Kô 2 tlai a khô haw - Na pahno khao ma chapaw hawti ngiachhiechhihpa Aylan Kurdi khaw?

Kô 2015, Thlarâh thlâpâ châ ta, kô 2 ta uhtheipa Aylan Kurdi cha adyuhna ta apabuapa rãh liata alaiseihpa châ ta. A nô nata paw, Abdullah nata Rehen zy chata ama sawchapaw Aylan nata a uhta kô 4-ta uhtheipa, Galip zy ta ama yna, adyuhna ta apabuapa khih, Kobani, Syria liata hro rairu kawpa ama hmâna tawhtapa puapa ta hropha viapa ama hnei hra thei n'awpa su ngai awpa ta achhuahnoh ei ta. Ama hmo tlaichhsipa cha mohropa zy tlaichhai hawhpa pyly - aduyhna râh, thlahlôna raita a y leina su puasaipa ta - pahrâna thlahlôh a chhih viapa cha achâ. Hropha viapa sadu ama vaw thlie tyhpa hlaopatloh a chhuahpa ta, khitlyna lâthlôh chichhihpa amâ chhihna liata, Aylan, a uhta nata a nô zy cha ama saduthliepa râh, china nata thlahzohna raita ama hmô khao lei n'awpa su ama tlô hlâta, ti liata tlapa ta ama hrona ama pahlei haw. Turkey tilaipi raphyu liata kô 2 ta uhtheipa, Aylan ri, â khu lâta a y thlâh hapa chata khizaw raihthlih palosa ta; a nô nata paw byh chô liata thapha kawpa ta pahneisilih tyhpa, Aylan Kurdi, hawti lôhmaohpa cha tilaipi ngiahkâh liata pahneisilihpa ao nata reikah rai papua leipa ta si a dia thlâh haw.

Aylan paw, Abdullah deikua hrohpapua ta. Châhrasala, a châta hrota yzie rai hnei khaovei . Raithlih chhaota alahpi nata saw zy ri cha mohpa ta, vâsâna chôta, "He khizaw liana heta khâpa hmohropa hmah khoh khao vana. Ei saduthliena zydua leidia ha ta, ei lahpi nata sawchapaw panopa zy ri he pabu awna ta, ama thlâ kiah liata ei thi hlâhlei ei tyuh thlâh ha bâ aw." tahpa cha a saduthliena thiehpa a châ ha bâ.

Khizaw he khitlyna râh deita châ ta; khihpi sôhpahlôhpa hnei tlai ma pi tahpa deikua khâ â thei ei suh u.