peace Prize palyupalihna avaw dao hapa, Pakistan chanô thyudyupa Malala Yousafzai nata Asia liata Muslim râhzy chata atanoh khata Myanmar chhihtuhpa Aung San Suu Kyi nata a râh Myanmar cha Myanmar liata Rohingya Muslim-zy taolana chôchâh liata ama maochhie.

Atahmâ duasu liata Myanmar tawhna heta taolana chipa vâta Rohingya chipho chyhsa 90,000 rachhôhta Bangladesh ngai ha bâ ei ta; Rakhine State liata buana heta zie-yna lâ ngai thei mâh vei.

Rakhine State, Myanmar nata Bangladesh râhrina chaby liata a ypa he kô hluhpi chhôh cha Rohingya Muslim-zy nata Buddhist-zy likah buana su vaw châ ha ta. Rohingya Muslim-zy heta pathluana amâ tyh tyhpa hawhta reipa a châ hra.

Atahmâ ta buana heta zâkô Phiata thlâpâ liata Rohingya riahrupazy ta Rakhine liata pheisaihzy yna su ama tlahnao tawhta avaw thaopa châ ta; UN chata he tlahnaona vâna heta Myanmar pheisaihzy ta Rohingya chyhsazy he ama tlahnao hapa a châ, a ta.

Rakhine, Myanmar liata hmotlôpa vâna heta Indonesian activist-zy cha Bandung, West Java lâthlôh achhih ei ta; Myanmar pheisaih ta ei hluhpi ama vaw patu hapa, chhihtuhpa Aumg Saan Suu Kyi cha Rakhine buana chôchâh liata reikah pathlie awpa ta dycharaona a hluh kaw. Suu Kyi heta he buana âthao tawhna heta reikah sâkha hmahta a pathlie mâh leipa hawhta reipa a châ ta. He buana chôchâh liata Nobel Prize avaw dao hatuhpa Malala Yousafzai chata, "Thâtih thiehpa ei mona maihta, Myanmar liata Rohingya Muslim-zy taona heta ei palôh a pasasa tyh" a ta.

Yousafzai chata, "Khahlâ tawhna khata Myanmar liata Rohingya Muslim chôta apielyuna kyh liana heta reikah vaw pathlie tyh na ta. Nobel Prize ei daoh lâhpa Aung San Suu Kyi heta reikah a pathlie bâ hr’awpa â ngiah," a tah hra.

He buana vâna heta Myanmar-ta South East Asia liata Muslim hluhna râhzy nahta azaokhina ama hneina kyh liata rairuna a tlôkhei theipa hawhta pachâpa châ ta.

Indonesia foreign minister Retno Marsudi chata he chôchâh liana heta Suu Kyi nata Myanmar army chief General Min Aung Hlaing-zy cha atanoh khata Naypyidaw, Myanmar liata â hmô hata; Indonesia President Joko Widodo chhaota "Thlai ta he buana he a chhâ awpa a châ” avaw tah ngâkaw hra.

Indonesia President Widodo ta bie  arei khai tawhta daihti rei leipa liata Indonesia khihpi, Jakarta liata Myanmar Embassy cha mei ta tlahnaopa a châpâ hra. He hleikhôna heta tlyhmia liata palôhtlâhleina pamosana hneipa a châ hra.

Pakistan foreign ministry chhaota châ papuapa ta, "Rohingya Muslim-zy thina chôchâh nata ama chôta peihriana thâtih he eima pachâ peimawh kaw" tahpa ta Myanmar cha Rohingya Muslim chôta peihriana thlaita alaichadai awpa ta a pahnosa hra.

Pakistan hleikhôna heta Iranian foreign minister Javad Zarif chhaota "Khizaw râhzy Rohingya muslim chôchâh liata amâ chalih thlâh ha. He peihriana he a chatliena lâta pachhâsapa châ thei sala" vaw tah hra ta. Iran liana heta Muslim chyhsa thokhazy ta palôhtlâhleina ama palâsa hra.