Kyhpachâna vâta California tawhta Haryana thotlâh lia naw sâhpiti a saoh!

Chyhsa kyh na pachâ hmeiseih khiahta cha ama duasu nata châna tan a pachâna pabua aw vei! Hnabeiseihpa hmo hneipa ta kyhpachâna na raih papua deikua khiahta la, na hrozô chhâkha cha pasana nata amaoh-ohna ta na bie aw!

He California laihsa chhao heta Haryana thotlâh satlia kyhpachâ aw ta, kyhpachâna vâta leipalie liata naw sâhpiti saohpa ta a khizaw a hmâh aw, tahpa pachâ pha hra thlyu aw vei. Ama chipho taozie, kô nata khih â hliena nata reih vâta ama likah kyhpachâna cha dia via hlei leipa ta, Facebook tawhta noh 10 bie amâ chho tawhta, Haryana satlia, mongyuh reih liata a thai kawpa reikah, ‘I love you!’ tahpa chata ama likah â hlana cha lâhnia lâta pachâsapa ta, kyhpachâna phie thai khao lei awpa cha ama likah liata avaw pih hapa a châ.

Mukesh Kumar, kô 25 nata Adriana Parel, kô 41 ta uhtheipazy he Facebook tawhta kô 2014 liana khata avaw pahno pathao ei ta. Cha hawhta facebook siepahliepa ta amâ pakyh pathao tawhna chata, châ chhuhpa dei cha â daih tah khao leipa ta Adriana heta Mukesh Phone balance a hryuh tu lei n’awpa ta ano ta tlao bie avaw chho tyh ta. Lâ hlapi tawhta bie chho a ru kawpa vâta eimâ chho thei tlakaihpa liata daihti reipâpa tlai a chho awpa eima khoh tyh nota, âmo pano deikua he cha Mukesh Mongyuh reih thaina ta â daih parei tyh leipa vâta minute 2-3 chhôh deitazy bie amâ chho tyh. Châhrasala, khizaw reihzy ta ama chhopasia thei leipa kyhpachâna deikua ta minute 2-3 chhôhta lôhraohna pie leithei vei!

Adriana he California liata khichhai-chyh-eihtuhpa (receptionist) raihriapa châ ta. He hleikhôna heta sawchanô kô 25-ta uhtheipa hneipa ta, ama chhôhkha ta California, USA liata khih ama sa. Athaota liata cha Mukesh nahta kyh amâ pachâ tahpa he phuahluah awpa chi kaw ta, châhrasala California tawhta Haryan liata Mukesh-zy khih lâ a kei tlô nota deikua Mukesh chhôhkhazy ta amâ vaw ly-ua hmeiseih! Mukesh nô ta vaw tlaichhai ngâsâ thlâh ha ta, a sawchanô hawh tlupo ta avaw hmôpâ ha!

Daihti rei chhao pakhôsa leipa ta Hindu dâh ta ahneipa ta, Adriana chhao heta thlaita Mukesh-zy khihsana dâh cha â zipâ lymâ ha hrapa a châ. Mukesh nata a chhôhkhazy châta pati pahâh kawpa patohpatiapa deita cha paphasa leipa ta, a châhta Mukesh hnohta leipalie lâ siepa ta naw sâhpitizy chhao a saohpâ lymâ tyh hra!

US liata Adriana chhôhkhazy tly awpa ta deikua rairuna a tyh hra ei ta. Achhâpa nata avâpa nano nanopa vâta Mukesh Visa pasia thei leipa ei ta; Adriana heih hra cha Tourist Visa deita ta India vaw tlypa châ heih tlôh hra; ama bua kaw hra.

Châhrasala, rairuna nata atymânazy vâta ama likah kyhpachâna cha ahuary via hlei leipa ta, nohchareih rairuna chatôhkhohpa ta hrozô ama hmâh lymâ ha hrapa a châ.