Siaha liata âhmie ama zuapa 90% cha District hropa nata State hropa tawhta lapangiapa a châ

Siaha : Siaha khihpi liata âhmie zuapa, âhnalasipa nano nanopazy cha Siaha District tawhta chheipapuapa hlâta District hro lâ tawhta nata State hro lâ tawhta lapangiapa a châ via chai tahpa Siaha Bazaar nano nanopazy duasu âchupasiana tawhta pahnopa châ ta; Siaha khihpi liata âhmie, âhnalasipazy he Lytai District – Siachangkawn, Cheural, Bualpui, Lungzarhtum tawhtazy, Aizawl tawhtazy, Shillong tawhtazy nata Silchar tawhtazy lapangiapa a châ via chai.

District hropa tawhta nata State hropa tawhta âhmie lapangiapazy he Siaha liata âhmie zuahtuhpazy ta khawpachhuahpa ta, a mâ ru viapa ta zuapa châ ta; atahmâno ta Siaha khihpi Bazaar liata âhmie, âhnalasipa lapangiapazy nata ama zuana dâh tlâhpipa cha he hawhna heta a châ :

Âhiahthawhpupa he Kg 1 liata tlaw 120 ta khawpachhuahpa ta, Siaha bazaar liata Kg 1 he tlaw 150 ta zuahpachhuahpa châ ta; âvi he Kg 1 liata 20 ta lapa châ ta, Siaha liata Kg 1 tlaw 40 ta zuah pachhuahpa a châ. Bahly he Kg 1 liata tlaw 60 ta lapa châ ta, tlaw 80 ta zuahpachhuahpa a châ. âhiah he Dut nyu 1 tlaw 15 ta lapa châ ta, Siaha liata tlaw 20 ta zuahpachhuahpa châ ta; Iahsoh he Kg 1 tlaw 20 ta lapa châ ta, Siaha liata tlaw 30 tawhta 40 ta zuahpachhuah ei ta; Tomato he Kg 1 tlaw 80 ta la ei ta, Siaha liata tlaw 140 ta zuah ei ta; Chohlô he Kg 1 liata tlaw 30 ta la ei ta, tlaw 50 tawhta 60 ta ama zuahpachhuah heih hra.

Eima District ta eimâ tivy kawpa hawhta eima pachâpa, Iskut chhao he District hropa tawhta lapangiapa châpa ta, Kg 1 he tlaw 10-ta lapa ta, Siaha liata tlaw 20 ta zuah pachhuahpa châ ta; Chingit he Aizawl tawhta lapa châ via chai ta, tlaw 20 ta ama lapa kha ty 2 lâta pachhaihpa ta Siaha liata tyh 1 20 ta zuah pachhuahpa a châ heih hra.

Âhrâ deikua he Km 10 tawhta lapangia via chai ei ta, ty kha 20 ta la ei ta, tlaw 30 ta ama zuahpapua heih hra.

Awhnie-ô he kg 1 40 ta la ei ta, Siaha liata tlaw 60 ta ama zuah. Lâbua he Kg 1 tlaw 50 ta la ei ta; Siaha liata tlaw 80 ta ama zuah heih hra. Awhtaluh he Kg 1 liata tlaw 60 ta la ei ta; Siaha liata tlaw 100 ta ama zuahpachhuah heih hra.